Mandala.Sukta 9.61

अमहीयुराङ्गिरस: । पवमान: सोम: । गायत्री । · amahīyurāṅgirasa: | pavamāna: soma: | gāyatrī |

अ॒या वी॒ती परि॑ स्रव॒ यस्त॑ इन्दो॒ मदे॒ष्वा ।अ॒वाह॑न्नव॒तीर्नव॑॥

ayā vītī pari srava yasta indo madeṣvā |avāhannavatīrnava ||

पुर॑: स॒द्य इ॒त्थाधि॑ये॒ दिवो॑दासाय॒ शम्ब॑रम् ।अध॒ त्यं तु॒र्वशं॒ यदु॑म्॥

pura: sadya itthādhiye divodāsāya śambaram |adha tyaṃ turvaśaṃ yadum ||

परि॑ णो॒ अश्व॑मश्व॒विद्गोम॑दिन्दो॒ हिर॑ण्यवत् ।क्षरा॑ सह॒स्रिणी॒रिष॑:॥

pari ṇo aśvamaśvavidgomadindo hiraṇyavat |kṣarā sahasriṇīriṣa: ||

पव॑मानस्य ते व॒यं प॒वित्र॑मभ्युन्द॒तः ।स॒खि॒त्वमा वृ॑णीमहे॥

pavamānasya te vayaṃ pavitramabhyundataḥ |sakhitvamā vṛṇīmahe ||

ये ते॑ प॒वित्र॑मू॒र्मयो॑ऽभि॒क्षर॑न्ति॒ धार॑या ।तेभि॑र्नः सोम मृळय॥

ye te pavitramūrmayo'bhikṣaranti dhārayā |tebhirnaḥ soma mṛḷaya ||

स न॑: पुना॒न आ भ॑र र॒यिं वी॒रव॑ती॒मिष॑म् ।ईशा॑नः सोम वि॒श्वत॑:॥

sa na: punāna ā bhara rayiṃ vīravatīmiṣam |īśānaḥ soma viśvata: ||

ए॒तमु॒ त्यं दश॒ क्षिपो॑ मृ॒जन्ति॒ सिन्धु॑मातरम् ।समा॑दि॒त्येभि॑रख्यत॥

etamu tyaṃ daśa kṣipo mṛjanti sindhumātaram |samādityebhirakhyata ||

समिन्द्रे॑णो॒त वा॒युना॑ सु॒त ए॑ति प॒वित्र॒ आ ।सं सूर्य॑स्य र॒श्मिभि॑:॥

samindreṇota vāyunā suta eti pavitra ā |saṃ sūryasya raśmibhi: ||

स नो॒ भगा॑य वा॒यवे॑ पू॒ष्णे प॑वस्व॒ मधु॑मान् ।चारु॑र्मि॒त्रे वरु॑णे च॥

sa no bhagāya vāyave pūṣṇe pavasva madhumān |cārurmitre varuṇe ca ||

उ॒च्चा ते॑ जा॒तमन्ध॑सो दि॒वि षद्भूम्या द॑दे ।उ॒ग्रं शर्म॒ महि॒ श्रव॑:॥

uccā te jātamandhaso divi ṣadbhūmyā dade |ugraṃ śarma mahi śrava: ||

ए॒ना विश्वा॑न्य॒र्य आ द्यु॒म्नानि॒ मानु॑षाणाम् ।सिषा॑सन्तो वनामहे॥

enā viśvānyarya ā dyumnāni mānuṣāṇām |siṣāsanto vanāmahe ||

स न॒ इन्द्रा॑य॒ यज्य॑वे॒ वरु॑णाय म॒रुद्भ्य॑: ।व॒रि॒वो॒वित्परि॑ स्रव॥

sa na indrāya yajyave varuṇāya marudbhya: |varivovitpari srava ||

उपो॒ षु जा॒तम॒प्तुरं॒ गोभि॑र्भ॒ङ्गं परि॑ष्कृतम् ।इन्दुं॑ दे॒वा अ॑यासिषुः॥

upo ṣu jātamapturaṃ gobhirbhaṅgaṃ pariṣkṛtam |induṃ devā ayāsiṣuḥ ||

तमिद्व॑र्धन्तु नो॒ गिरो॑ व॒त्सं सं॒शिश्व॑रीरिव ।य इन्द्र॑स्य हृदं॒सनि॑:॥

tamidvardhantu no giro vatsaṃ saṃśiśvarīriva |ya indrasya hṛdaṃsani: ||

अर्षा॑ णः सोम॒ शं गवे॑ धु॒क्षस्व॑ पि॒प्युषी॒मिष॑म् ।वर्धा॑ समु॒द्रमु॒क्थ्य॑म्॥

arṣā ṇaḥ soma śaṃ gave dhukṣasva pipyuṣīmiṣam |vardhā samudramukthyam ||

पव॑मानो अजीजनद्दि॒वश्चि॒त्रं न त॑न्य॒तुम् ।ज्योति॑र्वैश्वान॒रं बृ॒हत्॥

pavamāno ajījanaddivaścitraṃ na tanyatum |jyotirvaiśvānaraṃ bṛhat ||

पव॑मानस्य ते॒ रसो॒ मदो॑ राजन्नदुच्छु॒नः ।वि वार॒मव्य॑मर्षति॥

pavamānasya te raso mado rājannaducchunaḥ |vi vāramavyamarṣati ||

पव॑मान॒ रस॒स्तव॒ दक्षो॒ वि रा॑जति द्यु॒मान् ।ज्योति॒र्विश्वं॒ स्व॑र्दृ॒शे॥

pavamāna rasastava dakṣo vi rājati dyumān |jyotirviśvaṃ svardṛśe ||

यस्ते॒ मदो॒ वरे॑ण्य॒स्तेना॑ पव॒स्वान्ध॑सा ।दे॒वा॒वीर॑घशंस॒हा॥

yaste mado vareṇyastenā pavasvāndhasā |devāvīraghaśaṃsahā ||

जघ्नि॑र्वृ॒त्रम॑मि॒त्रियं॒ सस्नि॒र्वाजं॑ दि॒वेदि॑वे ।गो॒षा उ॑ अश्व॒सा अ॑सि॥

jaghnirvṛtramamitriyaṃ sasnirvājaṃ divedive |goṣā u aśvasā asi ||

सम्मि॑श्लो अरु॒षो भ॑व सूप॒स्थाभि॒र्न धे॒नुभि॑: ।सीद॑ञ्छ्ये॒नो न योनि॒मा॥

sammiślo aruṣo bhava sūpasthābhirna dhenubhi: |sīdañchyeno na yonimā ||

स प॑वस्व॒ य आवि॒थेन्द्रं॑ वृ॒त्राय॒ हन्त॑वे ।व॒व्रि॒वांसं॑ म॒हीर॒पः॥

sa pavasva ya āvithendraṃ vṛtrāya hantave |vavrivāṃsaṃ mahīrapaḥ ||

सु॒वीरा॑सो व॒यं धना॒ जये॑म सोम मीढ्वः ।पु॒ना॒नो व॑र्ध नो॒ गिर॑:॥

suvīrāso vayaṃ dhanā jayema soma mīḍhvaḥ |punāno vardha no gira: ||

त्वोता॑स॒स्तवाव॑सा॒ स्याम॑ व॒न्वन्त॑ आ॒मुर॑: ।सोम॑ व्र॒तेषु॑ जागृहि॥

tvotāsastavāvasā syāma vanvanta āmura: |soma vrateṣu jāgṛhi ||

अ॒प॒घ्नन्प॑वते॒ मृधोऽप॒ सोमो॒ अरा॑व्णः ।गच्छ॒न्निन्द्र॑स्य निष्कृ॒तम्॥

apaghnanpavate mṛdho'pa somo arāvṇaḥ |gacchannindrasya niṣkṛtam ||

म॒हो नो॑ रा॒य आ भ॑र॒ पव॑मान ज॒ही मृध॑: ।रास्वे॑न्दो वी॒रव॒द्यश॑:॥

maho no rāya ā bhara pavamāna jahī mṛdha: |rāsvendo vīravadyaśa: ||

न त्वा॑ श॒तं च॒न ह्रुतो॒ राधो॒ दित्स॑न्त॒मा मि॑नन् ।यत्पु॑ना॒नो म॑ख॒स्यसे॑॥

na tvā śataṃ cana hruto rādho ditsantamā minan |yatpunāno makhasyase ||

पव॑स्वेन्दो॒ वृषा॑ सु॒तः कृ॒धी नो॑ य॒शसो॒ जने॑ ।विश्वा॒ अप॒ द्विषो॑ जहि॥

pavasvendo vṛṣā sutaḥ kṛdhī no yaśaso jane |viśvā apa dviṣo jahi ||

अस्य॑ ते स॒ख्ये व॒यं तवे॑न्दो द्यु॒म्न उ॑त्त॒मे ।सा॒स॒ह्याम॑ पृतन्य॒तः॥

asya te sakhye vayaṃ tavendo dyumna uttame |sāsahyāma pṛtanyataḥ ||

या ते॑ भी॒मान्यायु॑धा ति॒ग्मानि॒ सन्ति॒ धूर्व॑णे ।रक्षा॑ समस्य नो नि॒दः॥

yā te bhīmānyāyudhā tigmāni santi dhūrvaṇe |rakṣā samasya no nidaḥ ||