Mandala.Sukta 1.94

कुत्स आङ्गिरसः। अग्निः(जातवेदाः), ८ (त्रयः पादाः) देवाः, १६ उत्तरार्धस्य अग्निः, मित्रवरुणादितिसिन्धु पृथिवीद्यावो वा। जगती, १५-१६ त्रिष्टुप् । · kutsa āṅgirasaḥ | agniḥ(jātavedāḥ), 8 (trayaḥ pādāḥ) devāḥ, 16 uttarārdhasya agniḥ, mitravaruṇāditisindhu pṛthivīdyāvo vā | jagatī, 15-16 triṣṭup |

इ॒मं स्तोम॒मर्ह॑ते जा॒तवे॑दसे॒ रथ॑मिव॒ सं म॑हेमा मनी॒षया॑ ।भ॒द्रा हि न॒: प्रम॑तिरस्य सं॒सद्यग्ने॑ स॒ख्ये मा रि॑षामा व॒यं तव॑॥

imaṃ stomamarhate jātavedase rathamiva saṃ mahemā manīṣayā |bhadrā hi na: pramatirasya saṃsadyagne sakhye mā riṣāmā vayaṃ tava ||

यस्मै॒ त्वमा॒यज॑से॒ स सा॑धत्यन॒र्वा क्षे॑ति॒ दध॑ते सु॒वीर्य॑म् ।स तू॑ताव॒ नैन॑मश्नोत्यंह॒तिरग्ने॑ स॒ख्ये मा रि॑षामा व॒यं तव॑॥

yasmai tvamāyajase sa sādhatyanarvā kṣeti dadhate suvīryam |sa tūtāva nainamaśnotyaṃhatiragne sakhye mā riṣāmā vayaṃ tava ||

श॒केम॑ त्वा स॒मिधं॑ सा॒धया॒ धिय॒स्त्वे दे॒वा ह॒विर॑द॒न्त्याहु॑तम् ।त्वमा॑दि॒त्याँ आ व॑ह॒ तान्ह्यु १ श्मस्यग्ने॑ स॒ख्ये मा रि॑षामा व॒यं तव॑॥

śakema tvā samidhaṃ sādhayā dhiyastve devā haviradantyāhutam |tvamādityām̐ ā vaha tānhyu 1 śmasyagne sakhye mā riṣāmā vayaṃ tava ||

भरा॑मे॒ध्मं कृ॒णवा॑मा ह॒वींषि॑ ते चि॒तय॑न्त॒: पर्व॑णापर्वणा व॒यम् ।जी॒वात॑वे प्रत॒रं सा॑धया॒ धियो ऽग्ने॑ स॒ख्ये मा रि॑षामा व॒यं तव॑॥

bharāmedhmaṃ kṛṇavāmā havīṃṣi te citayanta: parvaṇāparvaṇā vayam |jīvātave prataraṃ sādhayā dhiyo 'gne sakhye mā riṣāmā vayaṃ tava ||

वि॒शां गो॒पा अ॑स्य चरन्ति ज॒न्तवो॑ द्वि॒पच्च॒ यदु॒त चतु॑ष्पद॒क्तुभि॑: ।चि॒त्रः प्र॑के॒त उ॒षसो॑ म॒हाँ अ॒स्यग्ने॑ स॒ख्ये मा रि॑षामा व॒यं तव॑॥

viśāṃ gopā asya caranti jantavo dvipacca yaduta catuṣpadaktubhi: |citraḥ praketa uṣaso mahām̐ asyagne sakhye mā riṣāmā vayaṃ tava ||

त्वम॑ध्व॒र्युरु॒त होता॑सि पू॒र्व्यः प्र॑शा॒स्ता पोता॑ ज॒नुषा॑ पु॒रोहि॑तः ।विश्वा॑ वि॒द्वाँ आर्त्वि॑ज्या धीर पुष्य॒स्यग्ने॑ स॒ख्ये मा रि॑षामा व॒यं तव॑॥

tvamadhvaryuruta hotāsi pūrvyaḥ praśāstā potā januṣā purohitaḥ |viśvā vidvām̐ ārtvijyā dhīra puṣyasyagne sakhye mā riṣāmā vayaṃ tava ||

यो वि॒श्वत॑: सु॒प्रती॑कः स॒दृङ्ङसि॑ दू॒रे चि॒त्सन्त॒ळिदि॒वाति॑ रोचसे ।रात्र्या॑श्चि॒दन्धो॒ अति॑ देव पश्य॒स्यग्ने॑ स॒ख्ये मा रि॑षामा व॒यं तव॑॥

yo viśvata: supratīkaḥ sadṛṅṅasi dūre citsantaḷidivāti rocase |rātryāścidandho ati deva paśyasyagne sakhye mā riṣāmā vayaṃ tava ||

पूर्वो॑ देवा भवतु सुन्व॒तो रथो॒ ऽस्माकं॒ शंसो॑ अ॒भ्य॑स्तु दू॒ढ्य॑: ।तदा जा॑नीतो॒त पु॑ष्यता॒ वचो ऽग्ने॑ स॒ख्ये मा रि॑षामा व॒यं तव॑॥

pūrvo devā bhavatu sunvato ratho 'smākaṃ śaṃso abhyastu dūḍhya: |tadā jānītota puṣyatā vaco 'gne sakhye mā riṣāmā vayaṃ tava ||

व॒धैर्दु॒:शंसाँ॒ अप॑ दू॒ढ्यो॑ जहि दू॒रे वा॒ ये अन्ति॑ वा॒ के चि॑द॒त्रिण॑: ।अथा॑ य॒ज्ञाय॑ गृण॒ते सु॒गं कृ॒ध्यग्ने॑ स॒ख्ये मा रि॑षामा व॒यं तव॑॥

vadhairdu:śaṃsām̐ apa dūḍhyo jahi dūre vā ye anti vā ke cidatriṇa: |athā yajñāya gṛṇate sugaṃ kṛdhyagne sakhye mā riṣāmā vayaṃ tava ||

यदयु॑क्था अरु॒षा रोहि॑ता॒ रथे॒ वात॑जूता वृष॒भस्ये॑व ते॒ रव॑: ।आदि॑न्वसि व॒निनो॑ धू॒मके॑तु॒ना ऽग्ने॑ स॒ख्ये मा रि॑षामा व॒यं तव॑॥

yadayukthā aruṣā rohitā rathe vātajūtā vṛṣabhasyeva te rava: |ādinvasi vanino dhūmaketunā 'gne sakhye mā riṣāmā vayaṃ tava ||

अध॑ स्व॒नादु॒त बि॑भ्युः पत॒त्रिणो॑ द्र॒प्सा यत्ते॑ यव॒सादो॒ व्यस्थि॑रन् ।सु॒गं तत्ते॑ ताव॒केभ्यो॒ रथे॒भ्यो ऽग्ने॑ स॒ख्ये मा रि॑षामा व॒यं तव॑॥

adha svanāduta bibhyuḥ patatriṇo drapsā yatte yavasādo vyasthiran |sugaṃ tatte tāvakebhyo rathebhyo 'gne sakhye mā riṣāmā vayaṃ tava ||

अ॒यं मि॒त्रस्य॒ वरु॑णस्य॒ धाय॑से ऽवया॒तां म॒रुतां॒ हेळो॒ अद्भु॑तः ।मृ॒ळा सु नो॒ भूत्वे॑षां॒ मन॒: पुन॒रग्ने॑ स॒ख्ये मा रि॑षामा व॒यं तव॑॥

ayaṃ mitrasya varuṇasya dhāyase 'vayātāṃ marutāṃ heḷo adbhutaḥ |mṛḷā su no bhūtveṣāṃ mana: punaragne sakhye mā riṣāmā vayaṃ tava ||

दे॒वो दे॒वाना॑मसि मि॒त्रो अद्भु॑तो॒ वसु॒र्वसू॑नामसि॒ चारु॑रध्व॒रे ।शर्म॑न्त्स्याम॒ तव॑ स॒प्रथ॑स्त॒मे ऽग्ने॑ स॒ख्ये मा रि॑षामा व॒यं तव॑॥

devo devānāmasi mitro adbhuto vasurvasūnāmasi cāruradhvare |śarmantsyāma tava saprathastame 'gne sakhye mā riṣāmā vayaṃ tava ||

तत्ते॑ भ॒द्रं यत् समि॑द्ध॒: स्वे दमे॒ सोमा॑हुतो॒ जर॑से मृळ॒यत्त॑मः ।दधा॑सि॒ रत्नं॒ द्रवि॑णं च दा॒शुषे ऽग्ने॑ स॒ख्ये मा रि॑षामा व॒यं तव॑॥

tatte bhadraṃ yat samiddha: sve dame somāhuto jarase mṛḷayattamaḥ |dadhāsi ratnaṃ draviṇaṃ ca dāśuṣe 'gne sakhye mā riṣāmā vayaṃ tava ||

यस्मै॒ त्वं सु॑द्रविणो॒ ददा॑शो ऽनागा॒स्त्वम॑दिते स॒र्वता॑ता ।यं भ॒द्रेण॒ शव॑सा चो॒दया॑सि प्र॒जाव॑ता॒ राध॑सा॒ ते स्या॑म॥

yasmai tvaṃ sudraviṇo dadāśo 'nāgāstvamadite sarvatātā |yaṃ bhadreṇa śavasā codayāsi prajāvatā rādhasā te syāma ||

स त्वम॑ग्ने सौभग॒त्वस्य॑ वि॒द्वान॒स्माक॒मायु॒: प्र ति॑रे॒ह दे॑व ।तन्नो॑ मि॒त्रो वरु॑णो मामहन्ता॒मदि॑ति॒: सिन्धु॑: पृथि॒वी उ॒त द्यौः॥

sa tvamagne saubhagatvasya vidvānasmākamāyu: pra tireha deva |tanno mitro varuṇo māmahantāmaditi: sindhu: pṛthivī uta dyauḥ ||