Mandala.Sukta 1.93

गोतमो राहूगणः। अग्निषोमौ। १-३ अनुष्टुप्, ४-७, १२ त्रिष्टुप्, ८ जगती त्रिष्टुब्वा, ९-११ गायत्री । · gotamo rāhūgaṇaḥ | agniṣomau | 1-3 anuṣṭup, 4-7, 12 triṣṭup, 8 jagatī triṣṭubvā, 9-11 gāyatrī |

अग्नी॑षोमावि॒मं सु मे॑ शृणु॒तं वृ॑षणा॒ हव॑म् ।प्रति॑ सू॒क्तानि॑ हर्यतं॒ भव॑तं दा॒शुषे॒ मय॑:॥

agnīṣomāvimaṃ su me śṛṇutaṃ vṛṣaṇā havam |prati sūktāni haryataṃ bhavataṃ dāśuṣe maya: ||

अग्नी॑षोमा॒ यो अ॒द्य वा॑मि॒दं वच॑: सप॒र्यति॑ ।तस्मै॑ धत्तं सु॒वीर्यं॒ गवां॒ पोषं॒ स्वश्व्य॑म्॥

agnīṣomā yo adya vāmidaṃ vaca: saparyati |tasmai dhattaṃ suvīryaṃ gavāṃ poṣaṃ svaśvyam ||

अग्नी॑षोमा॒ य आहु॑तिं॒ यो वां॒ दाशा॑द्ध॒विष्कृ॑तिम् ।स प्र॒जया॑ सु॒वीर्यं॒ विश्व॒मायु॒र्व्य॑श्नवत्॥

agnīṣomā ya āhutiṃ yo vāṃ dāśāddhaviṣkṛtim |sa prajayā suvīryaṃ viśvamāyurvyaśnavat ||

अग्नी॑षोमा॒ चेति॒ तद् वी॒र्यं॑ वां॒ यदमु॑ष्णीतमव॒सं प॒णिं गाः ।अवा॑तिरतं॒ बृस॑यस्य॒ शेषो ऽवि॑न्दतं॒ ज्योति॒रेकं॑ ब॒हुभ्य॑:॥

agnīṣomā ceti tad vīryaṃ vāṃ yadamuṣṇītamavasaṃ paṇiṃ gāḥ |avātirataṃ bṛsayasya śeṣo 'vindataṃ jyotirekaṃ bahubhya: ||

यु॒वमे॒तानि॑ दि॒वि रो॑च॒नान्य॒ग्निश्च॑ सोम॒ सक्र॑तू अधत्तम् ।यु॒वं सिन्धूँ॑र॒भिश॑स्तेरव॒द्यादग्नी॑षोमा॒वमु॑ञ्चतं गृभी॒तान्॥

yuvametāni divi rocanānyagniśca soma sakratū adhattam |yuvaṃ sindhūm̐rabhiśasteravadyādagnīṣomāvamuñcataṃ gṛbhītān ||

आन्यं दि॒वो मा॑त॒रिश्वा॑ जभा॒राम॑थ्नाद॒न्यं परि॑ श्ये॒नो अद्रे॑: ।अग्नी॑षोमा॒ ब्रह्म॑णा वावृधा॒नोरुं य॒ज्ञाय॑ चक्रथुरु लो॒कम्॥

ānyaṃ divo mātariśvā jabhārāmathnādanyaṃ pari śyeno adre: |agnīṣomā brahmaṇā vāvṛdhānoruṃ yajñāya cakrathuru lokam ||

अग्नी॑षोमा ह॒विष॒: प्रस्थि॑तस्य वी॒तं हर्य॑तं वृषणा जु॒षेथा॑म् ।सु॒शर्मा॑णा॒ स्वव॑सा॒ हि भू॒तमथा॑ धत्तं॒ यज॑मानाय॒ शं योः॥

agnīṣomā haviṣa: prasthitasya vītaṃ haryataṃ vṛṣaṇā juṣethām |suśarmāṇā svavasā hi bhūtamathā dhattaṃ yajamānāya śaṃ yoḥ ||

यो अ॒ग्नीषोमा॑ ह॒विषा॑ सप॒र्याद् दे॑व॒द्रीचा॒ मन॑सा॒ यो घृ॒तेन॑ ।तस्य॑ व्र॒तं र॑क्षतं पा॒तमंह॑सो वि॒शे जना॑य॒ महि॒ शर्म॑ यच्छतम्॥

yo agnīṣomā haviṣā saparyād devadrīcā manasā yo ghṛtena |tasya vrataṃ rakṣataṃ pātamaṃhaso viśe janāya mahi śarma yacchatam ||

अग्नी॑षोमा॒ सवे॑दसा॒ सहू॑ती वनतं॒ गिर॑: ।सं दे॑व॒त्रा ब॑भूवथुः॥

agnīṣomā savedasā sahūtī vanataṃ gira: |saṃ devatrā babhūvathuḥ ||

अग्नी॑षोमाव॒नेन॑ वां॒ यो वां॑ घृ॒तेन॒ दाश॑ति ।तस्मै॑ दीदयतं बृ॒हत्॥

agnīṣomāvanena vāṃ yo vāṃ ghṛtena dāśati |tasmai dīdayataṃ bṛhat ||

अग्नी॑षोमावि॒मानि॑ नो यु॒वं ह॒व्या जु॑जोषतम् ।आ या॑त॒मुप॑ न॒: सचा॑॥

agnīṣomāvimāni no yuvaṃ havyā jujoṣatam |ā yātamupa na: sacā ||

अग्नी॑षोमा पिपृ॒तमर्व॑तो न॒ आ प्या॑यन्तामु॒स्रिया॑ हव्य॒सूद॑: ।अ॒स्मे बला॑नि म॒घव॑त्सु धत्तं कृणु॒तं नो॑ अध्व॒रं श्रु॑ष्टि॒मन्त॑म्॥

agnīṣomā pipṛtamarvato na ā pyāyantāmusriyā havyasūda: |asme balāni maghavatsu dhattaṃ kṛṇutaṃ no adhvaraṃ śruṣṭimantam ||