Mandala.Sukta 1.14

मेधातिथिः काण्वः। विश्वे देवाः (विश्वैर्देवैः सहितोऽग्निः), ३ इन्द्रवायुबृहस्पतिमित्राग्निपूषभगादित्यमरुद्गणाः, १० विश्वदेवाग्नीन्द्रवायुमित्रधामानि, ११ अग्निः। गायत्री। · medhātithiḥ kāṇvaḥ | viśve devāḥ (viśvairdevaiḥ sahito'gniḥ), 3 indravāyubṛhaspatimitrāgnipūṣabhagādityamarudgaṇāḥ, 10 viśvadevāgnīndravāyumitradhāmāni, 11 agniḥ | gāyatrī |

ऐभि॑रग्ने॒ दुवो॒ गिरो॒ विश्वे॑भि॒: सोम॑पीतये ।दे॒वेभि॑र्याहि॒ यक्षि॑ च॥

aibhiragne duvo giro viśvebhi: somapītaye |devebhiryāhi yakṣi ca ||

आ त्वा॒ कण्वा॑ अहूषत गृ॒णन्ति॑ विप्र ते॒ धिय॑: ।दे॒वेभि॑रग्न॒ आ ग॑हि॥

ā tvā kaṇvā ahūṣata gṛṇanti vipra te dhiya: |devebhiragna ā gahi ||

इ॒न्द्र॒वा॒यू बृह॒स्पतिं॑ मि॒त्राग्निं पू॒षणं॒ भग॑म् ।आ॒दि॒त्यान् मारु॑तं ग॒णम्॥

indravāyū bṛhaspatiṃ mitrāgniṃ pūṣaṇaṃ bhagam |ādityān mārutaṃ gaṇam ||

प्र वो॑ भ्रियन्त॒ इन्द॑वो मत्स॒रा मा॑दयि॒ष्णव॑: ।द्र॒प्सा मध्व॑श्चमू॒षद॑:॥

pra vo bhriyanta indavo matsarā mādayiṣṇava: |drapsā madhvaścamūṣada: ||

ईळ॑ते॒ त्वाम॑व॒स्यव॒: कण्वा॑सो वृ॒क्तब॑र्हिषः ।ह॒विष्म॑न्तो अरं॒कृत॑:॥

īḷate tvāmavasyava: kaṇvāso vṛktabarhiṣaḥ |haviṣmanto araṃkṛta: ||

घृ॒तपृ॑ष्ठा मनो॒युजो॒ ये त्वा॒ वह॑न्ति॒ वह्न॑यः ।आ दे॒वान्त्सोम॑पीतये॥

ghṛtapṛṣṭhā manoyujo ye tvā vahanti vahnayaḥ |ā devāntsomapītaye ||

तान् यज॑त्राँ ऋता॒वृधो ऽग्ने॒ पत्नी॑वतस्कृधि ।मध्व॑: सुजिह्व पायय॥

tān yajatrām̐ ṛtāvṛdho 'gne patnīvataskṛdhi |madhva: sujihva pāyaya ||

ये यज॑त्रा॒ य ईड्या॒स् ते ते॑ पिबन्तु जि॒ह्वया॑ ।मधो॑रग्ने॒ वष॑ट्कृति॥

ye yajatrā ya īḍyās te te pibantu jihvayā |madhoragne vaṣaṭkṛti ||

आकीं॒ सूर्य॑स्य रोच॒नाद् विश्वा॑न्दे॒वाँ उ॑ष॒र्बुध॑: ।विप्रो॒ होते॒ह व॑क्षति॥

ākīṃ sūryasya rocanād viśvāndevām̐ uṣarbudha: |vipro hoteha vakṣati ||

विश्वे॑भिः सो॒म्यं मध्वग्न॒ इन्द्रे॑ण वा॒युना॑ ।पिबा॑ मि॒त्रस्य॒ धाम॑भिः॥

viśvebhiḥ somyaṃ madhvagna indreṇa vāyunā |pibā mitrasya dhāmabhiḥ ||

त्वं होता॒ मनु॑र्हि॒तो ऽग्ने॑ य॒ज्ञेषु॑ सीदसि ।सेमं नो॑ अध्व॒रं य॑ज॥

tvaṃ hotā manurhito 'gne yajñeṣu sīdasi |semaṃ no adhvaraṃ yaja ||

यु॒क्ष्वा ह्यरु॑षी॒ रथे॑ ह॒रितो॑ देव रो॒हित॑: ।ताभि॑र्दे॒वाँ इ॒हा व॑ह॥

yukṣvā hyaruṣī rathe harito deva rohita: |tābhirdevām̐ ihā vaha ||