Mandala.Sukta 1.68

पराशरः शाक्त्यः। अग्निः। द्विपदा विराट्। · parāśaraḥ śāktyaḥ | agniḥ | dvipadā virāṭ |

श्री॒णन्नुप॑ स्था॒द्, दिवं॑ भुर॒ण्युः स्था॒तुश्च॒रथ॑म॒क्तून् व्यू॑र्णोत्॥

śrīṇannupa sthād, divaṃ bhuraṇyuḥ sthātuścarathamaktūn vyūrṇot ||

परि॒ यदे॑षा॒मेको॒ विश्वे॑षां॒ भुव॑द् दे॒वो, दे॒वानां॑ महि॒त्वा॥

pari yadeṣāmeko viśveṣāṃ bhuvad devo, devānāṃ mahitvā ||

आदित् ते विश्वे॒ क्रतुं॑ जुषन्त॒ शुष्का॒द् यद् दे॑व, जी॒वो जनि॑ष्ठाः॥

ādit te viśve kratuṃ juṣanta śuṣkād yad deva, jīvo janiṣṭhāḥ ||

भज॑न्त॒ विश्वे॑, देव॒त्वं नाम॑ ऋ॒तं सप॑न्तो, अ॒मृत॒मेवै॑:॥

bhajanta viśve, devatvaṃ nāma ṛtaṃ sapanto, amṛtamevai: ||

ऋ॒तस्य॒ प्रेषा॑ ऋ॒तस्य॑ धी॒तिर्वि॒श्वायु॒र्विश्वे॒ अपां॑सि चक्रुः॥

ṛtasya preṣā ṛtasya dhītirviśvāyurviśve apāṃsi cakruḥ ||

यस्तुभ्यं॒ दाशा॒द्, यो वा॑ ते॒ शिक्षा॒त् तस्मै॑ चिकि॒त्वान् र॒यिं द॑यस्व॥

yastubhyaṃ dāśād, yo vā te śikṣāt tasmai cikitvān rayiṃ dayasva ||

६॥होता॒ निष॑त्तो॒, मनो॒रप॑त्ये॒ स चि॒न्न्वा॑सां॒, पती॑ रयी॒णाम्॥

6 ||hotā niṣatto, manorapatye sa cinnvāsāṃ, patī rayīṇām ||

इ॒च्छन्त॒ रेतो॑, मि॒थस्त॒नूषु॒ सं जा॑नत॒ स्वैर्दक्षै॒रमू॑राः॥

icchanta reto, mithastanūṣu saṃ jānata svairdakṣairamūrāḥ ||

८॥पि॒तुर्न पु॒त्राः, क्रतुं॑ जुषन्त॒ श्रोष॒न् ये अ॑स्य॒, शासं॑ तु॒रास॑:॥

8 ||piturna putrāḥ, kratuṃ juṣanta śroṣan ye asya, śāsaṃ turāsa: ||

वि राय॑ और्णो॒द्, दुर॑: पुरु॒क्षुः पि॒पेश॒ नाकं॒, स्तृभि॒र्दमू॑नाः॥

vi rāya aurṇod, dura: purukṣuḥ pipeśa nākaṃ, stṛbhirdamūnāḥ ||