Mandala.Sukta 1.67

पराशरः शाक्त्यः। अग्निः। द्विपदा विराट्। · parāśaraḥ śāktyaḥ | agniḥ | dvipadā virāṭ |

वने॑षु जा॒युर्मर्ते॑षु मि॒त्रो वृ॑णी॒ते श्रु॒ष्टिं, राजे॑वाजु॒र्यम् १क्षेमो॒ न सा॒धुः, क्रतु॒र्न भ॒द्रो भुव॑त्स्वा॒धी, र्होता॑ हव्य॒वाट्॥

vaneṣu jāyurmarteṣu mitro vṛṇīte śruṣṭiṃ, rājevājuryam 1kṣemo na sādhuḥ, kraturna bhadro bhuvatsvādhī, rhotā havyavāṭ ||

२हस्ते॒ दधा॑नो, नृ॒म्णा विश्वा॒न्यमे॑ दे॒वान् धा॒द् गुहा॑ नि॒षीद॑न् ३वि॒दन्ती॒मत्र॒, नरो॑ धियं॒धा हृ॒दा यत् त॒ष्टान् मन्त्राँ॒ अशं॑सन्॥

2haste dadhāno, nṛmṇā viśvānyame devān dhād guhā niṣīdan 3vidantīmatra, naro dhiyaṃdhā hṛdā yat taṣṭān mantrām̐ aśaṃsan ||

४अ॒जो न क्षां, दा॒धार॑ पृथि॒वीं त॒स्तम्भ॒ द्यां मन्त्रे॑भिः स॒त्यैः ५प्रि॒या प॒दानि॑, प॒श्वो नि पा॑हि वि॒श्वायु॑रग्ने, गु॒हा गुहं॑ गाः॥

4ajo na kṣāṃ, dādhāra pṛthivīṃ tastambha dyāṃ mantrebhiḥ satyaiḥ 5priyā padāni, paśvo ni pāhi viśvāyuragne, guhā guhaṃ gāḥ ||

६य ईं॑ चि॒केत॒, गुहा॒ भव॑न्त॒मा यः स॒साद॒ धारा॑मृ॒तस्य॑ ७वि ये चृ॒तन्त्यृ॒ता सप॑न्त॒ आदिद् वसू॑नि॒ प्र व॑वाचास्मै॥

6ya īṃ ciketa, guhā bhavantamā yaḥ sasāda dhārāmṛtasya 7vi ye cṛtantyṛtā sapanta ādid vasūni pra vavācāsmai ||

८वि यो वी॒रुत्सु॒, रोध॑न्महि॒त्वोत प्र॒जा, उ॒त प्र॒सूष्व॒न्तः ९चित्ति॑र॒पां, दमे॑ वि॒श्वायु॒: सद्मे॑व॒ धीरा॑:, सं॒माय॑ चक्रुः॥

8vi yo vīrutsu, rodhanmahitvota prajā, uta prasūṣvantaḥ 9cittirapāṃ, dame viśvāyu: sadmeva dhīrā:, saṃmāya cakruḥ ||