Mandala.Sukta 9.110

त्र्यरुणस्त्रैवृष्ण:,त्रसदस्यु: पौरुकुत्स्य: । पवमान: सोम: ।१-३ पिपीलिकमध्या अनुष्टुप् , ४-९ ऊर्ध्वबृहती,१०-१२ विराट् । · tryaruṇastraivṛṣṇa:,trasadasyu: paurukutsya: | pavamāna: soma: |1-3 pipīlikamadhyā anuṣṭup , 4-9 ūrdhvabṛhatī,10-12 virāṭ |

पर्यू॒ षु प्र ध॑न्व॒ वाज॑सातये॒ परि॑ वृ॒त्राणि॑ स॒क्षणि॑: ।द्वि॒षस्त॒रध्या॑ ऋण॒या न॑ ईयसे॥

paryū ṣu pra dhanva vājasātaye pari vṛtrāṇi sakṣaṇi: |dviṣastaradhyā ṛṇayā na īyase ||

अनु॒ हि त्वा॑ सु॒तं सो॑म॒ मदा॑मसि म॒हे स॑मर्य॒राज्ये॑ ।वाजाँ॑ अ॒भि प॑वमान॒ प्र गा॑हसे॥

anu hi tvā sutaṃ soma madāmasi mahe samaryarājye |vājām̐ abhi pavamāna pra gāhase ||

अजी॑जनो॒ हि प॑वमान॒ सूर्यं॑ वि॒धारे॒ शक्म॑ना॒ पय॑: ।गोजी॑रया॒ रंह॑माण॒: पुरं॑ध्या॥

ajījano hi pavamāna sūryaṃ vidhāre śakmanā paya: |gojīrayā raṃhamāṇa: puraṃdhyā ||

अजी॑जनो अमृत॒ मर्त्ये॒ष्वाँ ऋ॒तस्य॒ धर्म॑न्न॒मृत॑स्य॒ चारु॑णः ।सदा॑सरो॒ वाज॒मच्छा॒ सनि॑ष्यदत्॥

ajījano amṛta martyeṣvām̐ ṛtasya dharmannamṛtasya cāruṇaḥ |sadāsaro vājamacchā saniṣyadat ||

अ॒भ्य॑भि॒ हि श्रव॑सा त॒तर्दि॒थोत्सं॒ न कं चि॑ज्जन॒पान॒मक्षि॑तम् ।शर्या॑भि॒र्न भर॑माणो॒ गभ॑स्त्योः॥

abhyabhi hi śravasā tatardithotsaṃ na kaṃ cijjanapānamakṣitam |śaryābhirna bharamāṇo gabhastyoḥ ||

आदीं॒ के चि॒त्पश्य॑मानास॒ आप्यं॑ वसु॒रुचो॑ दि॒व्या अ॒भ्य॑नूषत ।वारं॒ न दे॒वः स॑वि॒ता व्यू॑र्णुते॥

ādīṃ ke citpaśyamānāsa āpyaṃ vasuruco divyā abhyanūṣata |vāraṃ na devaḥ savitā vyūrṇute ||

त्वे सो॑म प्रथ॒मा वृ॒क्तब॑र्हिषो म॒हे वाजा॑य॒ श्रव॑से॒ धियं॑ दधुः ।स त्वं नो॑ वीर वी॒र्या॑य चोदय॥

tve soma prathamā vṛktabarhiṣo mahe vājāya śravase dhiyaṃ dadhuḥ |sa tvaṃ no vīra vīryāya codaya ||

दि॒वः पी॒यूषं॑ पू॒र्व्यं यदु॒क्थ्यं॑ म॒हो गा॒हाद्दि॒व आ निर॑धुक्षत ।इन्द्र॑म॒भि जाय॑मानं॒ सम॑स्वरन्॥

divaḥ pīyūṣaṃ pūrvyaṃ yadukthyaṃ maho gāhāddiva ā niradhukṣata |indramabhi jāyamānaṃ samasvaran ||

अध॒ यदि॒मे प॑वमान॒ रोद॑सी इ॒मा च॒ विश्वा॒ भुव॑ना॒भि म॒ज्मना॑ ।यू॒थे न नि॒:ष्ठा वृ॑ष॒भो वि ति॑ष्ठसे॥

adha yadime pavamāna rodasī imā ca viśvā bhuvanābhi majmanā |yūthe na ni:ṣṭhā vṛṣabho vi tiṣṭhase ||

सोम॑: पुना॒नो अ॒व्यये॒ वारे॒ शिशु॒र्न क्रीळ॒न्पव॑मानो अक्षाः ।स॒हस्र॑धारः श॒तवा॑ज॒ इन्दु॑:॥

soma: punāno avyaye vāre śiśurna krīḷanpavamāno akṣāḥ |sahasradhāraḥ śatavāja indu: ||

ए॒ष पु॑ना॒नो मधु॑माँ ऋ॒तावेन्द्रा॒येन्दु॑: पवते स्वा॒दुरू॒र्मिः ।वा॒ज॒सनि॑र्वरिवो॒विद्व॑यो॒धाः॥

eṣa punāno madhumām̐ ṛtāvendrāyendu: pavate svādurūrmiḥ |vājasanirvarivovidvayodhāḥ ||

स प॑वस्व॒ सह॑मानः पृत॒न्यून्त्सेध॒न्रक्षां॒स्यप॑ दु॒र्गहा॑णि ।स्वा॒यु॒धः सा॑स॒ह्वान्त्सो॑म॒ शत्रू॑न्॥

sa pavasva sahamānaḥ pṛtanyūntsedhanrakṣāṃsyapa durgahāṇi |svāyudhaḥ sāsahvāntsoma śatrūn ||