Mandala.Sukta 1.13

मेधातिथिः काण्वः।(आप्रीसूक्तं, अग्निरूपा देवता देवताः) १ इध्मः समिद्धोऽग्निर्वा, २ तनूनपात्, ३ · medhātithiḥ kāṇvaḥ |(āprīsūktaṃ, agnirūpā devatā devatāḥ) 1 idhmaḥ samiddho'gnirvā, 2 tanūnapāt, 3

नराशंसः, ४ इलः, ५ बर्हिः, ६ देवीर्द्वारः, ७ उषासानक्ता, ८ दैव्यो होतारौ प्रचेतसौ, ९ तिस्रो देव्यःसरस्वतीळाभारत्यः, १० त्वष्टा, ११ वनस्पतिः, १२ स्वाहा कृतयः ।गायत्री।सुस॑मिद्धो न॒ आ व॑ह दे॒वाँ अ॑ग्ने ह॒विष्म॑ते ।होत॑: पावक॒ यक्षि॑ च॥

narāśaṃsaḥ, 4 ilaḥ, 5 barhiḥ, 6 devīrdvāraḥ, 7 uṣāsānaktā, 8 daivyo hotārau pracetasau, 9 tisro devyaḥsarasvatīḷābhāratyaḥ, 10 tvaṣṭā, 11 vanaspatiḥ, 12 svāhā kṛtayaḥ |gāyatrī |susamiddho na ā vaha devām̐ agne haviṣmate |hota: pāvaka yakṣi ca ||

मधु॑मन्तं तनूनपाद् य॒ज्ञं दे॒वेषु॑ नः कवे ।अ॒द्या कृ॑णुहि वी॒तये॑॥

madhumantaṃ tanūnapād yajñaṃ deveṣu naḥ kave |adyā kṛṇuhi vītaye ||

नरा॒शंस॑मि॒ह प्रि॒यम॒स्मिन् य॒ज्ञ उप॑ ह्वये ।मधु॑जिह्वं हवि॒ष्कृत॑म्॥

narāśaṃsamiha priyamasmin yajña upa hvaye |madhujihvaṃ haviṣkṛtam ||

अग्ने॑ सु॒खत॑मे॒ रथे॑ दे॒वाँ ई॑ळि॒त आ व॑ह ।असि॒ होता॒ मनु॑र्हितः॥

agne sukhatame rathe devām̐ īḷita ā vaha |asi hotā manurhitaḥ ||

स्तृ॒णी॒त ब॒र्हिरा॑नु॒षग् घृ॒तपृ॑ष्ठं मनीषिणः ।यत्रा॒मृत॑स्य॒ चक्ष॑णम्॥

stṛṇīta barhirānuṣag ghṛtapṛṣṭhaṃ manīṣiṇaḥ |yatrāmṛtasya cakṣaṇam ||

वि श्र॑यन्तामृता॒वृधो॒ द्वारो॑ दे॒वीर॑स॒श्चत॑: ।अ॒द्या नू॒नं च॒ यष्ट॑वे॥

vi śrayantāmṛtāvṛdho dvāro devīrasaścata: |adyā nūnaṃ ca yaṣṭave ||

नक्तो॒षासा॑ सु॒पेश॑सा॒ ऽस्मिन् य॒ज्ञ उप॑ ह्वये ।इ॒दं नो॑ ब॒र्हिरा॒सदे॑॥

naktoṣāsā supeśasā 'smin yajña upa hvaye |idaṃ no barhirāsade ||

ता सु॑जि॒ह्वा उप॑ ह्वये॒ होता॑रा॒ दैव्या॑ क॒वी ।य॒ज्ञं नो॑ यक्षतामि॒मम्॥

tā sujihvā upa hvaye hotārā daivyā kavī |yajñaṃ no yakṣatāmimam ||

इळा॒ सर॑स्वती म॒ही ति॒स्रो दे॒वीर्म॑यो॒भुव॑: ।ब॒र्हिः सी॑दन्त्व॒स्रिध॑:॥

iḷā sarasvatī mahī tisro devīrmayobhuva: |barhiḥ sīdantvasridha: ||

इ॒ह त्वष्टा॑रमग्रि॒यं वि॒श्वरू॑प॒मुप॑ ह्वये ।अ॒स्माक॑मस्तु॒ केव॑लः॥

iha tvaṣṭāramagriyaṃ viśvarūpamupa hvaye |asmākamastu kevalaḥ ||

अव॑ सृजा वनस्पते॒ देव॑ दे॒वेभ्यो॑ ह॒विः ।प्र दा॒तुर॑स्तु॒ चेत॑नम्॥

ava sṛjā vanaspate deva devebhyo haviḥ |pra dāturastu cetanam ||

स्वाहा॑ य॒ज्ञं कृ॑णोत॒नेन्द्रा॑य॒ यज्व॑नो गृ॒हे ।तत्र॑ दे॒वाँ उप॑ ह्वये॥

svāhā yajñaṃ kṛṇotanendrāya yajvano gṛhe |tatra devām̐ upa hvaye ||