Mandala.Sukta 2.42

गृत्समद (आङ्गिरसः शौनहोत्रः पश्चाद्) भार्गवः शौनकः। शकुन्तः (कपिञ्जलरूपीन्द्रः)। त्रिष्टुप्। · gṛtsamada (āṅgirasaḥ śaunahotraḥ paścād) bhārgavaḥ śaunakaḥ | śakuntaḥ (kapiñjalarūpīndraḥ) | triṣṭup |

कनि॑क्रदज्ज॒नुषं॑ प्रब्रुवा॒ण इय॑र्ति॒ वाच॑मरि॒तेव॒ नाव॑म् ।सु॒म॒ङ्गल॑श्च शकुने॒ भवा॑सि॒ मा त्वा॒ का चि॑दभि॒भा विश्व्या॑ विदत्॥

kanikradajjanuṣaṃ prabruvāṇa iyarti vācamariteva nāvam |sumaṅgalaśca śakune bhavāsi mā tvā kā cidabhibhā viśvyā vidat ||

मा त्वा॑ श्ये॒न उद् व॑धी॒न्मा सु॑प॒र्णो मा त्वा॑ विद॒दिषु॑मान् वी॒रो अस्ता॑ ।पित्र्या॒मनु॑ प्र॒दिशं॒ कनि॑क्रदत् सुम॒ङ्गलो॑ भद्रवा॒दी व॑दे॒ह॥

mā tvā śyena ud vadhīnmā suparṇo mā tvā vidadiṣumān vīro astā |pitryāmanu pradiśaṃ kanikradat sumaṅgalo bhadravādī vadeha ||

अव॑ क्रन्द दक्षिण॒तो गृ॒हाणां॑ सुम॒ङ्गलो॑ भद्रवा॒दी श॑कुन्ते ।मा न॑: स्ते॒न ई॑शत॒ माघशं॑सो बृ॒हद् व॑देम वि॒दथे॑ सु॒वीरा॑:॥

ava kranda dakṣiṇato gṛhāṇāṃ sumaṅgalo bhadravādī śakunte |mā na: stena īśata māghaśaṃso bṛhad vadema vidathe suvīrā: ||