Mandala.Sukta 1.21

मेधातिथिः काण्वः। इन्द्राग्नी। गायत्री। · medhātithiḥ kāṇvaḥ | indrāgnī | gāyatrī |

इ॒हेन्द्रा॒ग्नी उप॑ ह्वये॒ तयो॒रित् स्तोम॑मुश्मसि ।ता सोमं॑ सोम॒पात॑मा॥

ihendrāgnī upa hvaye tayorit stomamuśmasi |tā somaṃ somapātamā ||

ता य॒ज्ञेषु॒ प्र शं॑सतेन्द्रा॒ग्नी शु॑म्भता नरः ।ता गा॑य॒त्रेषु॑ गायत॥

tā yajñeṣu pra śaṃsatendrāgnī śumbhatā naraḥ |tā gāyatreṣu gāyata ||

ता मि॒त्रस्य॒ प्रश॑स्तय इन्द्रा॒ग्नी ता ह॑वामहे ।सो॒म॒पा सोम॑पीतये॥

tā mitrasya praśastaya indrāgnī tā havāmahe |somapā somapītaye ||

उ॒ग्रा सन्ता॑ हवामह॒ उपे॒दं सव॑नं सु॒तम् ।इ॒न्द्रा॒ग्नी एह ग॑च्छताम्॥

ugrā santā havāmaha upedaṃ savanaṃ sutam |indrāgnī eha gacchatām ||

ता म॒हान्ता॒ सद॒स्पती॒ इन्द्रा॑ग्नी॒ रक्ष॑ उब्जतम् ।अप्र॑जाः सन्त्व॒त्रिण॑:॥

tā mahāntā sadaspatī indrāgnī rakṣa ubjatam |aprajāḥ santvatriṇa: ||

तेन॑ स॒त्येन॑ जागृत॒मधि॑ प्रचे॒तुने॑ प॒दे ।इन्द्रा॑ग्नी॒ शर्म॑ यच्छतम्॥

tena satyena jāgṛtamadhi pracetune pade |indrāgnī śarma yacchatam ||