Mandala.Sukta 1.142

दीर्घतमा औचथ्यः। (आप्रीसूक्तं)-१ इध्मः समिद्धोऽग्निर्वा, २ तनून पात्, ३ नराशंसः, ४ इळः, ५ बर्हिः, ६ देवीः द्वारः, ७ उषासानक्ता ८ दैव्यो होतारौ प्रचेतसौ, ९ तिस्रो देव्यः सरस्वतीळा भारत्यः, १० त्वष्टा, ११ वनस्पतिः, १२ स्वाहा कृतयः, १३ इन्द्रः। अनुष्टुप्। · dīrghatamā aucathyaḥ | (āprīsūktaṃ)-1 idhmaḥ samiddho'gnirvā, 2 tanūna pāt, 3 narāśaṃsaḥ, 4 iḷaḥ, 5 barhiḥ, 6 devīḥ dvāraḥ, 7 uṣāsānaktā 8 daivyo hotārau pracetasau, 9 tisro devyaḥ sarasvatīḷā bhāratyaḥ, 10 tvaṣṭā, 11 vanaspatiḥ, 12 svāhā kṛtayaḥ, 13 indraḥ | anuṣṭup |

समि॑द्धो अग्न॒ आ व॑ह दे॒वाँ अ॒द्य य॒तस्रु॑चे ।तन्तुं॑ तनुष्व पू॒र्व्यं सु॒तसो॑माय दा॒शुषे॑॥

samiddho agna ā vaha devām̐ adya yatasruce |tantuṃ tanuṣva pūrvyaṃ sutasomāya dāśuṣe ||

घृ॒तव॑न्त॒मुप॑ मासि॒ मधु॑मन्तं तनूनपात् ।य॒ज्ञं विप्र॑स्य॒ माव॑तः शशमा॒नस्य॑ दा॒शुष॑:॥

ghṛtavantamupa māsi madhumantaṃ tanūnapāt |yajñaṃ viprasya māvataḥ śaśamānasya dāśuṣa: ||

शुचि॑: पाव॒को अद्भु॑तो॒ मध्वा॑ य॒ज्ञं मि॑मिक्षति ।नरा॒शंस॒स्त्रिरा दि॒वो दे॒वो दे॒वेषु॑ य॒ज्ञिय॑:॥

śuci: pāvako adbhuto madhvā yajñaṃ mimikṣati |narāśaṃsastrirā divo devo deveṣu yajñiya: ||

ई॒ळि॒तो अ॑ग्न॒ आ व॒हेन्द्रं॑ चि॒त्रमि॒ह प्रि॒यम् ।इ॒यं हि त्वा॑ म॒तिर्ममाच्छा॑ सुजिह्व व॒च्यते॑॥

īḷito agna ā vahendraṃ citramiha priyam |iyaṃ hi tvā matirmamācchā sujihva vacyate ||

स्तृ॒णा॒नासो॑ य॒तस्रु॑चो ब॒र्हिर्य॒ज्ञे स्व॑ध्व॒रे ।वृ॒ञ्जे दे॒वव्य॑चस्तम॒मिन्द्रा॑य॒ शर्म॑ स॒प्रथ॑:॥

stṛṇānāso yatasruco barhiryajñe svadhvare |vṛñje devavyacastamamindrāya śarma sapratha: ||

वि श्र॑यन्तामृता॒वृध॑: प्र॒यै दे॒वेभ्यो॑ म॒हीः ।पा॒व॒कास॑: पुरु॒स्पृहो॒ द्वारो॑ दे॒वीर॑स॒श्चत॑:॥

vi śrayantāmṛtāvṛdha: prayai devebhyo mahīḥ |pāvakāsa: puruspṛho dvāro devīrasaścata: ||

आ भन्द॑माने॒ उपा॑के॒ नक्तो॒षासा॑ सु॒पेश॑सा ।य॒ह्वी ऋ॒तस्य॑ मा॒तरा॒ सीद॑तां ब॒र्हिरा सु॒मत्॥

ā bhandamāne upāke naktoṣāsā supeśasā |yahvī ṛtasya mātarā sīdatāṃ barhirā sumat ||

म॒न्द्रजि॑ह्वा जुगु॒र्वणी॒ होता॑रा॒ दैव्या॑ क॒वी ।य॒ज्ञं नो॑ यक्षतामि॒मं सि॒ध्रम॒द्य दि॑वि॒स्पृश॑म्॥

mandrajihvā jugurvaṇī hotārā daivyā kavī |yajñaṃ no yakṣatāmimaṃ sidhramadya divispṛśam ||

शुचि॑र्दे॒वेष्वर्पि॑ता॒ होत्रा॑ म॒रुत्सु॒ भार॑ती ।इळा॒ सर॑स्वती म॒ही ब॒र्हिः सी॑दन्तु य॒ज्ञिया॑:॥

śucirdeveṣvarpitā hotrā marutsu bhāratī |iḷā sarasvatī mahī barhiḥ sīdantu yajñiyā: ||

तन्न॑स्तु॒रीप॒मद्भु॑तं पु॒रु वारं॑ पु॒रु त्मना॑ ।त्वष्टा॒ पोषा॑य॒ वि ष्य॑तु रा॒ये नाभा॑ नो अस्म॒युः॥

tannasturīpamadbhutaṃ puru vāraṃ puru tmanā |tvaṣṭā poṣāya vi ṣyatu rāye nābhā no asmayuḥ ||

अ॒व॒सृ॒जन्नुप॒ त्मना॑ दे॒वान् य॑क्षि वनस्पते ।अ॒ग्निर्ह॒व्या सु॑षूदति दे॒वो दे॒वेषु॒ मेधि॑रः॥

avasṛjannupa tmanā devān yakṣi vanaspate |agnirhavyā suṣūdati devo deveṣu medhiraḥ ||

पू॒ष॒ण्वते॑ म॒रुत्व॑ते वि॒श्वदे॑वाय वा॒यवे॑ ।स्वाहा॑ गाय॒त्रवे॑पसे ह॒व्यमिन्द्रा॑य कर्तन॥

pūṣaṇvate marutvate viśvadevāya vāyave |svāhā gāyatravepase havyamindrāya kartana ||

स्वाहा॑कृता॒न्या ग॒ह्युप॑ ह॒व्यानि॑ वी॒तये॑ ।इन्द्रा ग॑हि श्रु॒धी हवं॒ त्वां ह॑वन्ते अध्व॒रे॥

svāhākṛtānyā gahyupa havyāni vītaye |indrā gahi śrudhī havaṃ tvāṃ havante adhvare ||