Mandala.Sukta 10.9

त्रिशिरास्त्वाष्ट्रः,सिन्धुद्वीप आम्बरीषो वा। आपः। गायत्री,५ वर्धमाना गायत्री, ७ प्रतिष्ठा गायत्री, ८ -९ अनुष्टुप्। · triśirāstvāṣṭraḥ,sindhudvīpa āmbarīṣo vā | āpaḥ | gāyatrī,5 vardhamānā gāyatrī, 7 pratiṣṭhā gāyatrī, 8 -9 anuṣṭup |

आपो॒ हि ष्ठा म॑यो॒भुव॒स्ता न॑ ऊ॒र्जे द॑धातन ।म॒हे रणा॑य॒ चक्ष॑से॥

āpo hi ṣṭhā mayobhuvastā na ūrje dadhātana |mahe raṇāya cakṣase ||

यो व॑: शि॒वत॑मो॒ रस॒स्तस्य॑ भाजयते॒ह न॑: ।उ॒श॒तीरि॑व मा॒तर॑:॥

yo va: śivatamo rasastasya bhājayateha na: |uśatīriva mātara: ||

तस्मा॒ अरं॑ गमाम वो॒ यस्य॒ क्षया॑य॒ जिन्व॑थ ।आपो॑ ज॒नय॑था च नः॥

tasmā araṃ gamāma vo yasya kṣayāya jinvatha |āpo janayathā ca naḥ ||

शं नो॑ दे॒वीर॒भिष्ट॑य॒ आपो॑ भवन्तु पी॒तये॑ ।शं योर॒भि स्र॑वन्तु नः॥

śaṃ no devīrabhiṣṭaya āpo bhavantu pītaye |śaṃ yorabhi sravantu naḥ ||

ईशा॑ना॒ वार्या॑णां॒ क्षय॑न्तीश्चर्षणी॒नाम् ।अ॒पो या॑चामि भेष॒जम्॥

īśānā vāryāṇāṃ kṣayantīścarṣaṇīnām |apo yācāmi bheṣajam ||

अ॒प्सु मे॒ सोमो॑ अब्रवीद॒न्तर्विश्वा॑नि भेष॒जा ।अ॒ग्निं च॑ वि॒श्वश॑म्भुवम्॥

apsu me somo abravīdantarviśvāni bheṣajā |agniṃ ca viśvaśambhuvam ||

आप॑: पृणी॒त भे॑ष॒जं वरू॑थं त॒न्वे॒३ मम॑ ।ज्योक्च॒ सूर्यं॑ दृ॒शे॥

āpa: pṛṇīta bheṣajaṃ varūthaṃ tanve3 mama |jyokca sūryaṃ dṛśe ||

इ॒दमा॑प॒: प्र व॑हत॒ यत्किं च॑ दुरि॒तं मयि॑ ।यद्वा॒हम॑भिदु॒द्रोह॒ यद्वा॑ शे॒प उ॒तानृ॑तम्॥

idamāpa: pra vahata yatkiṃ ca duritaṃ mayi |yadvāhamabhidudroha yadvā śepa utānṛtam ||

आपो॑ अ॒द्यान्व॑चारिषं॒ रसे॑न॒ सम॑गस्महि ।पय॑स्वानग्न॒ आ ग॑हि॒ तं मा॒ सं सृ॑ज॒ वर्च॑सा॥

āpo adyānvacāriṣaṃ rasena samagasmahi |payasvānagna ā gahi taṃ mā saṃ sṛja varcasā ||