Mandala.Sukta 8.83

कुसीदी काण्व:। विश्वे देवा: । गायत्री । · kusīdī kāṇva: | viśve devā: | gāyatrī |

दे॒वाना॒मिदवो॑ म॒हत्तदा वृ॑णीमहे व॒यम् ।वृष्णा॑म॒स्मभ्य॑मू॒तये॑॥

devānāmidavo mahattadā vṛṇīmahe vayam |vṛṣṇāmasmabhyamūtaye ||

ते न॑: सन्तु॒ युज॒: सदा॒ वरु॑णो मि॒त्रो अ॑र्य॒मा ।वृ॒धास॑श्च॒ प्रचे॑तसः॥

te na: santu yuja: sadā varuṇo mitro aryamā |vṛdhāsaśca pracetasaḥ ||

अति॑ नो विष्पि॒ता पु॒रु नौ॒भिर॒पो न प॑र्षथ ।यू॒यमृ॒तस्य॑ रथ्यः॥

ati no viṣpitā puru naubhirapo na parṣatha |yūyamṛtasya rathyaḥ ||

वा॒मं नो॑ अस्त्वर्यमन्वा॒मं व॑रुण॒ शंस्य॑म् ।वा॒मं ह्या॑वृणी॒महे॑॥

vāmaṃ no astvaryamanvāmaṃ varuṇa śaṃsyam |vāmaṃ hyāvṛṇīmahe ||

वा॒मस्य॒ हि प्र॑चेतस॒ ईशा॑नाशो रिशादसः ।नेमा॑दित्या अ॒घस्य॒ यत्॥

vāmasya hi pracetasa īśānāśo riśādasaḥ |nemādityā aghasya yat ||

व॒यमिद्व॑: सुदानवः क्षि॒यन्तो॒ यान्तो॒ अध्व॒न्ना ।देवा॑ वृ॒धाय॑ हूमहे॥

vayamidva: sudānavaḥ kṣiyanto yānto adhvannā |devā vṛdhāya hūmahe ||

अधि॑ न इन्द्रैषां॒ विष्णो॑ सजा॒त्या॑नाम् ।इ॒ता मरु॑तो॒ अश्वि॑ना॥

adhi na indraiṣāṃ viṣṇo sajātyānām |itā maruto aśvinā ||

प्र भ्रा॑तृ॒त्वं सु॑दान॒वोऽध॑ द्वि॒ता स॑मा॒न्या ।मा॒तुर्गर्भे॑ भरामहे॥

pra bhrātṛtvaṃ sudānavo'dha dvitā samānyā |māturgarbhe bharāmahe ||

यू॒यं हि ष्ठा सु॑दानव॒ इन्द्र॑ज्येष्ठा अ॒भिद्य॑वः ।अधा॑ चिद्व उ॒त ब्रु॑वे॥

yūyaṃ hi ṣṭhā sudānava indrajyeṣṭhā abhidyavaḥ |adhā cidva uta bruve ||