Mandala.Sukta 9.40

बृहन्मतिराङ्गिरस: । पवमान: सोम: । गायत्री । · bṛhanmatirāṅgirasa: | pavamāna: soma: | gāyatrī |

पु॒ना॒नो अ॑क्रमीद॒भि विश्वा॒ मृधो॒ विच॑र्षणिः ।शु॒म्भन्ति॒ विप्रं॑ धी॒तिभि॑:॥

punāno akramīdabhi viśvā mṛdho vicarṣaṇiḥ |śumbhanti vipraṃ dhītibhi: ||

आ योनि॑मरु॒णो रु॑ह॒द्गम॒दिन्द्रं॒ वृषा॑ सु॒तः ।ध्रु॒वे सद॑सि सीदति॥

ā yonimaruṇo ruhadgamadindraṃ vṛṣā sutaḥ |dhruve sadasi sīdati ||

नू नो॑ र॒यिं म॒हामि॑न्दो॒ऽस्मभ्यं॑ सोम वि॒श्वत॑: ।आ प॑वस्व सह॒स्रिण॑म्॥

nū no rayiṃ mahāmindo'smabhyaṃ soma viśvata: |ā pavasva sahasriṇam ||

विश्वा॑ सोम पवमान द्यु॒म्नानी॑न्द॒वा भ॑र ।वि॒दाः स॑ह॒स्रिणी॒रिष॑:॥

viśvā soma pavamāna dyumnānīndavā bhara |vidāḥ sahasriṇīriṣa: ||

स न॑: पुना॒न आ भ॑र र॒यिं स्तो॒त्रे सु॒वीर्य॑म् ।ज॒रि॒तुर्व॑र्धया॒ गिर॑:॥

sa na: punāna ā bhara rayiṃ stotre suvīryam |jariturvardhayā gira: ||

पु॒ना॒न इ॑न्द॒वा भ॑र॒ सोम॑ द्वि॒बर्ह॑सं र॒यिम् ।वृष॑न्निन्दो न उ॒क्थ्य॑म्॥

punāna indavā bhara soma dvibarhasaṃ rayim |vṛṣannindo na ukthyam ||