Mandala.Sukta 1.146

दीर्घतमा औचथ्यः। अग्निः। त्रिष्टुप्। · dīrghatamā aucathyaḥ | agniḥ | triṣṭup |

त्रि॒मू॒र्धानं॑ स॒प्तर॑श्मिं गृणी॒षे ऽनू॑नम॒ग्निं पि॒त्रोरु॒पस्थे॑ ।नि॒ष॒त्तम॑स्य॒ चर॑तो ध्रु॒वस्य॒ विश्वा॑ दि॒वो रो॑च॒नाप॑प्रि॒वांस॑म्॥

trimūrdhānaṃ saptaraśmiṃ gṛṇīṣe 'nūnamagniṃ pitrorupasthe |niṣattamasya carato dhruvasya viśvā divo rocanāpaprivāṃsam ||

उ॒क्षा म॒हाँ अ॒भि व॑वक्ष एने अ॒जर॑स्तस्थावि॒तऊ॑तिर्ऋ॒ष्वः ।उ॒र्व्याः प॒दो नि द॑धाति॒ सानौ॑ रि॒हन्त्यूधो॑ अरु॒षासो॑ अस्य॥

ukṣā mahām̐ abhi vavakṣa ene ajarastasthāvitaūtirṛṣvaḥ |urvyāḥ pado ni dadhāti sānau rihantyūdho aruṣāso asya ||

स॒मा॒नं व॒त्सम॒भि सं॒चर॑न्ती॒ विष्व॑ग्धे॒नू वि च॑रतः सु॒मेके॑ ।अ॒न॒प॒वृ॒ज्याँ अध्व॑नो॒ मिमा॑ने॒ विश्वा॒न् केताँ॒ अधि॑ म॒हो दधा॑ने॥

samānaṃ vatsamabhi saṃcarantī viṣvagdhenū vi carataḥ sumeke |anapavṛjyām̐ adhvano mimāne viśvān ketām̐ adhi maho dadhāne ||

धीरा॑सः प॒दं क॒वयो॑ नयन्ति॒ नाना॑ हृ॒दा रक्ष॑माणा अजु॒र्यम् ।सिषा॑सन्त॒: पर्य॑पश्यन्त॒ सिन्धु॑मा॒विरे॑भ्यो अभव॒त् सूर्यो॒ नॄन्॥

dhīrāsaḥ padaṃ kavayo nayanti nānā hṛdā rakṣamāṇā ajuryam |siṣāsanta: paryapaśyanta sindhumāvirebhyo abhavat sūryo nṝn ||

दि॒दृ॒क्षेण्य॒: परि॒ काष्ठा॑सु॒ जेन्य॑ ई॒ळेन्यो॑ म॒हो अर्भा॑य जी॒वसे॑ ।पु॒रु॒त्रा यदभ॑व॒त् सूरहै॑भ्यो॒ गर्भे॑भ्यो म॒घवा॑ वि॒श्वद॑र्शतः॥

didṛkṣeṇya: pari kāṣṭhāsu jenya īḷenyo maho arbhāya jīvase |purutrā yadabhavat sūrahaibhyo garbhebhyo maghavā viśvadarśataḥ ||