Mandala.Sukta 1.4

मधुच्छन्दा वैश्वामित्रः। इन्द्रः। गायत्री। · madhucchandā vaiśvāmitraḥ | indraḥ | gāyatrī |

सु॒रू॒प॒कृ॒त्नुमू॒तये॑ सु॒दुघा॑मिव गो॒दुहे॑।जु॒हू॒मसि॒ द्यवि॑द्यवि॥

surūpakṛtnumūtaye sudughāmiva goduhe |juhūmasi dyavidyavi ||

उप॑ न॒: सव॒ना ग॑हि॒ सोम॑स्य सोमपाः पिब।गो॒दा इद् रे॒वतो॒ मद॑:॥

upa na: savanā gahi somasya somapāḥ piba |godā id revato mada: ||

अथा॑ ते॒ अन्त॑मानां वि॒द्याम॑ सुमती॒नाम्।मा नो॒ अति॑ ख्य॒ आ ग॑हि॥

athā te antamānāṃ vidyāma sumatīnām |mā no ati khya ā gahi ||

परे॑हि॒ विग्र॒मस्तृ॑त॒मिन्द्रं॑ पृच्छा विप॒श्चित॑म्।यस्ते॒ सखि॑भ्य॒ आ वर॑म्॥

parehi vigramastṛtamindraṃ pṛcchā vipaścitam |yaste sakhibhya ā varam ||

उ॒त ब्रु॑वन्तु नो॒ निदो॒ निर॒न्यत॑श्चिदारत।दधा॑ना॒ इन्द्र॒ इद् दुव॑:॥

uta bruvantu no nido niranyataścidārata |dadhānā indra id duva: ||

उ॒त न॑: सु॒भगाँ॑ अ॒रिर्वो॒चेयु॑र्दस्म कृ॒ष्टय॑:।स्यामेदिन्द्र॑स्य॒ शर्म॑णि॥

uta na: subhagām̐ arirvoceyurdasma kṛṣṭaya: |syāmedindrasya śarmaṇi ||

एमा॒शुमा॒शवे॑ भर यज्ञ॒श्रियं॑ नृ॒माद॑नम्।प॒त॒यन् म॑न्द॒यत्स॑खम्॥

emāśumāśave bhara yajñaśriyaṃ nṛmādanam |patayan mandayatsakham ||

अ॒स्य पी॒त्वा श॑तक्रतो घ॒नो वृ॒त्राणा॑मभवः।प्रावो॒ वाजे॑षु वा॒जिन॑म्॥

asya pītvā śatakrato ghano vṛtrāṇāmabhavaḥ |prāvo vājeṣu vājinam ||

तं त्वा॒ वाजे॑षु वा॒जिनं॑ वा॒जया॑मः शतक्रतो।धना॑नामिन्द्र सा॒तये॑॥

taṃ tvā vājeṣu vājinaṃ vājayāmaḥ śatakrato |dhanānāmindra sātaye ||

यो रा॒यो॒३ऽवनि॑र्म॒हान्त्सु॑पा॒रः सु॑न्व॒तः सखा॑।तस्मा॒ इन्द्रा॑य गायत॥

yo rāyo3'vanirmahāntsupāraḥ sunvataḥ sakhā |tasmā indrāya gāyata ||