Mandala.Sukta 2.6

सोमाहुतिर्भार्गवः। अग्निः। गायत्री। · somāhutirbhārgavaḥ | agniḥ | gāyatrī |

इ॒मां मे॑ अग्ने स॒मिध॑मि॒मामु॑प॒सदं॑ वनेः ।इ॒मा उ॒ षु श्रु॑धी॒ गिर॑:॥

imāṃ me agne samidhamimāmupasadaṃ vaneḥ |imā u ṣu śrudhī gira: ||

अ॒या ते॑ अग्ने विधे॒मोर्जो॑ नपा॒दश्व॑मिष्टे ।ए॒ना सू॒क्तेन॑ सुजात॥

ayā te agne vidhemorjo napādaśvamiṣṭe |enā sūktena sujāta ||

तं त्वा॑ गी॒र्भिर्गिर्व॑णसं द्रविण॒स्युं द्र॑विणोदः ।स॒प॒र्येम॑ सप॒र्यव॑:॥

taṃ tvā gīrbhirgirvaṇasaṃ draviṇasyuṃ draviṇodaḥ |saparyema saparyava: ||

स बो॑धि सू॒रिर्म॒घवा॒ वसु॑पते॒ वसु॑दावन् ।यु॒यो॒ध्य१स्मद् द्वेषां॑सि॥

sa bodhi sūrirmaghavā vasupate vasudāvan |yuyodhya1smad dveṣāṃsi ||

स नो॑ वृ॒ष्टिं दि॒वस्परि॒ स नो॒ वाज॑मन॒र्वाण॑म् ।स न॑: सह॒स्रिणी॒रिष॑:॥

sa no vṛṣṭiṃ divaspari sa no vājamanarvāṇam |sa na: sahasriṇīriṣa: ||

ईळा॑नायाव॒स्यवे॒ यवि॑ष्ठ दूत नो गि॒रा ।यजि॑ष्ठ होत॒रा ग॑हि॥

īḷānāyāvasyave yaviṣṭha dūta no girā |yajiṣṭha hotarā gahi ||

अ॒न्तर्ह्य॑ग्न॒ ईय॑से वि॒द्वान् जन्मो॒भया॑ कवे ।दू॒तो जन्ये॑व॒ मित्र्य॑:॥

antarhyagna īyase vidvān janmobhayā kave |dūto janyeva mitrya: ||

स वि॒द्वाँ आ च॑ पिप्रयो॒ यक्षि॑ चिकित्व आनु॒षक् ।आ चा॒स्मिन् त्स॑त्सि ब॒र्हिषि॑॥

sa vidvām̐ ā ca piprayo yakṣi cikitva ānuṣak |ā cāsmin tsatsi barhiṣi ||