Mandala.Sukta 9.63

निध्रुवि: काश्यपः । पवमान: सोम: । गायत्री । · nidhruvi: kāśyapaḥ | pavamāna: soma: | gāyatrī |

आ प॑वस्व सह॒स्रिणं॑ र॒यिं सो॑म सु॒वीर्य॑म् ।अ॒स्मे श्रवां॑सि धारय॥

ā pavasva sahasriṇaṃ rayiṃ soma suvīryam |asme śravāṃsi dhāraya ||

इष॒मूर्जं॑ च पिन्वस॒ इन्द्रा॑य मत्स॒रिन्त॑मः ।च॒मूष्वा नि षी॑दसि॥

iṣamūrjaṃ ca pinvasa indrāya matsarintamaḥ |camūṣvā ni ṣīdasi ||

सु॒त इन्द्रा॑य॒ विष्ण॑वे॒ सोम॑: क॒लशे॑ अक्षरत् ।मधु॑माँ अस्तु वा॒यवे॑॥

suta indrāya viṣṇave soma: kalaśe akṣarat |madhumām̐ astu vāyave ||

ए॒ते अ॑सृग्रमा॒शवोऽति॒ ह्वरां॑सि ब॒भ्रव॑: ।सोमा॑ ऋ॒तस्य॒ धार॑या॥

ete asṛgramāśavo'ti hvarāṃsi babhrava: |somā ṛtasya dhārayā ||

इन्द्रं॒ वर्ध॑न्तो अ॒प्तुर॑: कृ॒ण्वन्तो॒ विश्व॒मार्य॑म् ।अ॒प॒घ्नन्तो॒ अरा॑व्णः॥

indraṃ vardhanto aptura: kṛṇvanto viśvamāryam |apaghnanto arāvṇaḥ ||

सु॒ता अनु॒ स्वमा रजो॒ऽभ्य॑र्षन्ति ब॒भ्रव॑: ।इन्द्रं॒ गच्छ॑न्त॒ इन्द॑वः॥

sutā anu svamā rajo'bhyarṣanti babhrava: |indraṃ gacchanta indavaḥ ||

अ॒या प॑वस्व॒ धार॑या॒ यया॒ सूर्य॒मरो॑चयः ।हि॒न्वा॒नो मानु॑षीर॒पः॥

ayā pavasva dhārayā yayā sūryamarocayaḥ |hinvāno mānuṣīrapaḥ ||

अयु॑क्त॒ सूर॒ एत॑शं॒ पव॑मानो म॒नावधि॑ ।अ॒न्तरि॑क्षेण॒ यात॑वे॥

ayukta sūra etaśaṃ pavamāno manāvadhi |antarikṣeṇa yātave ||

उ॒त त्या ह॒रितो॒ दश॒ सूरो॑ अयुक्त॒ यात॑वे ।इन्दु॒रिन्द्र॒ इति॑ ब्रु॒वन्॥

uta tyā harito daśa sūro ayukta yātave |indurindra iti bruvan ||

परी॒तो वा॒यवे॑ सु॒तं गिर॒ इन्द्रा॑य मत्स॒रम् ।अव्यो॒ वारे॑षु सिञ्चत॥

parīto vāyave sutaṃ gira indrāya matsaram |avyo vāreṣu siñcata ||

पव॑मान वि॒दा र॒यिम॒स्मभ्यं॑ सोम दु॒ष्टर॑म् ।यो दू॒णाशो॑ वनुष्य॒ता॥

pavamāna vidā rayimasmabhyaṃ soma duṣṭaram |yo dūṇāśo vanuṣyatā ||

अ॒भ्य॑र्ष सह॒स्रिणं॑ र॒यिं गोम॑न्तम॒श्विन॑म् ।अ॒भि वाज॑मु॒त श्रव॑:॥

abhyarṣa sahasriṇaṃ rayiṃ gomantamaśvinam |abhi vājamuta śrava: ||

सोमो॑ दे॒वो न सूर्योऽद्रि॑भिः पवते सु॒तः ।दधा॑नः क॒लशे॒ रस॑म्॥

somo devo na sūryo'dribhiḥ pavate sutaḥ |dadhānaḥ kalaśe rasam ||

ए॒ते धामा॒न्यार्या॑ शु॒क्रा ऋ॒तस्य॒ धार॑या ।वाजं॒ गोम॑न्तमक्षरन्॥

ete dhāmānyāryā śukrā ṛtasya dhārayā |vājaṃ gomantamakṣaran ||

सु॒ता इन्द्रा॑य व॒ज्रिणे॒ सोमा॑सो॒ दध्या॑शिरः ।प॒वित्र॒मत्य॑क्षरन्॥

sutā indrāya vajriṇe somāso dadhyāśiraḥ |pavitramatyakṣaran ||

प्र सो॑म॒ मधु॑मत्तमो रा॒ये अ॑र्ष प॒वित्र॒ आ ।मदो॒ यो दे॑व॒वीत॑मः॥

pra soma madhumattamo rāye arṣa pavitra ā |mado yo devavītamaḥ ||

तमी॑ मृजन्त्या॒यवो॒ हरिं॑ न॒दीषु॑ वा॒जिन॑म् ।इन्दु॒मिन्द्रा॑य मत्स॒रम्॥

tamī mṛjantyāyavo hariṃ nadīṣu vājinam |indumindrāya matsaram ||

आ प॑वस्व॒ हिर॑ण्यव॒दश्वा॑वत्सोम वी॒रव॑त् ।वाजं॒ गोम॑न्त॒मा भ॑र॥

ā pavasva hiraṇyavadaśvāvatsoma vīravat |vājaṃ gomantamā bhara ||

परि॒ वाजे॒ न वा॑ज॒युमव्यो॒ वारे॑षु सिञ्चत ।इन्द्रा॑य॒ मधु॑मत्तमम्॥

pari vāje na vājayumavyo vāreṣu siñcata |indrāya madhumattamam ||

क॒विं मृ॑जन्ति॒ मर्ज्यं॑ धी॒भिर्विप्रा॑ अव॒स्यव॑: ।वृषा॒ कनि॑क्रदर्षति॥

kaviṃ mṛjanti marjyaṃ dhībhirviprā avasyava: |vṛṣā kanikradarṣati ||

वृष॑णं धी॒भिर॒प्तुरं॒ सोम॑मृ॒तस्य॒ धार॑या ।म॒ती विप्रा॒: सम॑स्वरन्॥

vṛṣaṇaṃ dhībhirapturaṃ somamṛtasya dhārayā |matī viprā: samasvaran ||

पव॑स्व देवायु॒षगिन्द्रं॑ गच्छतु ते॒ मद॑: ।वा॒युमा रो॑ह॒ धर्म॑णा॥

pavasva devāyuṣagindraṃ gacchatu te mada: |vāyumā roha dharmaṇā ||

पव॑मान॒ नि तो॑शसे र॒यिं सो॑म श्र॒वाय्य॑म् ।प्रि॒यः स॑मु॒द्रमा वि॑श॥

pavamāna ni tośase rayiṃ soma śravāyyam |priyaḥ samudramā viśa ||

अ॒प॒घ्नन्प॑वसे॒ मृध॑: क्रतु॒वित्सो॑म मत्स॒रः ।नु॒दस्वादे॑वयुं॒ जन॑म्॥

apaghnanpavase mṛdha: kratuvitsoma matsaraḥ |nudasvādevayuṃ janam ||

पव॑माना असृक्षत॒ सोमा॑: शु॒क्रास॒ इन्द॑वः ।अ॒भि विश्वा॑नि॒ काव्या॑॥

pavamānā asṛkṣata somā: śukrāsa indavaḥ |abhi viśvāni kāvyā ||

पव॑मानास आ॒शव॑: शु॒भ्रा अ॑सृग्र॒मिन्द॑वः ।घ्नन्तो॒ विश्वा॒ अप॒ द्विष॑:॥

pavamānāsa āśava: śubhrā asṛgramindavaḥ |ghnanto viśvā apa dviṣa: ||

पव॑माना दि॒वस्पर्य॒न्तरि॑क्षादसृक्षत ।पृ॒थि॒व्या अधि॒ सान॑वि॥

pavamānā divasparyantarikṣādasṛkṣata |pṛthivyā adhi sānavi ||

पु॒ना॒नः सो॑म॒ धार॒येन्दो॒ विश्वा॒ अप॒ स्रिध॑: ।ज॒हि रक्षां॑सि सुक्रतो॥

punānaḥ soma dhārayendo viśvā apa sridha: |jahi rakṣāṃsi sukrato ||

अ॒प॒घ्नन्त्सो॑म र॒क्षसो॒ऽभ्य॑र्ष॒ कनि॑क्रदत् ।द्यु॒मन्तं॒ शुष्म॑मुत्त॒मम्॥

apaghnantsoma rakṣaso'bhyarṣa kanikradat |dyumantaṃ śuṣmamuttamam ||

अ॒स्मे वसू॑नि धारय॒ सोम॑ दि॒व्यानि॒ पार्थि॑वा ।इन्दो॒ विश्वा॑नि॒ वार्या॑॥

asme vasūni dhāraya soma divyāni pārthivā |indo viśvāni vāryā ||