Mandala.Sukta 8.59
Rigveda · 7 verses
- 8.59.1
सुपर्ण: काण्व:। इन्द्रावरुणौ ।जगती । · suparṇa: kāṇva: | indrāvaruṇau |jagatī |
इ॒मानि॑ वां भाग॒धेया॑नि सिस्रत॒ इन्द्रा॑वरुणा॒ प्र म॒हे सु॒तेषु॑ वाम् ।य॒ज्ञेय॑ज्ञे ह॒ सव॑ना भुर॒ण्यथो॒ यत्सु॑न्व॒ते यज॑मानाय॒ शिक्ष॑थः॥
imāni vāṃ bhāgadheyāni sisrata indrāvaruṇā pra mahe suteṣu vām |yajñeyajñe ha savanā bhuraṇyatho yatsunvate yajamānāya śikṣathaḥ ||
- 8.59.2
नि॒ष्षिध्व॑री॒रोष॑धी॒राप॑ आस्ता॒मिन्द्रा॑वरुणा महि॒मान॒माश॑त ।या सिस्र॑तू॒ रज॑सः पा॒रे अध्व॑नो॒ ययो॒: शत्रु॒र्नकि॒रादे॑व॒ ओह॑ते॥
niṣṣidhvarīroṣadhīrāpa āstāmindrāvaruṇā mahimānamāśata |yā sisratū rajasaḥ pāre adhvano yayo: śatrurnakirādeva ohate ||
- 8.59.3
स॒त्यं तदि॑न्द्रावरुणा कृ॒शस्य॑ वां॒ मध्व॑ ऊ॒र्मिं दु॑हते स॒प्त वाणी॑: ।ताभि॑र्दा॒श्वांस॑मवतं शुभस्पती॒ यो वा॒मद॑ब्धो अ॒भि पाति॒ चित्ति॑भिः॥
satyaṃ tadindrāvaruṇā kṛśasya vāṃ madhva ūrmiṃ duhate sapta vāṇī: |tābhirdāśvāṃsamavataṃ śubhaspatī yo vāmadabdho abhi pāti cittibhiḥ ||
- 8.59.4
घृ॒त॒प्रुष॒: सौम्या॑ जी॒रदा॑नवः स॒प्त स्वसा॑र॒: सद॑न ऋ॒तस्य॑ ।या ह॑ वामिन्द्रावरुणा घृत॒श्चुत॒स्ताभि॑र्धत्तं॒ यज॑मानाय शिक्षतम्॥
ghṛtapruṣa: saumyā jīradānavaḥ sapta svasāra: sadana ṛtasya |yā ha vāmindrāvaruṇā ghṛtaścutastābhirdhattaṃ yajamānāya śikṣatam ||
- 8.59.5
अवो॑चाम मह॒ते सौभ॑गाय स॒त्यं त्वे॒षाभ्यां॑ महि॒मान॑मिन्द्रि॒यम् ।अ॒स्मान्त्स्वि॑न्द्रावरुणा घृत॒श्चुत॒स्त्रिभि॑: सा॒प्तेभि॑रवतं शुभस्पती॥
avocāma mahate saubhagāya satyaṃ tveṣābhyāṃ mahimānamindriyam |asmāntsvindrāvaruṇā ghṛtaścutastribhi: sāptebhiravataṃ śubhaspatī ||
- 8.59.6
इन्द्रा॑वरुणा॒ यदृ॒षिभ्यो॑ मनी॒षां वा॒चो म॒तिं श्रु॒तम॑दत्त॒मग्रे॑ ।यानि॒ स्थाना॑न्यसृजन्त॒ धीरा॑ य॒ज्ञं त॑न्वा॒नास्तप॑सा॒भ्य॑पश्यम्॥
indrāvaruṇā yadṛṣibhyo manīṣāṃ vāco matiṃ śrutamadattamagre |yāni sthānānyasṛjanta dhīrā yajñaṃ tanvānāstapasābhyapaśyam ||
- 8.59.7
इन्द्रा॑वरुणा सौमन॒समदृ॑प्तं रा॒यस्पोषं॒ यज॑मानेषु धत्तम् ।प्र॒जां पु॒ष्टिं भू॑तिम॒स्मासु॑ धत्तं दीर्घायु॒त्वाय॒ प्र ति॑रतं न॒ आयु॑:॥
indrāvaruṇā saumanasamadṛptaṃ rāyaspoṣaṃ yajamāneṣu dhattam |prajāṃ puṣṭiṃ bhūtimasmāsu dhattaṃ dīrghāyutvāya pra tirataṃ na āyu: ||