Mandala.Sukta 10.33

कवष ऐलूषः। १ विश्वेदेवाः, २-३ इन्द्रः, ४-५ कुरुश्रवणस्त्रासदस्यवः, ६-९ उपमश्रवा मैत्रातिथिः। १ त्रिष्टुप् , प्रगाथः = ( २ बृहती, ३ सतोबृहती ),४-९ गायत्री । · kavaṣa ailūṣaḥ | 1 viśvedevāḥ, 2-3 indraḥ, 4-5 kuruśravaṇastrāsadasyavaḥ, 6-9 upamaśravā maitrātithiḥ | 1 triṣṭup , pragāthaḥ = ( 2 bṛhatī, 3 satobṛhatī ),4-9 gāyatrī |

प्र मा॑ युयुज्रे प्र॒युजो॒ जना॑नां॒ वहा॑मि स्म पू॒षण॒मन्त॑रेण ।विश्वे॑ दे॒वासो॒ अध॒ माम॑रक्षन्दु॒:शासु॒रागा॒दिति॒ घोष॑ आसीत्॥

pra mā yuyujre prayujo janānāṃ vahāmi sma pūṣaṇamantareṇa |viśve devāso adha māmarakṣandu:śāsurāgāditi ghoṣa āsīt ||

सं मा॑ तपन्त्य॒भित॑: स॒पत्नी॑रिव॒ पर्श॑वः ।नि बा॑धते॒ अम॑तिर्न॒ग्नता॒ जसु॒र्वेर्न वे॑वीयते म॒तिः॥

saṃ mā tapantyabhita: sapatnīriva parśavaḥ |ni bādhate amatirnagnatā jasurverna vevīyate matiḥ ||

मूषो॒ न शि॒श्ना व्य॑दन्ति मा॒ध्य॑ स्तो॒तारं॑ ते शतक्रतो ।स॒कृत्सु नो॑ मघवन्निन्द्र मृळ॒याऽधा॑ पि॒तेव॑ नो भव॥

mūṣo na śiśnā vyadanti mādhya stotāraṃ te śatakrato |sakṛtsu no maghavannindra mṛḷayā'dhā piteva no bhava ||

कु॒रु॒श्रव॑णमावृणि॒ राजा॑नं॒ त्रास॑दस्यवम् ।मंहि॑ष्ठं वा॒घता॒मृषि॑:॥

kuruśravaṇamāvṛṇi rājānaṃ trāsadasyavam |maṃhiṣṭhaṃ vāghatāmṛṣi: ||

यस्य॑ मा ह॒रितो॒ रथे॑ ति॒स्रो वह॑न्ति साधु॒या ।स्तवै॑ स॒हस्र॑दक्षिणे॥

yasya mā harito rathe tisro vahanti sādhuyā |stavai sahasradakṣiṇe ||

यस्य॒ प्रस्वा॑दसो॒ गिर॑ उप॒मश्र॑वसः पि॒तुः ।क्षेत्रं॒ न र॒ण्वमू॒चुषे॑॥

yasya prasvādaso gira upamaśravasaḥ pituḥ |kṣetraṃ na raṇvamūcuṣe ||

अधि॑ पुत्रोपमश्रवो॒ नपा॑न्मित्रातिथेरिहि ।पि॒तुष्टे॑ अस्मि वन्दि॒ता॥

adhi putropamaśravo napānmitrātitherihi |pituṣṭe asmi vanditā ||

यदीशी॑या॒मृता॑नामु॒त वा॒ मर्त्या॑नाम् ।जीवे॒दिन्म॒घवा॒ मम॑॥

yadīśīyāmṛtānāmuta vā martyānām |jīvedinmaghavā mama ||

न दे॒वाना॒मति॑ व्र॒तं श॒तात्मा॑ च॒न जी॑वति ।तथा॑ यु॒जा वि वा॑वृते॥

na devānāmati vrataṃ śatātmā cana jīvati |tathā yujā vi vāvṛte ||