Mandala.Sukta 1.145

दीर्घतमा औचथ्यः। अग्निः। जगती, ५ त्रिष्टुप् । · dīrghatamā aucathyaḥ | agniḥ | jagatī, 5 triṣṭup |

तं पृ॑च्छता॒ स ज॑गामा॒ स वे॑द॒ स चि॑कि॒त्वाँ ई॑यते॒ सा न्वी॑यते ।तस्मि॑न् त्सन्ति प्र॒शिष॒स्तस्मि॑न्नि॒ष्टय॒: स वाज॑स्य॒ शव॑सः शु॒ष्मिण॒स्पति॑:॥

taṃ pṛcchatā sa jagāmā sa veda sa cikitvām̐ īyate sā nvīyate |tasmin tsanti praśiṣastasminniṣṭaya: sa vājasya śavasaḥ śuṣmiṇaspati: ||

तमित् पृ॑च्छन्ति॒ न सि॒मो वि पृ॑च्छति॒ स्वेने॑व॒ धीरो॒ मन॑सा॒ यदग्र॑भीत् ।न मृ॑ष्यते प्रथ॒मं नाप॑रं॒ वचो॒ ऽस्य क्रत्वा॑ सचते॒ अप्र॑दृपितः॥

tamit pṛcchanti na simo vi pṛcchati sveneva dhīro manasā yadagrabhīt |na mṛṣyate prathamaṃ nāparaṃ vaco 'sya kratvā sacate apradṛpitaḥ ||

तमिद् ग॑च्छन्ति जु॒ह्व १स्तमर्व॑ती॒र्विश्वा॒न्येक॑: शृणव॒द् वचां॑सि मे ।पु॒रु॒प्रै॒षस्ततु॑रिर्यज्ञ॒साध॒नो ऽच्छि॑द्रोति॒: शिशु॒राद॑त्त॒ सं रभ॑:॥

tamid gacchanti juhva 1stamarvatīrviśvānyeka: śṛṇavad vacāṃsi me |purupraiṣastaturiryajñasādhano 'cchidroti: śiśurādatta saṃ rabha: ||

उ॒प॒स्थायं॑ चरति॒ यत् स॒मार॑त स॒द्यो जा॒तस्त॑त्सार॒ युज्ये॑भिः ।अ॒भि श्वा॒न्तं मृ॑शते ना॒न्द्ये॑ मु॒दे यदीं॒ गच्छ॑न्त्युश॒तीर॑पिष्ठि॒तम्॥

upasthāyaṃ carati yat samārata sadyo jātastatsāra yujyebhiḥ |abhi śvāntaṃ mṛśate nāndye mude yadīṃ gacchantyuśatīrapiṣṭhitam ||

स ईं॑ मृ॒गो अप्यो॑ वन॒र्गुरुप॑ त्व॒च्यु॑प॒मस्यां॒ नि धा॑यि ।व्य॑ब्रवीद् व॒युना॒ मर्त्ये॑भ्यो॒ ऽग्निर्वि॒द्वाँ ऋ॑त॒चिद्धि स॒त्यः॥

sa īṃ mṛgo apyo vanargurupa tvacyupamasyāṃ ni dhāyi |vyabravīd vayunā martyebhyo 'gnirvidvām̐ ṛtaciddhi satyaḥ ||