Mandala.Sukta 9.96

दैवोदासि: प्रतर्दन: । पवमान: सोम: । त्रिष्टुप् । · daivodāsi: pratardana: | pavamāna: soma: | triṣṭup |

प्र से॑ना॒नीः शूरो॒ अग्रे॒ रथा॑नां ग॒व्यन्ने॑ति॒ हर्ष॑ते अस्य॒ सेना॑ ।भ॒द्रान्कृ॒ण्वन्नि॑न्द्रह॒वान्त्सखि॑भ्य॒ आ सोमो॒ वस्त्रा॑ रभ॒सानि॑ दत्ते॥

pra senānīḥ śūro agre rathānāṃ gavyanneti harṣate asya senā |bhadrānkṛṇvannindrahavāntsakhibhya ā somo vastrā rabhasāni datte ||

सम॑स्य॒ हरिं॒ हर॑यो मृजन्त्यश्वह॒यैरनि॑शितं॒ नमो॑भिः ।आ ति॑ष्ठति॒ रथ॒मिन्द्र॑स्य॒ सखा॑ वि॒द्वाँ ए॑ना सुम॒तिं या॒त्यच्छ॑॥

samasya hariṃ harayo mṛjantyaśvahayairaniśitaṃ namobhiḥ |ā tiṣṭhati rathamindrasya sakhā vidvām̐ enā sumatiṃ yātyaccha ||

स नो॑ देव दे॒वता॑ते पवस्व म॒हे सो॑म॒ प्सर॑स इन्द्र॒पान॑: ।कृ॒ण्वन्न॒पो व॒र्षय॒न्द्यामु॒तेमामु॒रोरा नो॑ वरिवस्या पुना॒नः॥

sa no deva devatāte pavasva mahe soma psarasa indrapāna: |kṛṇvannapo varṣayandyāmutemāmurorā no varivasyā punānaḥ ||

अजी॑त॒येऽह॑तये पवस्व स्व॒स्तये॑ स॒र्वता॑तये बृह॒ते ।तदु॑शन्ति॒ विश्व॑ इ॒मे सखा॑य॒स्तद॒हं व॑श्मि पवमान सोम॥

ajītaye'hataye pavasva svastaye sarvatātaye bṛhate |taduśanti viśva ime sakhāyastadahaṃ vaśmi pavamāna soma ||

सोम॑: पवते जनि॒ता म॑ती॒नां ज॑नि॒ता दि॒वो ज॑नि॒ता पृ॑थि॒व्याः ।ज॒नि॒ताग्नेर्ज॑नि॒ता सूर्य॑स्य जनि॒तेन्द्र॑स्य जनि॒तोत विष्णो॑:॥

soma: pavate janitā matīnāṃ janitā divo janitā pṛthivyāḥ |janitāgnerjanitā sūryasya janitendrasya janitota viṣṇo: ||

ब्र॒ह्मा दे॒वानां॑ पद॒वीः क॑वी॒नामृषि॒र्विप्रा॑णां महि॒षो मृ॒गाणा॑म् ।श्ये॒नो गृध्रा॑णां॒ स्वधि॑ति॒र्वना॑नां॒ सोम॑: प॒वित्र॒मत्ये॑ति॒ रेभ॑न्॥

brahmā devānāṃ padavīḥ kavīnāmṛṣirviprāṇāṃ mahiṣo mṛgāṇām |śyeno gṛdhrāṇāṃ svadhitirvanānāṃ soma: pavitramatyeti rebhan ||

प्रावी॑विपद्वा॒च ऊ॒र्मिं न सिन्धु॒र्गिर॒: सोम॒: पव॑मानो मनी॒षाः ।अ॒न्तः पश्य॑न्वृ॒जने॒माव॑रा॒ण्या ति॑ष्ठति वृष॒भो गोषु॑ जा॒नन्॥

prāvīvipadvāca ūrmiṃ na sindhurgira: soma: pavamāno manīṣāḥ |antaḥ paśyanvṛjanemāvarāṇyā tiṣṭhati vṛṣabho goṣu jānan ||

स म॑त्स॒रः पृ॒त्सु व॒न्वन्नवा॑तः स॒हस्र॑रेता अ॒भि वाज॑मर्ष ।इन्द्रा॑येन्दो॒ पव॑मानो मनी॒ष्यं१शोरू॒र्मिमी॑रय॒ गा इ॑ष॒ण्यन्॥

sa matsaraḥ pṛtsu vanvannavātaḥ sahasraretā abhi vājamarṣa |indrāyendo pavamāno manīṣyaṃ1śorūrmimīraya gā iṣaṇyan ||

परि॑ प्रि॒यः क॒लशे॑ दे॒ववा॑त॒ इन्द्रा॑य॒ सोमो॒ रण्यो॒ मदा॑य ।स॒हस्र॑धारः श॒तवा॑ज॒ इन्दु॑र्वा॒जी न सप्ति॒: सम॑ना जिगाति॥

pari priyaḥ kalaśe devavāta indrāya somo raṇyo madāya |sahasradhāraḥ śatavāja indurvājī na sapti: samanā jigāti ||

स पू॒र्व्यो व॑सु॒विज्जाय॑मानो मृजा॒नो अ॒प्सु दु॑दुहा॒नो अद्रौ॑ ।अ॒भि॒श॒स्ति॒पा भुव॑नस्य॒ राजा॑ वि॒दद्गा॒तुं ब्रह्म॑णे पू॒यमा॑नः॥

sa pūrvyo vasuvijjāyamāno mṛjāno apsu duduhāno adrau |abhiśastipā bhuvanasya rājā vidadgātuṃ brahmaṇe pūyamānaḥ ||

त्वया॒ हि न॑: पि॒तर॑: सोम॒ पूर्वे॒ कर्मा॑णि च॒क्रुः प॑वमान॒ धीरा॑: ।व॒न्वन्नवा॑तः परि॒धीँरपो॑र्णु वी॒रेभि॒रश्वै॑र्म॒घवा॑ भवा नः॥

tvayā hi na: pitara: soma pūrve karmāṇi cakruḥ pavamāna dhīrā: |vanvannavātaḥ paridhīm̐raporṇu vīrebhiraśvairmaghavā bhavā naḥ ||

यथाप॑वथा॒ मन॑वे वयो॒धा अ॑मित्र॒हा व॑रिवो॒विद्ध॒विष्मा॑न् ।ए॒वा प॑वस्व॒ द्रवि॑णं॒ दधा॑न॒ इन्द्रे॒ सं ति॑ष्ठ ज॒नयायु॑धानि॥

yathāpavathā manave vayodhā amitrahā varivoviddhaviṣmān |evā pavasva draviṇaṃ dadhāna indre saṃ tiṣṭha janayāyudhāni ||

पव॑स्व सोम॒ मधु॑माँ ऋ॒तावा॒ऽपो वसा॑नो॒ अधि॒ सानो॒ अव्ये॑ ।अव॒ द्रोणा॑नि घृ॒तवा॑न्ति सीद म॒दिन्त॑मो मत्स॒र इ॑न्द्र॒पान॑:॥

pavasva soma madhumām̐ ṛtāvā'po vasāno adhi sāno avye |ava droṇāni ghṛtavānti sīda madintamo matsara indrapāna: ||

वृ॒ष्टिं दि॒वः श॒तधा॑रः पवस्व सहस्र॒सा वा॑ज॒युर्दे॒ववी॑तौ ।सं सिन्धु॑भिः क॒लशे॑ वावशा॒नः समु॒स्रिया॑भिः प्रति॒रन्न॒ आयु॑:॥

vṛṣṭiṃ divaḥ śatadhāraḥ pavasva sahasrasā vājayurdevavītau |saṃ sindhubhiḥ kalaśe vāvaśānaḥ samusriyābhiḥ pratiranna āyu: ||

ए॒ष स्य सोमो॑ म॒तिभि॑: पुना॒नोऽत्यो॒ न वा॒जी तर॒तीदरा॑तीः ।पयो॒ न दु॒ग्धमदि॑तेरिषि॒रमु॒र्वि॑व गा॒तुः सु॒यमो॒ न वोळ्हा॑॥

eṣa sya somo matibhi: punāno'tyo na vājī taratīdarātīḥ |payo na dugdhamaditeriṣiramurviva gātuḥ suyamo na voḷhā ||

स्वा॒यु॒धः सो॒तृभि॑: पू॒यमा॑नो॒ऽभ्य॑र्ष॒ गुह्यं॒ चारु॒ नाम॑ ।अ॒भि वाजं॒ सप्ति॑रिव श्रव॒स्याऽभि वा॒युम॒भि गा दे॑व सोम॥

svāyudhaḥ sotṛbhi: pūyamāno'bhyarṣa guhyaṃ cāru nāma |abhi vājaṃ saptiriva śravasyā'bhi vāyumabhi gā deva soma ||

शिशुं॑ जज्ञा॒नं ह॑र्य॒तं मृ॑जन्ति शु॒म्भन्ति॒ वह्निं॑ म॒रुतो॑ ग॒णेन॑ ।क॒विर्गी॒र्भिः काव्ये॑ना क॒विः सन्त्सोम॑: प॒वित्र॒मत्ये॑ति॒ रेभ॑न्॥

śiśuṃ jajñānaṃ haryataṃ mṛjanti śumbhanti vahniṃ maruto gaṇena |kavirgīrbhiḥ kāvyenā kaviḥ santsoma: pavitramatyeti rebhan ||

ऋषि॑मना॒ य ऋ॑षि॒कृत्स्व॒र्षाः स॒हस्र॑णीथः पद॒वीः क॑वी॒नाम् ।तृ॒तीयं॒ धाम॑ महि॒षः सिषा॑स॒न्त्सोमो॑ वि॒राज॒मनु॑ राजति॒ ष्टुप्॥

ṛṣimanā ya ṛṣikṛtsvarṣāḥ sahasraṇīthaḥ padavīḥ kavīnām |tṛtīyaṃ dhāma mahiṣaḥ siṣāsantsomo virājamanu rājati ṣṭup ||

च॒मू॒षच्छ्ये॒नः श॑कु॒नो वि॒भृत्वा॑ गोवि॒न्दुर्द्र॒प्स आयु॑धानि॒ बिभ्र॑त् ।अ॒पामू॒र्मिं सच॑मानः समु॒द्रं तु॒रीयं॒ धाम॑ महि॒षो वि॑वक्ति॥

camūṣacchyenaḥ śakuno vibhṛtvā govindurdrapsa āyudhāni bibhrat |apāmūrmiṃ sacamānaḥ samudraṃ turīyaṃ dhāma mahiṣo vivakti ||

मर्यो॒ न शु॒भ्रस्त॒न्वं॑ मृजा॒नोऽत्यो॒ न सृत्वा॑ स॒नये॒ धना॑नाम् ।वृषे॑व यू॒था परि॒ कोश॒मर्ष॒न्कनि॑क्रदच्च॒म्वो॒३रा वि॑वेश॥

maryo na śubhrastanvaṃ mṛjāno'tyo na sṛtvā sanaye dhanānām |vṛṣeva yūthā pari kośamarṣankanikradaccamvo3rā viveśa ||

पव॑स्वेन्दो॒ पव॑मानो॒ महो॑भि॒: कनि॑क्रद॒त्परि॒ वारा॑ण्यर्ष ।क्रीळ॑ञ्च॒म्वो॒३रा वि॑श पू॒यमा॑न॒ इन्द्रं॑ ते॒ रसो॑ मदि॒रो म॑मत्तु॥

pavasvendo pavamāno mahobhi: kanikradatpari vārāṇyarṣa |krīḷañcamvo3rā viśa pūyamāna indraṃ te raso madiro mamattu ||

प्रास्य॒ धारा॑ बृह॒तीर॑सृग्रन्न॒क्तो गोभि॑: क॒लशाँ॒ आवि॑वेश ।साम॑ कृ॒ण्वन्त्सा॑म॒न्यो॑ विप॒श्चित्क्रन्द॑न्नेत्य॒भि सख्यु॒र्न जा॒मिम्॥

prāsya dhārā bṛhatīrasṛgrannakto gobhi: kalaśām̐ āviveśa |sāma kṛṇvantsāmanyo vipaścitkrandannetyabhi sakhyurna jāmim ||

अ॒प॒घ्नन्ने॑षि पवमान॒ शत्रू॑न्प्रि॒यां न जा॒रो अ॒भिगी॑त॒ इन्दु॑: ।सीद॒न्वने॑षु शकु॒नो न पत्वा॒ सोम॑: पुना॒नः क॒लशे॑षु॒ सत्ता॑॥

apaghnanneṣi pavamāna śatrūnpriyāṃ na jāro abhigīta indu: |sīdanvaneṣu śakuno na patvā soma: punānaḥ kalaśeṣu sattā ||

आ ते॒ रुच॒: पव॑मानस्य सोम॒ योषे॑व यन्ति सु॒दुघा॑: सुधा॒राः ।हरि॒रानी॑तः पुरु॒वारो॑ अ॒प्स्वचि॑क्रदत्क॒लशे॑ देवयू॒नाम्॥

ā te ruca: pavamānasya soma yoṣeva yanti sudughā: sudhārāḥ |harirānītaḥ puruvāro apsvacikradatkalaśe devayūnām ||