Mandala.Sukta 9.22

काश्यपोऽसितो देवलो वा । पवमान: सोम: । गायत्री । · kāśyapo'sito devalo vā | pavamāna: soma: | gāyatrī |

ए॒ते सोमा॑स आ॒शवो॒ रथा॑ इव॒ प्र वा॒जिन॑: ।सर्गा॑: सृ॒ष्टा अ॑हेषत॥

ete somāsa āśavo rathā iva pra vājina: |sargā: sṛṣṭā aheṣata ||

ए॒ते वाता॑ इवो॒रव॑: प॒र्जन्य॑स्येव वृ॒ष्टय॑: ।अ॒ग्नेरि॑व भ्र॒मा वृथा॑॥

ete vātā ivorava: parjanyasyeva vṛṣṭaya: |agneriva bhramā vṛthā ||

ए॒ते पू॒ता वि॑प॒श्चित॒: सोमा॑सो॒ दध्या॑शिरः ।वि॒पा व्या॑नशु॒र्धिय॑:॥

ete pūtā vipaścita: somāso dadhyāśiraḥ |vipā vyānaśurdhiya: ||

ए॒ते मृ॒ष्टा अम॑र्त्याः ससृ॒वांसो॒ न श॑श्रमुः ।इय॑क्षन्तः प॒थो रज॑:॥

ete mṛṣṭā amartyāḥ sasṛvāṃso na śaśramuḥ |iyakṣantaḥ patho raja: ||

ए॒ते पृ॒ष्ठानि॒ रोद॑सोर्विप्र॒यन्तो॒ व्या॑नशुः ।उ॒तेदमु॑त्त॒मं रज॑:॥

ete pṛṣṭhāni rodasorviprayanto vyānaśuḥ |utedamuttamaṃ raja: ||

तन्तुं॑ तन्वा॒नमु॑त्त॒ममनु॑ प्र॒वत॑ आशत ।उ॒तेदमु॑त्त॒माय्य॑म्॥

tantuṃ tanvānamuttamamanu pravata āśata |utedamuttamāyyam ||

त्वं सो॑म प॒णिभ्य॒ आ वसु॒ गव्या॑नि धारयः ।त॒तं तन्तु॑मचिक्रदः॥

tvaṃ soma paṇibhya ā vasu gavyāni dhārayaḥ |tataṃ tantumacikradaḥ ||