Mandala.Sukta 1.16

मेधातिथिःकाण्वः। इन्द्रः।गायत्री। · medhātithiḥkāṇvaḥ | indraḥ |gāyatrī |

आ त्वा॑ वहन्तु॒ हर॑यो॒ वृष॑णं॒ सोम॑पीतये ।इन्द्र॑ त्वा॒ सूर॑चक्षसः॥

ā tvā vahantu harayo vṛṣaṇaṃ somapītaye |indra tvā sūracakṣasaḥ ||

इ॒मा धा॒ना घृ॑त॒स्नुवो॒ हरी॑ इ॒होप॑ वक्षतः ।इन्द्रं॑ सु॒खत॑मे॒ रथे॑॥

imā dhānā ghṛtasnuvo harī ihopa vakṣataḥ |indraṃ sukhatame rathe ||

इन्द्रं॑ प्रा॒तर्ह॑वामह॒ इन्द्रं॑ प्रय॒त्य॑ध्व॒रे ।इन्द्रं॒ सोम॑स्य पी॒तये॑॥

indraṃ prātarhavāmaha indraṃ prayatyadhvare |indraṃ somasya pītaye ||

उप॑ नः सु॒तमा ग॑हि॒ हरि॑भिरिन्द्र के॒शिभि॑: ।सु॒ते हि त्वा॒ हवा॑महे॥

upa naḥ sutamā gahi haribhirindra keśibhi: |sute hi tvā havāmahe ||

सेमं न॒: स्तोम॒मा ग॒ह्युपे॒दं सव॑नं सु॒तम् ।गौ॒रो न तृ॑षि॒तः पि॑ब॥

semaṃ na: stomamā gahyupedaṃ savanaṃ sutam |gauro na tṛṣitaḥ piba ||

इ॒मे सोमा॑स॒ इन्द॑वः सु॒तासो॒ अधि॑ ब॒र्हिषि॑ ।ताँ इ॑न्द्र॒ सह॑से पिब॥

ime somāsa indavaḥ sutāso adhi barhiṣi |tām̐ indra sahase piba ||

अ॒यं ते॒ स्तोमो॑ अग्रि॒यो हृ॑दि॒स्पृग॑स्तु॒ शंत॑मः ।अथा॒ सोमं॑ सु॒तं पि॑ब॥

ayaṃ te stomo agriyo hṛdispṛgastu śaṃtamaḥ |athā somaṃ sutaṃ piba ||

विश्व॒मित्सव॑नं सु॒तमिन्द्रो॒ मदा॑य गच्छति ।वृ॒त्र॒हा सोम॑पीतये॥

viśvamitsavanaṃ sutamindro madāya gacchati |vṛtrahā somapītaye ||

सेमं न॒: काम॒मा पृ॑ण॒ गोभि॒रश्वै॑: शतक्रतो ।स्तवा॑म त्वा स्वा॒ध्य॑:॥

semaṃ na: kāmamā pṛṇa gobhiraśvai: śatakrato |stavāma tvā svādhya: ||