Mandala.Sukta 2.40

गृत्समद (आङ्गिरसः शौनहोत्रः पश्चाद्) भार्गवः शौनकः। सोमापूषणौ, ६(अन्त्यार्धर्चस्य) अदितिः। त्रिष्टुप्। · gṛtsamada (āṅgirasaḥ śaunahotraḥ paścād) bhārgavaḥ śaunakaḥ | somāpūṣaṇau, 6(antyārdharcasya) aditiḥ | triṣṭup |

सोमा॑पूषणा॒ जन॑ना रयी॒णां जन॑ना दि॒वो जन॑ना पृथि॒व्याः ।जा॒तौ विश्व॑स्य॒ भुव॑नस्य गो॒पौ दे॒वा अ॑कृण्वन्न॒मृत॑स्य॒ नाभि॑म्॥

somāpūṣaṇā jananā rayīṇāṃ jananā divo jananā pṛthivyāḥ |jātau viśvasya bhuvanasya gopau devā akṛṇvannamṛtasya nābhim ||

इ॒मौ दे॒वौ जाय॑मानौ जुषन्ते॒मौ तमां॑सि गूहता॒मजु॑ष्टा ।आ॒भ्यामिन्द्र॑: प॒क्वमा॒मास्व॒न्तः सो॑मापू॒षभ्यां॑ जनदु॒स्रिया॑सु॥

imau devau jāyamānau juṣantemau tamāṃsi gūhatāmajuṣṭā |ābhyāmindra: pakvamāmāsvantaḥ somāpūṣabhyāṃ janadusriyāsu ||

सोमा॑पूषणा॒ रज॑सो वि॒मानं॑ स॒प्तच॑क्रं॒ रथ॒मवि॑श्वमिन्वम् ।वि॒षू॒वृतं॒ मन॑सा यु॒ज्यमा॑नं॒ तं जि॑न्वथो वृषणा॒ पञ्च॑रश्मिम्॥

somāpūṣaṇā rajaso vimānaṃ saptacakraṃ rathamaviśvaminvam |viṣūvṛtaṃ manasā yujyamānaṃ taṃ jinvatho vṛṣaṇā pañcaraśmim ||

दि॒व्य१न्यः सद॑नं च॒क्र उ॒च्चा पृ॑थि॒व्याम॒न्यो अध्य॒न्तरि॑क्षे ।ताव॒स्मभ्यं॑ पुरु॒वारं॑ पुरु॒क्षुं रा॒यस्पोषं॒ वि ष्य॑तां॒ नाभि॑म॒स्मे॥

divya1nyaḥ sadanaṃ cakra uccā pṛthivyāmanyo adhyantarikṣe |tāvasmabhyaṃ puruvāraṃ purukṣuṃ rāyaspoṣaṃ vi ṣyatāṃ nābhimasme ||

विश्वा॑न्य॒न्यो भुव॑ना ज॒जान॒ विश्व॑म॒न्यो अ॑भि॒चक्षा॑ण एति ।सोमा॑पूषणा॒वव॑तं॒ धियं॑ मे यु॒वाभ्यां॒ विश्वा॒: पृत॑ना जयेम॥

viśvānyanyo bhuvanā jajāna viśvamanyo abhicakṣāṇa eti |somāpūṣaṇāvavataṃ dhiyaṃ me yuvābhyāṃ viśvā: pṛtanā jayema ||

धियं॑ पू॒षा जि॑न्वतु विश्वमि॒न्वो र॒यिं सोमो॑ रयि॒पति॑र्दधातु ।अव॑तु दे॒व्यदि॑तिरन॒र्वा बृ॒हद् व॑देम वि॒दथे॑ सु॒वीरा॑:॥

dhiyaṃ pūṣā jinvatu viśvaminvo rayiṃ somo rayipatirdadhātu |avatu devyaditiranarvā bṛhad vadema vidathe suvīrā: ||