Mandala.Sukta 1.23

मेधातिथिः काण्वः। १ वायुः, २-३ इन्द्र वायू, ४-६ मित्रावरुणौ, ७-९ इन्द्रो मरुत्वान्, १०-१२ विश्वे देवाः, १३-१५ पूषा, १६-२२, २३(पूर्वार्धस्य) आपः, २३(उत्तरार्धस्य), २४ अग्निः। १-१८ गायत्री, १९ पुर उष्णिक्, २१ प्रतिष्ठा, २०, २२-२४ अनुष्टुप्।॥ · medhātithiḥ kāṇvaḥ | 1 vāyuḥ, 2-3 indra vāyū, 4-6 mitrāvaruṇau, 7-9 indro marutvān, 10-12 viśve devāḥ, 13-15 pūṣā, 16-22, 23(pūrvārdhasya) āpaḥ, 23(uttarārdhasya), 24 agniḥ | 1-18 gāyatrī, 19 pura uṣṇik, 21 pratiṣṭhā, 20, 22-24 anuṣṭup || |

ती॒व्राः सोमा॑स॒ आ ग॑ह्या॒शीर्व॑न्तः सु॒ता इ॒मे ।वायो॒ तान्प्रस्थि॑तान्पिब॥

tīvrāḥ somāsa ā gahyāśīrvantaḥ sutā ime |vāyo tānprasthitānpiba ||

उ॒भा दे॒वा दि॑वि॒स्पृशे॑न्द्रवा॒यू ह॑वामहे ।अ॒स्य सोम॑स्य पी॒तये॑॥

ubhā devā divispṛśendravāyū havāmahe |asya somasya pītaye ||

इ॒न्द्र॒वा॒यू म॑नो॒जुवा॒ विप्रा॑ हवन्त ऊ॒तये॑ ।स॒ह॒स्रा॒क्षा धि॒यस्पती॑॥

indravāyū manojuvā viprā havanta ūtaye |sahasrākṣā dhiyaspatī ||

मि॒त्रं व॒यं ह॑वामहे॒ वरु॑णं॒ सोम॑पीतये ।ज॒ज्ञा॒ना पू॒तद॑क्षसा॥

mitraṃ vayaṃ havāmahe varuṇaṃ somapītaye |jajñānā pūtadakṣasā ||

ऋ॒तेन॒ यावृ॑ता॒वृधा॑वृ॒तस्य॒ ज्योति॑ष॒स्पती॑ ।ता मि॒त्रावरु॑णा हुवे॥

ṛtena yāvṛtāvṛdhāvṛtasya jyotiṣaspatī |tā mitrāvaruṇā huve ||

वरु॑णः प्रावि॒ता भु॑वन्मि॒त्रो विश्वा॑भिरू॒तिभि॑: ।कर॑तां नः सु॒राध॑सः॥

varuṇaḥ prāvitā bhuvanmitro viśvābhirūtibhi: |karatāṃ naḥ surādhasaḥ ||

म॒रुत्व॑न्तं हवामह॒ इन्द्र॒मा सोम॑पीतये ।स॒जूर्ग॒णेन॑ तृम्पतु॥

marutvantaṃ havāmaha indramā somapītaye |sajūrgaṇena tṛmpatu ||

इन्द्र॑ज्येष्ठा॒ मरु॑द्गणा॒ देवा॑स॒: पूष॑रातयः ।विश्वे॒ मम॑ श्रुता॒ हव॑म्॥

indrajyeṣṭhā marudgaṇā devāsa: pūṣarātayaḥ |viśve mama śrutā havam ||

ह॒त वृ॒त्रं सु॑दानव॒ इन्द्रे॑ण॒ सह॑सा यु॒जा ।मा नो॑ दु॒:शंस॑ ईशत॥

hata vṛtraṃ sudānava indreṇa sahasā yujā |mā no du:śaṃsa īśata ||

विश्वा॑न् दे॒वान् ह॑वामहे म॒रुत॒: सोम॑पीतये ।उ॒ग्रा हि पृश्नि॑मातरः॥

viśvān devān havāmahe maruta: somapītaye |ugrā hi pṛśnimātaraḥ ||

जय॑तामिव तन्य॒तुर्म॒रुता॑मेति धृष्णु॒या ।यच्छुभं॑ या॒थना॑ नरः॥

jayatāmiva tanyaturmarutāmeti dhṛṣṇuyā |yacchubhaṃ yāthanā naraḥ ||

ह॒स्का॒राद् वि॒द्युत॒स्पर्यऽतो॑ जा॒ता अ॑वन्तु नः ।म॒रुतो॑ मृळयन्तु नः॥

haskārād vidyutasparya'to jātā avantu naḥ |maruto mṛḷayantu naḥ ||

आ पू॑षञ्चि॒त्रब॑र्हिष॒माघृ॑णे ध॒रुणं॑ दि॒वः ।आजा॑ न॒ष्टं यथा॑ प॒शुम्॥

ā pūṣañcitrabarhiṣamāghṛṇe dharuṇaṃ divaḥ |ājā naṣṭaṃ yathā paśum ||

पू॒षा राजा॑न॒माघृ॑णि॒रप॑गूह्लं॒ गुहा॑ हि॒तम् ।अवि॑न्दच्चि॒त्रब॑र्हिषम्॥

pūṣā rājānamāghṛṇirapagūhlaṃ guhā hitam |avindaccitrabarhiṣam ||

उ॒तो स मह्य॒मिन्दु॑भि॒: षड् यु॒क्ताँ अ॑नु॒सेषि॑धत् ।गोभि॒र्यवं॒ न च॑र्कृषत्॥

uto sa mahyamindubhi: ṣaḍ yuktām̐ anuseṣidhat |gobhiryavaṃ na carkṛṣat ||

अ॒म्बयो॑ य॒न्त्यध्व॑भिर्जा॒मयो॑ अध्वरीय॒ताम् ।पृ॒ञ्च॒तीर्मधु॑ना॒ पय॑:॥

ambayo yantyadhvabhirjāmayo adhvarīyatām |pṛñcatīrmadhunā paya: ||

अ॒मूर्या उप॒ सूर्ये॒ याभि॑र्वा॒ सूर्य॑: स॒ह ।ता नो॑ हिन्वन्त्वध्व॒रम्॥

amūryā upa sūrye yābhirvā sūrya: saha |tā no hinvantvadhvaram ||

अ॒पो दे॒वीरुप॑ ह्वये॒ यत्र॒ गाव॒: पिब॑न्ति नः ।सिन्धु॑भ्य॒: कर्त्वं॑ ह॒विः॥

apo devīrupa hvaye yatra gāva: pibanti naḥ |sindhubhya: kartvaṃ haviḥ ||

अ॒प्स्व१न्तर॒मृत॑म॒प्सु भे॑ष॒जम॒पामु॒त प्रश॑स्तये ।देवा॒ भव॑त वा॒जिन॑:॥

apsva1ntaramṛtamapsu bheṣajamapāmuta praśastaye |devā bhavata vājina: ||

अ॒प्सु मे॒ सोमो॑ अब्रवीद॒न्तर्विश्वा॑नि भेष॒जा ।अ॒ग्निं च॑ वि॒श्वश॑म्भुव॒माप॑श्च वि॒श्वभे॑षजीः॥

apsu me somo abravīdantarviśvāni bheṣajā |agniṃ ca viśvaśambhuvamāpaśca viśvabheṣajīḥ ||

आप॑: पृणी॒त भे॑ष॒जं वरू॑थं त॒न्वे॒ ३ मम॑ ।ज्योक् च॒ सूर्यं॑ दृ॒शे॥

āpa: pṛṇīta bheṣajaṃ varūthaṃ tanve 3 mama |jyok ca sūryaṃ dṛśe ||

इ॒दमा॑प॒: प्र व॑हत॒ यत् किं च॑ दुरि॒तं मयि॑ ।यद् वा॒हम॑भिदु॒द्रोह॒ यद्वा॑ शे॒प उ॒तानृ॑तम्॥

idamāpa: pra vahata yat kiṃ ca duritaṃ mayi |yad vāhamabhidudroha yadvā śepa utānṛtam ||

आपो॑ अ॒द्यान्व॑चारिषं॒ रसे॑न॒ सम॑गस्महि ।पय॑स्वानग्न॒ आ ग॑हि॒ तं मा॒ सं सृ॑ज॒ वर्च॑सा॥

āpo adyānvacāriṣaṃ rasena samagasmahi |payasvānagna ā gahi taṃ mā saṃ sṛja varcasā ||

सं मा॑ग्ने॒ वर्च॑सा सृज॒ सं प्र॒जया॒ समायु॑षा ।वि॒द्युर्मे॑ अस्य दे॒वा इन्द्रो॑ विद्यात् स॒ह ऋषि॑भिः॥

saṃ māgne varcasā sṛja saṃ prajayā samāyuṣā |vidyurme asya devā indro vidyāt saha ṛṣibhiḥ ||