Mandala.Sukta 9.6

काश्यपोऽसितो देवलो वा । पवमान: सोम: । गायत्री । · kāśyapo'sito devalo vā | pavamāna: soma: | gāyatrī |

म॒न्द्रया॑ सोम॒ धार॑या॒ वृषा॑ पवस्व देव॒युः ।अव्यो॒ वारे॑ष्वस्म॒युः॥

mandrayā soma dhārayā vṛṣā pavasva devayuḥ |avyo vāreṣvasmayuḥ ||

अ॒भि त्यं मद्यं॒ मद॒मिन्द॒विन्द्र॒ इति॑ क्षर ।अ॒भि वा॒जिनो॒ अर्व॑तः॥

abhi tyaṃ madyaṃ madamindavindra iti kṣara |abhi vājino arvataḥ ||

अ॒भि त्यं पू॒र्व्यं मदं॑ सुवा॒नो अ॑र्ष प॒वित्र॒ आ ।अ॒भि वाज॑मु॒त श्रव॑:॥

abhi tyaṃ pūrvyaṃ madaṃ suvāno arṣa pavitra ā |abhi vājamuta śrava: ||

अनु॑ द्र॒प्सास॒ इन्द॑व॒ आपो॒ न प्र॒वता॑सरन् ।पु॒ना॒ना इन्द्र॑माशत॥

anu drapsāsa indava āpo na pravatāsaran |punānā indramāśata ||

यमत्य॑मिव वा॒जिनं॑ मृ॒जन्ति॒ योष॑णो॒ दश॑ ।वने॒ क्रीळ॑न्त॒मत्य॑विम्॥

yamatyamiva vājinaṃ mṛjanti yoṣaṇo daśa |vane krīḷantamatyavim ||

तं गोभि॒र्वृष॑णं॒ रसं॒ मदा॑य दे॒ववी॑तये ।सु॒तं भरा॑य॒ सं सृ॑ज॥

taṃ gobhirvṛṣaṇaṃ rasaṃ madāya devavītaye |sutaṃ bharāya saṃ sṛja ||

दे॒वो दे॒वाय॒ धार॒येन्द्रा॑य पवते सु॒तः ।पयो॒ यद॑स्य पी॒पय॑त्॥

devo devāya dhārayendrāya pavate sutaḥ |payo yadasya pīpayat ||

आ॒त्मा य॒ज्ञस्य॒ रंह्या॑ सुष्वा॒णः प॑वते सु॒तः ।प्र॒त्नं नि पा॑ति॒ काव्य॑म्॥

ātmā yajñasya raṃhyā suṣvāṇaḥ pavate sutaḥ |pratnaṃ ni pāti kāvyam ||

ए॒वा पु॑ना॒न इ॑न्द्र॒युर्मदं॑ मदिष्ठ वी॒तये॑ ।गुहा॑ चिद्दधिषे॒ गिर॑:॥

evā punāna indrayurmadaṃ madiṣṭha vītaye |guhā ciddadhiṣe gira: ||