Mandala.Sukta 1.65

पराशरः शाक्त्यः। अग्निः। द्विपदा विराट्। · parāśaraḥ śāktyaḥ | agniḥ | dvipadā virāṭ |

प॒श्वा न ता॒युं, गुहा॒ चत॑न्तं॒ नमो॑ युजा॒नं, नमो॒ वह॑न्तम्॥

paśvā na tāyuṃ, guhā catantaṃ namo yujānaṃ, namo vahantam ||

स॒जोषा॒ धीरा॑:, प॒दैरनु॑ ग्म॒न्नुप॑ त्वा सीद॒न्, विश्वे॒ यज॑त्राः॥

sajoṣā dhīrā:, padairanu gmannupa tvā sīdan, viśve yajatrāḥ ||

२ऋ॒तस्य॑ दे॒वा, अनु॑ व्र॒ता गु॒र्भुव॒त् परि॑ष्टि॒र्द्यौर्न भूम॑॥

2ṛtasya devā, anu vratā gurbhuvat pariṣṭirdyaurna bhūma ||

वर्ध॑न्ती॒माप॑:, प॒न्वा सुशि॑श्विमृ॒तस्य॒ योना॒, गर्भे॒ सुजा॑तम्॥

vardhantīmāpa:, panvā suśiśvimṛtasya yonā, garbhe sujātam ||

४पु॒ष्टिर्न र॒ण्वा, क्षि॒तिर्न पृ॒थ्वी गि॒रिर्न भुज्म॒, क्षोदो॒ न श॒म्भु॥

4puṣṭirna raṇvā, kṣitirna pṛthvī girirna bhujma, kṣodo na śambhu ||

अत्यो॒ नाज्म॒न्, त्सर्ग॑प्रतक्त॒: सिन्धु॒र्न क्षोद॒:, क ईं॑ वराते॥

atyo nājman, tsargapratakta: sindhurna kṣoda:, ka īṃ varāte ||

६जा॒मिः सिन्धू॑नां॒, भ्राते॑व॒ स्वस्रा॒मिभ्या॒न्न राजा॒, वना॑न्यत्ति॥

6jāmiḥ sindhūnāṃ, bhrāteva svasrāmibhyānna rājā, vanānyatti ||

यद् वात॑जूतो॒, वना॒ व्यस्था॑द॒ग्निर्ह॑ दाति॒, रोमा॑ पृथि॒व्याः॥

yad vātajūto, vanā vyasthādagnirha dāti, romā pṛthivyāḥ ||

८श्वसि॑त्य॒प्सु, हं॒सो न सीद॒न् क्रत्वा॒ चेति॑ष्ठो, वि॒शामु॑ष॒र्भुत्॥

8śvasityapsu, haṃso na sīdan kratvā cetiṣṭho, viśāmuṣarbhut ||

सोमो॒ न वे॒धा, ऋ॒तप्र॑जातः प॒शुर्न शिश्वा॑, वि॒भुर्दू॒रेभा॑:॥

somo na vedhā, ṛtaprajātaḥ paśurna śiśvā, vibhurdūrebhā: ||