Mandala.Sukta 2.41

गृत्समद (आङ्गिरसः शौनहोत्रः पश्चाद्) भार्गवः शौनकः। १-२ वायुः, ३ इंद्रवायू, ४-६ मित्रावरुणौ, ७-९ अश्विनौ, १०-१२ इन्द्रः, १३-१५ विश्वेदेवाः, १६-१८ सरस्वती, १९-२१ द्यावापृथिव्यौ हविर्धाने वाः (१९ तृतीयपादस्य अग्निर्वा)।गायत्री, १६-१७ अनुष्टुप्, १८ बृहती। · gṛtsamada (āṅgirasaḥ śaunahotraḥ paścād) bhārgavaḥ śaunakaḥ | 1-2 vāyuḥ, 3 iṃdravāyū, 4-6 mitrāvaruṇau, 7-9 aśvinau, 10-12 indraḥ, 13-15 viśvedevāḥ, 16-18 sarasvatī, 19-21 dyāvāpṛthivyau havirdhāne vāḥ (19 tṛtīyapādasya agnirvā) |gāyatrī, 16-17 anuṣṭup, 18 bṛhatī |

वायो॒ ये ते॑ सह॒स्रिणो॒ रथा॑स॒स्तेभि॒रा ग॑हि ।नि॒युत्वा॒न्त्सोम॑पीतये॥

vāyo ye te sahasriṇo rathāsastebhirā gahi |niyutvāntsomapītaye ||

नि॒युत्वा॑न् वाय॒वा ग॑ह्य॒यं शु॒क्रो अ॑यामि ते ।गन्ता॑सि सुन्व॒तो गृ॒हम्॥

niyutvān vāyavā gahyayaṃ śukro ayāmi te |gantāsi sunvato gṛham ||

शु॒क्रस्या॒द्य गवा॑शिर॒ इन्द्र॑वायू नि॒युत्व॑तः ।आ या॑तं॒ पिब॑तं नरा॥

śukrasyādya gavāśira indravāyū niyutvataḥ |ā yātaṃ pibataṃ narā ||

अ॒यं वां॑ मित्रावरुणा सु॒तः सोम॑ ऋतावृधा ।ममेदि॒ह श्रु॑तं॒ हव॑म्॥

ayaṃ vāṃ mitrāvaruṇā sutaḥ soma ṛtāvṛdhā |mamediha śrutaṃ havam ||

राजा॑ना॒वन॑भिद्रुहा ध्रु॒वे सद॑स्युत्त॒मे ।स॒हस्र॑स्थूण आसाते॥

rājānāvanabhidruhā dhruve sadasyuttame |sahasrasthūṇa āsāte ||

ता स॒म्राजा॑ घृ॒तासु॑ती आदि॒त्या दानु॑न॒स्पती॑ ।सचे॑ते॒ अन॑वह्वरम्॥

tā samrājā ghṛtāsutī ādityā dānunaspatī |sacete anavahvaram ||

गोम॑दू॒ षु ना॑स॒त्याश्वा॑वद्यातमश्विना ।व॒र्ती रु॑द्रा नृ॒पाय्य॑म्॥

gomadū ṣu nāsatyāśvāvadyātamaśvinā |vartī rudrā nṛpāyyam ||

न यत् परो॒ नान्त॑र आद॒धर्ष॑द् वृषण्वसू ।दु॒:शंसो॒ मर्त्यो॑ रि॒पुः॥

na yat paro nāntara ādadharṣad vṛṣaṇvasū |du:śaṃso martyo ripuḥ ||

ता न॒ आ वो॑ळहमश्विना र॒यिं पि॒शङ्ग॑संदृशम् ।धिष्ण्या॑ वरिवो॒विद॑म्॥

tā na ā voḷahamaśvinā rayiṃ piśaṅgasaṃdṛśam |dhiṣṇyā varivovidam ||

इन्द्रो॑ अ॒ङ्ग म॒हद् भ॒यम॒भी षदप॑ चुच्यवत् ।स हि स्थि॒रो विच॑र्षणिः॥

indro aṅga mahad bhayamabhī ṣadapa cucyavat |sa hi sthiro vicarṣaṇiḥ ||

इन्द्र॑श्च मृ॒ळया॑ति नो॒ न न॑: प॒श्चाद॒घं न॑शत् ।भ॒द्रं भ॑वाति नः पु॒रः॥

indraśca mṛḷayāti no na na: paścādaghaṃ naśat |bhadraṃ bhavāti naḥ puraḥ ||

इन्द्र॒ आशा॑भ्य॒स्परि॒ सर्वा॑भ्यो॒ अभ॑यं करत् ।जेता॒ शत्रू॒न् विच॑र्षणिः॥

indra āśābhyaspari sarvābhyo abhayaṃ karat |jetā śatrūn vicarṣaṇiḥ ||

विश्वे॑ देवास॒ आ ग॑त शृणु॒ता म॑ इ॒मं हव॑म् ।एदं ब॒र्हिर्नि षी॑दत॥

viśve devāsa ā gata śṛṇutā ma imaṃ havam |edaṃ barhirni ṣīdata ||

ती॒व्रो वो॒ मधु॑माँ अ॒यं शु॒नहो॑त्रेषु मत्स॒रः ।ए॒तं पि॑बत॒ काम्य॑म्॥

tīvro vo madhumām̐ ayaṃ śunahotreṣu matsaraḥ |etaṃ pibata kāmyam ||

इन्द्र॑ज्येष्ठा॒ मरु॑द्गणा॒ देवा॑स॒: पूष॑रातयः ।विश्वे॒ मम॑ श्रुता॒ हव॑म्॥

indrajyeṣṭhā marudgaṇā devāsa: pūṣarātayaḥ |viśve mama śrutā havam ||

अम्बि॑तमे॒ नदी॑तमे॒ देवि॑तमे॒ सर॑स्वति ।अ॒प्र॒श॒स्ता इ॑व स्मसि॒ प्रश॑स्तिमम्ब नस्कृधि॥

ambitame nadītame devitame sarasvati |apraśastā iva smasi praśastimamba naskṛdhi ||

त्वे विश्वा॑ सरस्वति श्रि॒तायूं॑षि दे॒व्याम् ।शु॒नहो॑त्रेषु मत्स्व प्र॒जां दे॑वि दिदिड्ढि नः॥

tve viśvā sarasvati śritāyūṃṣi devyām |śunahotreṣu matsva prajāṃ devi didiḍḍhi naḥ ||

इ॒मा ब्रह्म॑ सरस्वति जु॒षस्व॑ वाजिनीवति ।या ते॒ मन्म॑ गृत्सम॒दा ऋ॑तावरि प्रि॒या दे॒वेषु॒ जुह्व॑ति॥

imā brahma sarasvati juṣasva vājinīvati |yā te manma gṛtsamadā ṛtāvari priyā deveṣu juhvati ||

प्रेतां॑ य॒ज्ञस्य॑ श॒म्भुवा॑ यु॒वामिदा वृ॑णीमहे ।अ॒ग्निं च॑ हव्य॒वाह॑नम्॥

pretāṃ yajñasya śambhuvā yuvāmidā vṛṇīmahe |agniṃ ca havyavāhanam ||

द्यावा॑ नः पृथि॒वी इ॒मं सि॒ध्रम॒द्य दि॑वि॒स्पृश॑म् ।य॒ज्ञं दे॒वेषु॑ यच्छताम्॥

dyāvā naḥ pṛthivī imaṃ sidhramadya divispṛśam |yajñaṃ deveṣu yacchatām ||

आ वा॑मु॒पस्थ॑मद्रुहा दे॒वाः सी॑दन्तु य॒ज्ञिया॑: ।इ॒हाद्य सोम॑पीतये॥

ā vāmupasthamadruhā devāḥ sīdantu yajñiyā: |ihādya somapītaye ||