Mandala.Sukta 1.17

मेधातिथिः काण्वः। इन्द्रावरुणौ। गायत्री, ४-५ पादनिचृत् (५ ह्रसीयसी वा) गायत्री। · medhātithiḥ kāṇvaḥ | indrāvaruṇau | gāyatrī, 4-5 pādanicṛt (5 hrasīyasī vā) gāyatrī |

इन्द्रा॒वरु॑णयोर॒हं स॒म्राजो॒रव॒ आ वृ॑णे ।ता नो॑ मृळात ई॒दृशे॑॥

indrāvaruṇayorahaṃ samrājorava ā vṛṇe |tā no mṛḷāta īdṛśe ||

गन्ता॑रा॒ हि स्थोऽव॑से॒ हवं॒ विप्र॑स्य॒ माव॑तः ।ध॒र्तारा॑ चर्षणी॒नाम्॥

gantārā hi stho'vase havaṃ viprasya māvataḥ |dhartārā carṣaṇīnām ||

अ॒नु॒का॒मं त॑र्पयेथा॒मिन्द्रा॑वरुण रा॒य आ ।ता वां॒ नेदि॑ष्ठमीमहे॥

anukāmaṃ tarpayethāmindrāvaruṇa rāya ā |tā vāṃ nediṣṭhamīmahe ||

यु॒वाकु॒ हि शची॑नां यु॒वाकु॑ सुमती॒नाम् ।भू॒याम॑ वाज॒दाव्ना॑म्॥

yuvāku hi śacīnāṃ yuvāku sumatīnām |bhūyāma vājadāvnām ||

इन्द्र॑: सहस्र॒दाव्नां॒ वरु॑ण॒: शंस्या॑नाम् ।क्रतु॑र्भवत्यु॒क्थ्य॑:॥

indra: sahasradāvnāṃ varuṇa: śaṃsyānām |kraturbhavatyukthya: ||

तयो॒रिदव॑सा व॒यं स॒नेम॒ नि च॑ धीमहि ।स्यादु॒त प्र॒रेच॑नम्॥

tayoridavasā vayaṃ sanema ni ca dhīmahi |syāduta prarecanam ||

इन्द्रा॑वरुण वाम॒हं हु॒वे चि॒त्राय॒ राध॑से ।अ॒स्मान्त्सु जि॒ग्युष॑स्कृतम्॥

indrāvaruṇa vāmahaṃ huve citrāya rādhase |asmāntsu jigyuṣaskṛtam ||

इन्द्रा॑वरुण॒ नू नु वां॒ सिषा॑सन्तीषु धी॒ष्वा ।अ॒स्मभ्यं॒ शर्म॑ यच्छतम्॥

indrāvaruṇa nū nu vāṃ siṣāsantīṣu dhīṣvā |asmabhyaṃ śarma yacchatam ||

प्र वा॑मश्नोतु सुष्टु॒तिरिन्द्रा॑वरुण॒ यां हु॒वे ।यामृ॒धाथे॑ स॒धस्तु॑तिम्॥

pra vāmaśnotu suṣṭutirindrāvaruṇa yāṃ huve |yāmṛdhāthe sadhastutim ||