Mandala.Sukta 1.18

मेधातिथिःकाण्वः। १-३ ब्रह्मणस्पतिः, ४ इन्द्रो ब्रह्मणस्पतिः सोमश्च, ५ ब्रह्मणस्पतिः सोम इंद्रो, दक्षिणा · medhātithiḥkāṇvaḥ | 1-3 brahmaṇaspatiḥ, 4 indro brahmaṇaspatiḥ somaśca, 5 brahmaṇaspatiḥ soma iṃdro, dakṣiṇā

च, ६-८ सदसस्पतिः, ९ सदसस्पतिर्नराशंसो वा।गायत्री।सो॒मानं॒ स्वर॑णं कृणु॒हि ब्र॑ह्मणस्पते ।क॒क्षीव॑न्तं॒ य औ॑शि॒जः॥

ca, 6-8 sadasaspatiḥ, 9 sadasaspatirnarāśaṃso vā |gāyatrī |somānaṃ svaraṇaṃ kṛṇuhi brahmaṇaspate |kakṣīvantaṃ ya auśijaḥ ||

यो रे॒वान् यो अ॑मीव॒हा व॑सु॒वित् पु॑ष्टि॒वर्ध॑नः ।स न॑: सिषक्तु॒ यस्तु॒रः॥

yo revān yo amīvahā vasuvit puṣṭivardhanaḥ |sa na: siṣaktu yasturaḥ ||

मा न॒: शंसो॒ अर॑रुषो धू॒र्तिः प्रण॒ङ् मर्त्य॑स्य ।रक्षा॑ णो ब्रह्मणस्पते॥

mā na: śaṃso araruṣo dhūrtiḥ praṇaṅ martyasya |rakṣā ṇo brahmaṇaspate ||

स घा॑ वी॒रो न रि॑ष्यति॒ यमिन्द्रो॒ ब्रह्म॑ण॒स्पति॑: ।सोमो॑ हि॒नोति॒ मर्त्य॑म्॥

sa ghā vīro na riṣyati yamindro brahmaṇaspati: |somo hinoti martyam ||

त्वं तं ब्र॑ह्मणस्पते॒ सोम॒ इन्द्र॑श्च॒ मर्त्य॑म् ।दक्षि॑णा पा॒त्वंह॑सः॥

tvaṃ taṃ brahmaṇaspate soma indraśca martyam |dakṣiṇā pātvaṃhasaḥ ||

सद॑स॒स्पति॒मद्भु॑तं प्रि॒यमिन्द्र॑स्य॒ काम्य॑म् ।स॒निं मे॒धाम॑यासिषम्॥

sadasaspatimadbhutaṃ priyamindrasya kāmyam |saniṃ medhāmayāsiṣam ||

यस्मा॑दृ॒ते न सिध्य॑ति य॒ज्ञो वि॑प॒श्चित॑श्च॒न ।स धी॒नां योग॑मिन्वति॥

yasmādṛte na sidhyati yajño vipaścitaścana |sa dhīnāṃ yogaminvati ||

आदृ॑ध्नोति ह॒विष्कृ॑तिं॒ प्राञ्चं॑ कृणोत्यध्व॒रम् ।होत्रा॑ दे॒वेषु॑ गच्छति॥

ādṛdhnoti haviṣkṛtiṃ prāñcaṃ kṛṇotyadhvaram |hotrā deveṣu gacchati ||

नरा॒शंसं॑ सु॒धृष्ट॑म॒मप॑श्यं स॒प्रथ॑स्तमम् ।दि॒वो न सद्म॑मखसम्॥

narāśaṃsaṃ sudhṛṣṭamamapaśyaṃ saprathastamam |divo na sadmamakhasam ||