Mandala.Sukta 10.161

प्राजापत्यो यक्ष्मनाशनः।इन्द्राग्नी, राजयक्ष्मघ्नं वा। त्रिष्टुप् , ५ अनुष्टुप्। · prājāpatyo yakṣmanāśanaḥ |indrāgnī, rājayakṣmaghnaṃ vā | triṣṭup , 5 anuṣṭup |

मु॒ञ्चामि॑ त्वा ह॒विषा॒ जीव॑नाय॒ कम॑ज्ञातय॒क्ष्मादु॒त रा॑जय॒क्ष्मात् ।ग्राहि॑र्ज॒ग्राह॒ यदि॑ वै॒तदे॑नं॒ तस्या॑ इन्द्राग्नी॒ प्र मु॑मुक्तमेनम्॥

muñcāmi tvā haviṣā jīvanāya kamajñātayakṣmāduta rājayakṣmāt |grāhirjagrāha yadi vaitadenaṃ tasyā indrāgnī pra mumuktamenam ||

यदि॑ क्षि॒तायु॒र्यदि॑ वा॒ परे॑तो॒ यदि॑ मृ॒त्योर॑न्ति॒कं नी॑त ए॒व ।तमा ह॑रामि॒ निॠ॑तेरु॒पस्था॒दस्पा॑र्षमेनं श॒तशा॑रदाय॥

yadi kṣitāyuryadi vā pareto yadi mṛtyorantikaṃ nīta eva |tamā harāmi niṝterupasthādaspārṣamenaṃ śataśāradāya ||

स॒ह॒स्रा॒क्षेण॑ श॒तशा॑रदेन श॒तायु॑षा ह॒विषाहा॑र्षमेनम् ।श॒तं यथे॒मं श॒रदो॒ नया॒तीन्द्रो॒ विश्व॑स्य दुरि॒तस्य॑ पा॒रम्॥

sahasrākṣeṇa śataśāradena śatāyuṣā haviṣāhārṣamenam |śataṃ yathemaṃ śarado nayātīndro viśvasya duritasya pāram ||

श॒तं जी॑व श॒रदो॒ वर्ध॑मानः श॒तं हे॑म॒न्ताञ्छ॒तमु॑ वस॒न्तान् ।श॒तमि॑न्द्रा॒ग्नी स॑वि॒ता बृह॒स्पति॑: श॒तायु॑षा ह॒विषे॒मं पुन॑र्दुः॥

śataṃ jīva śarado vardhamānaḥ śataṃ hemantāñchatamu vasantān |śatamindrāgnī savitā bṛhaspati: śatāyuṣā haviṣemaṃ punarduḥ ||

आहा॑र्षं॒ त्वावि॑दं त्वा॒ पुन॒रागा॑: पुनर्नव ।सर्वा॑ङ्ग॒ सर्वं॑ ते॒ चक्षु॒: सर्व॒मायु॑श्च तेऽविदम्॥

āhārṣaṃ tvāvidaṃ tvā punarāgā: punarnava |sarvāṅga sarvaṃ te cakṣu: sarvamāyuśca te'vidam ||