Mandala.Sukta 1.90

गोतमो राहूगणः। विश्वेदेवाः,। गायत्री, ९ अनुष्टुप्। · gotamo rāhūgaṇaḥ | viśvedevāḥ, | gāyatrī, 9 anuṣṭup |

ऋ॒जु॒नी॒ती नो॒ वरु॑णो मि॒त्रो न॑यतु वि॒द्वान् ।अ॒र्य॒मा दे॒वैः स॒जोषा॑:॥

ṛjunītī no varuṇo mitro nayatu vidvān |aryamā devaiḥ sajoṣā: ||

ते हि वस्वो॒ वस॑वाना॒स्ते अप्र॑मूरा॒ महो॑भिः ।व्र॒ता र॑क्षन्ते वि॒श्वाहा॑॥

te hi vasvo vasavānāste apramūrā mahobhiḥ |vratā rakṣante viśvāhā ||

ते अ॒स्मभ्यं॒ शर्म॑ यंसन्न॒मृता॒ मर्त्ये॑भ्यः ।बाध॑माना॒ अप॒ द्विष॑:॥

te asmabhyaṃ śarma yaṃsannamṛtā martyebhyaḥ |bādhamānā apa dviṣa: ||

वि न॑: प॒थः सु॑वि॒ताय॑ चि॒यन्त्विन्द्रो॑ म॒रुत॑: ।पू॒षा भगो॒ वन्द्या॑सः॥

vi na: pathaḥ suvitāya ciyantvindro maruta: |pūṣā bhago vandyāsaḥ ||

उ॒त नो॒ धियो॒ गोअ॑ग्रा॒: पूष॒न् विष्ण॒वेव॑यावः ।कर्ता॑ नः स्वस्ति॒मत॑:॥

uta no dhiyo goagrā: pūṣan viṣṇavevayāvaḥ |kartā naḥ svastimata: ||

मधु॒ वाता॑ ऋताय॒ते मधु॑ क्षरन्ति॒ सिन्ध॑वः ।माध्वी॑र्नः स॒न्त्वोष॑धीः॥

madhu vātā ṛtāyate madhu kṣaranti sindhavaḥ |mādhvīrnaḥ santvoṣadhīḥ ||

मधु॒ नक्त॑मु॒तोषसो॒ मधु॑म॒त् पार्थि॑वं॒ रज॑: ।मधु॒ द्यौर॑स्तु नः पि॒ता॥

madhu naktamutoṣaso madhumat pārthivaṃ raja: |madhu dyaurastu naḥ pitā ||

मधु॑मान्नो॒ वन॒स्पति॒र्मधु॑माँ अस्तु॒ सूर्य॑: ।माध्वी॒र्गावो॑ भवन्तु नः॥

madhumānno vanaspatirmadhumām̐ astu sūrya: |mādhvīrgāvo bhavantu naḥ ||

शं नो॑ मि॒त्रः शं वरु॑ण॒: शं नो॑ भवत्वर्य॒मा ।शं न॒ इन्द्रो॒ बृह॒स्पति॒: शं नो॒ विष्णु॑रुरुक्र॒मः॥

śaṃ no mitraḥ śaṃ varuṇa: śaṃ no bhavatvaryamā |śaṃ na indro bṛhaspati: śaṃ no viṣṇururukramaḥ ||