Mandala.Sukta 10.159

पौलोमी शची। शची (आत्मानं तुष्टाव)। अनुष्टुप्। · paulomī śacī | śacī (ātmānaṃ tuṣṭāva) | anuṣṭup |

उद॒सौ सूर्यो॑ अगा॒दुद॒यं मा॑म॒को भग॑: ।अ॒हं तद्वि॑द्व॒ला पति॑म॒भ्य॑साक्षि विषास॒हिः॥

udasau sūryo agādudayaṃ māmako bhaga: |ahaṃ tadvidvalā patimabhyasākṣi viṣāsahiḥ ||

अ॒हं के॒तुर॒हं मू॒र्धाऽहमु॒ग्रा वि॒वाच॑नी ।ममेदनु॒ क्रतुं॒ पति॑: सेहा॒नाया॑ उ॒पाच॑रेत्॥

ahaṃ keturahaṃ mūrdhā'hamugrā vivācanī |mamedanu kratuṃ pati: sehānāyā upācaret ||

मम॑ पु॒त्राः श॑त्रु॒हणोऽथो॑ मे दुहि॒ता वि॒राट् ।उ॒ताहम॑स्मि संज॒या पत्यौ॑ मे॒ श्लोक॑ उत्त॒मः॥

mama putrāḥ śatruhaṇo'tho me duhitā virāṭ |utāhamasmi saṃjayā patyau me śloka uttamaḥ ||

येनेन्द्रो॑ ह॒विषा॑ कृ॒त्व्यभ॑वद्द्यु॒म्न्यु॑त्त॒मः ।इ॒दं तद॑क्रि देवा असप॒त्ना किला॑भुवम्॥

yenendro haviṣā kṛtvyabhavaddyumnyuttamaḥ |idaṃ tadakri devā asapatnā kilābhuvam ||

अ॒स॒प॒त्ना स॑पत्न॒घ्नी जय॑न्त्यभि॒भूव॑री ।आवृ॑क्षम॒न्यासां॒ वर्चो॒ राधो॒ अस्थे॑यसामिव॥

asapatnā sapatnaghnī jayantyabhibhūvarī |āvṛkṣamanyāsāṃ varco rādho astheyasāmiva ||

सम॑जैषमि॒मा अ॒हं स॒पत्नी॑रभि॒भूव॑री ।यथा॒हम॒स्य वी॒रस्य॑ वि॒राजा॑नि॒ जन॑स्य च॥

samajaiṣamimā ahaṃ sapatnīrabhibhūvarī |yathāhamasya vīrasya virājāni janasya ca ||