Mandala.Sukta 8.73

गोपवन आत्रेय: सप्तवध्रिर्वा । अश्विनौ ।गायत्री । · gopavana ātreya: saptavadhrirvā | aśvinau |gāyatrī |

उदी॑राथामृताय॒ते यु॒ञ्जाथा॑मश्विना॒ रथ॑म् ।अन्ति॒ षद्भू॑तु वा॒मव॑:॥

udīrāthāmṛtāyate yuñjāthāmaśvinā ratham |anti ṣadbhūtu vāmava: ||

नि॒मिष॑श्चि॒ज्जवी॑यसा॒ रथे॒ना या॑तमश्विना ।अन्ति॒ षद्भू॑तु वा॒मव॑:॥

nimiṣaścijjavīyasā rathenā yātamaśvinā |anti ṣadbhūtu vāmava: ||

उप॑ स्तृणीत॒मत्र॑ये हि॒मेन॑ घ॒र्मम॑श्विना ।अन्ति॒ षद्भू॑तु वा॒मव॑:॥

upa stṛṇītamatraye himena gharmamaśvinā |anti ṣadbhūtu vāmava: ||

कुह॑ स्थ॒: कुह॑ जग्मथु॒: कुह॑ श्ये॒नेव॑ पेतथुः ।अन्ति॒ षद्भू॑तु वा॒मव॑:॥

kuha stha: kuha jagmathu: kuha śyeneva petathuḥ |anti ṣadbhūtu vāmava: ||

यद॒द्य कर्हि॒ कर्हि॑ चिच्छुश्रू॒यात॑मि॒मं हव॑म् ।अन्ति॒ षद्भू॑तु वा॒मव॑:॥

yadadya karhi karhi cicchuśrūyātamimaṃ havam |anti ṣadbhūtu vāmava: ||

अ॒श्विना॑ याम॒हूत॑मा॒ नेदि॑ष्ठं या॒म्याप्य॑म् ।अन्ति॒ षद्भू॑तु वा॒मव॑:॥

aśvinā yāmahūtamā nediṣṭhaṃ yāmyāpyam |anti ṣadbhūtu vāmava: ||

अव॑न्त॒मत्र॑ये गृ॒हं कृ॑णु॒तं यु॒वम॑श्विना ।अन्ति॒ षद्भू॑तु वा॒मव॑:॥

avantamatraye gṛhaṃ kṛṇutaṃ yuvamaśvinā |anti ṣadbhūtu vāmava: ||

वरे॑थे अ॒ग्निमा॒तपो॒ वद॑ते व॒ल्ग्वत्र॑ये ।अन्ति॒ षद्भू॑तु वा॒मव॑:॥

varethe agnimātapo vadate valgvatraye |anti ṣadbhūtu vāmava: ||

प्र स॒प्तव॑ध्रिरा॒शसा॒ धारा॑म॒ग्नेर॑शायत ।अन्ति॒ षद्भू॑तु वा॒मव॑:॥

pra saptavadhrirāśasā dhārāmagneraśāyata |anti ṣadbhūtu vāmava: ||

इ॒हा ग॑तं वृषण्वसू शृणु॒तं म॑ इ॒मं हव॑म् ।अन्ति॒ षद्भू॑तु वा॒मव॑:॥

ihā gataṃ vṛṣaṇvasū śṛṇutaṃ ma imaṃ havam |anti ṣadbhūtu vāmava: ||

किमि॒दं वां॑ पुराण॒वज्जर॑तोरिव शस्यते ।अन्ति॒ षद्भू॑तु वा॒मव॑:॥

kimidaṃ vāṃ purāṇavajjaratoriva śasyate |anti ṣadbhūtu vāmava: ||

स॒मा॒नं वां॑ सजा॒त्यं॑ समा॒नो बन्धु॑रश्विना ।अन्ति॒ षद्भू॑तु वा॒मव॑:॥

samānaṃ vāṃ sajātyaṃ samāno bandhuraśvinā |anti ṣadbhūtu vāmava: ||

यो वां॒ रजां॑स्यश्विना॒ रथो॑ वि॒याति॒ रोद॑सी ।अन्ति॒ षद्भू॑तु वा॒मव॑:॥

yo vāṃ rajāṃsyaśvinā ratho viyāti rodasī |anti ṣadbhūtu vāmava: ||

आ नो॒ गव्ये॑भि॒रश्व्यै॑: स॒हस्रै॒रुप॑ गच्छतम् ।अन्ति॒ षद्भू॑तु वा॒मव॑:॥

ā no gavyebhiraśvyai: sahasrairupa gacchatam |anti ṣadbhūtu vāmava: ||

मा नो॒ गव्ये॑भि॒रश्व्यै॑: स॒हस्रे॑भि॒रति॑ ख्यतम् ।अन्ति॒ षद्भू॑तु वा॒मव॑:॥

mā no gavyebhiraśvyai: sahasrebhirati khyatam |anti ṣadbhūtu vāmava: ||

अ॒रु॒णप्सु॑रु॒षा अ॑भू॒दक॒र्ज्योति॑ॠ॒ताव॑री ।अन्ति॒ षद्भू॑तु वा॒मव॑:॥

aruṇapsuruṣā abhūdakarjyotiṝtāvarī |anti ṣadbhūtu vāmava: ||

अ॒श्विना॒ सु वि॒चाक॑शद्वृ॒क्षं प॑रशु॒माँ इ॑व ।अन्ति॒ षद्भू॑तु वा॒मव॑:॥

aśvinā su vicākaśadvṛkṣaṃ paraśumām̐ iva |anti ṣadbhūtu vāmava: ||

पुरं॒ न धृ॑ष्ण॒वा रु॑ज कृ॒ष्णया॑ बाधि॒तो वि॒शा ।अन्ति॒ षद्भू॑तु वा॒मव॑:॥

puraṃ na dhṛṣṇavā ruja kṛṣṇayā bādhito viśā |anti ṣadbhūtu vāmava: ||