Mandala.Sukta 1.75

गोतमो राहूगणः। अग्निः। गायत्री। · gotamo rāhūgaṇaḥ | agniḥ | gāyatrī |

जु॒षस्व॑ स॒प्रथ॑स्तमं॒ वचो॑ दे॒वप्स॑रस्तमम् ।ह॒व्या जुह्वा॑न आ॒सनि॑॥

juṣasva saprathastamaṃ vaco devapsarastamam |havyā juhvāna āsani ||

अथा॑ ते अङ्गिरस्त॒माग्ने॑ वेधस्तम प्रि॒यम् ।वो॒चेम॒ ब्रह्म॑ सान॒सि॥

athā te aṅgirastamāgne vedhastama priyam |vocema brahma sānasi ||

कस्ते॑ जा॒मिर्जना॑ना॒मग्ने॒ को दा॒श्व॑ध्वरः ।को ह॒ कस्मि॑न्नसि श्रि॒तः॥

kaste jāmirjanānāmagne ko dāśvadhvaraḥ |ko ha kasminnasi śritaḥ ||

त्वं जा॒मिर्जना॑ना॒मग्ने॑ मि॒त्रो अ॑सि प्रि॒यः ।सखा॒ सखि॑भ्य॒ ईड्य॑:॥

tvaṃ jāmirjanānāmagne mitro asi priyaḥ |sakhā sakhibhya īḍya: ||

यजा॑ नो मि॒त्रावरु॑णा॒ यजा॑ दे॒वाँ ऋ॒तं बृ॒हत् ।अग्ने॒ यक्षि॒ स्वं दम॑म्॥

yajā no mitrāvaruṇā yajā devām̐ ṛtaṃ bṛhat |agne yakṣi svaṃ damam ||