Mandala.Sukta 8.97

रेभ: काश्यप: । इन्द्र: । बृहती , १०, १३ अतिजगती, ११-१२ उपरिष्टाद्बृहती, १४ त्रिष्टुप् , १५ जगती । · rebha: kāśyapa: | indra: | bṛhatī , 10, 13 atijagatī, 11-12 upariṣṭādbṛhatī, 14 triṣṭup , 15 jagatī |

या इ॑न्द्र॒ भुज॒ आभ॑र॒: स्व॑र्वाँ॒ असु॑रेभ्यः ।स्तो॒तार॒मिन्म॑घवन्नस्य वर्धय॒ ये च॒ त्वे वृ॒क्तब॑र्हिषः॥

yā indra bhuja ābhara: svarvām̐ asurebhyaḥ |stotāraminmaghavannasya vardhaya ye ca tve vṛktabarhiṣaḥ ||

यमि॑न्द्र दधि॒षे त्वमश्वं॒ गां भा॒गमव्य॑यम् ।यज॑माने सुन्व॒ति दक्षि॑णावति॒ तस्मि॒न्तं धे॑हि॒ मा प॒णौ॥

yamindra dadhiṣe tvamaśvaṃ gāṃ bhāgamavyayam |yajamāne sunvati dakṣiṇāvati tasmintaṃ dhehi mā paṇau ||

य इ॑न्द्र॒ सस्त्य॑व्र॒तो॑ऽनु॒ष्वाप॒मदे॑वयुः ।स्वैः ष एवै॑र्मुमुर॒त्पोष्यं॑ र॒यिं स॑नु॒तर्धे॑हि॒ तं तत॑:॥

ya indra sastyavrato'nuṣvāpamadevayuḥ |svaiḥ ṣa evairmumuratpoṣyaṃ rayiṃ sanutardhehi taṃ tata: ||

यच्छ॒क्रासि॑ परा॒वति॒ यद॑र्वा॒वति॑ वृत्रहन् ।अत॑स्त्वा गी॒र्भिर्द्यु॒गदि॑न्द्र के॒शिभि॑: सु॒तावाँ॒ आ वि॑वासति॥

yacchakrāsi parāvati yadarvāvati vṛtrahan |atastvā gīrbhirdyugadindra keśibhi: sutāvām̐ ā vivāsati ||

यद्वासि॑ रोच॒ने दि॒वः स॑मु॒द्रस्याधि॑ वि॒ष्टपि॑ ।यत्पार्थि॑वे॒ सद॑ने वृत्रहन्तम॒ यद॒न्तरि॑क्ष॒ आ ग॑हि॥

yadvāsi rocane divaḥ samudrasyādhi viṣṭapi |yatpārthive sadane vṛtrahantama yadantarikṣa ā gahi ||

स न॒: सोमे॑षु सोमपाः सु॒तेषु॑ शवसस्पते ।मा॒दय॑स्व॒ राध॑सा सू॒नृता॑व॒तेन्द्र॑ रा॒या परी॑णसा॥

sa na: someṣu somapāḥ suteṣu śavasaspate |mādayasva rādhasā sūnṛtāvatendra rāyā parīṇasā ||

मा न॑ इन्द्र॒ परा॑ वृण॒ग्भवा॑ नः सध॒माद्य॑: ।त्वं न॑ ऊ॒ती त्वमिन्न॒ आप्यं॒ मा न॑ इन्द्र॒ परा॑ वृणक्॥

mā na indra parā vṛṇagbhavā naḥ sadhamādya: |tvaṃ na ūtī tvaminna āpyaṃ mā na indra parā vṛṇak ||

अ॒स्मे इ॑न्द्र॒ सचा॑ सु॒ते नि ष॑दा पी॒तये॒ मधु॑ ।कृ॒धी ज॑रि॒त्रे म॑घव॒न्नवो॑ म॒हद॒स्मे इ॑न्द्र॒ सचा॑ सु॒ते॥

asme indra sacā sute ni ṣadā pītaye madhu |kṛdhī jaritre maghavannavo mahadasme indra sacā sute ||

न त्वा॑ दे॒वास॑ आशत॒ न मर्त्या॑सो अद्रिवः ।विश्वा॑ जा॒तानि॒ शव॑साभि॒भूर॑सि॒ न त्वा॑ दे॒वास॑ आशत॥

na tvā devāsa āśata na martyāso adrivaḥ |viśvā jātāni śavasābhibhūrasi na tvā devāsa āśata ||

विश्वा॒: पृत॑ना अभि॒भूत॑रं॒ नरं॑ स॒जूस्त॑तक्षु॒रिन्द्रं॑ जज॒नुश्च॑ रा॒जसे॑ ।क्रत्वा॒ वरि॑ष्ठं॒ वर॑ आ॒मुरि॑मु॒तोग्रमोजि॑ष्ठं त॒वसं॑ तर॒स्विन॑म्॥

viśvā: pṛtanā abhibhūtaraṃ naraṃ sajūstatakṣurindraṃ jajanuśca rājase |kratvā variṣṭhaṃ vara āmurimutogramojiṣṭhaṃ tavasaṃ tarasvinam ||

समीं॑ रे॒भासो॑ अस्वर॒न्निन्द्रं॒ सोम॑स्य पी॒तये॑ ।स्व॑र्पतिं॒ यदीं॑ वृ॒धे धृ॒तव्र॑तो॒ ह्योज॑सा॒ समू॒तिभि॑:॥

samīṃ rebhāso asvarannindraṃ somasya pītaye |svarpatiṃ yadīṃ vṛdhe dhṛtavrato hyojasā samūtibhi: ||

ने॒मिं न॑मन्ति॒ चक्ष॑सा मे॒षं विप्रा॑ अभि॒स्वरा॑ ।सु॒दी॒तयो॑ वो अ॒द्रुहोऽपि॒ कर्णे॑ तर॒स्विन॒: समृक्व॑भिः॥

nemiṃ namanti cakṣasā meṣaṃ viprā abhisvarā |sudītayo vo adruho'pi karṇe tarasvina: samṛkvabhiḥ ||

तमिन्द्रं॑ जोहवीमि म॒घवा॑नमु॒ग्रं स॒त्रा दधा॑न॒मप्र॑तिष्कुतं॒ शवां॑सि ।मंहि॑ष्ठो गी॒र्भिरा च॑ य॒ज्ञियो॑ व॒वर्त॑द्रा॒ये नो॒ विश्वा॑ सु॒पथा॑ कृणोतु व॒ज्री॥

tamindraṃ johavīmi maghavānamugraṃ satrā dadhānamapratiṣkutaṃ śavāṃsi |maṃhiṣṭho gīrbhirā ca yajñiyo vavartadrāye no viśvā supathā kṛṇotu vajrī ||

त्वं पुर॑ इन्द्र चि॒किदे॑ना॒ व्योज॑सा शविष्ठ शक्र नाश॒यध्यै॑ ।त्वद्विश्वा॑नि॒ भुव॑नानि वज्रि॒न्द्यावा॑ रेजेते पृथि॒वी च॑ भी॒षा॥

tvaṃ pura indra cikidenā vyojasā śaviṣṭha śakra nāśayadhyai |tvadviśvāni bhuvanāni vajrindyāvā rejete pṛthivī ca bhīṣā ||

तन्म॑ ऋ॒तमि॑न्द्र शूर चित्र पात्व॒पो न व॑ज्रिन्दुरि॒ताति॑ पर्षि॒ भूरि॑ ।क॒दा न॑ इन्द्र रा॒य आ द॑शस्येर्वि॒श्वप्स्न्य॑स्य स्पृह॒याय्य॑स्य राजन्॥

tanma ṛtamindra śūra citra pātvapo na vajrinduritāti parṣi bhūri |kadā na indra rāya ā daśasyerviśvapsnyasya spṛhayāyyasya rājan ||