Mandala.Sukta 2.7

सोमाहुतिर्भार्गवः। अग्निः। गायत्री। · somāhutirbhārgavaḥ | agniḥ | gāyatrī |

श्रेष्ठं॑ यविष्ठ भार॒ताऽग्ने॑ द्यु॒मन्त॒मा भ॑र ।वसो॑ पुरु॒स्पृहं॑ र॒यिम्॥

śreṣṭhaṃ yaviṣṭha bhāratā'gne dyumantamā bhara |vaso puruspṛhaṃ rayim ||

मा नो॒ अरा॑तिरीशत दे॒वस्य॒ मर्त्य॑स्य च ।पर्षि॒ तस्या॑ उ॒त द्वि॒षः॥

mā no arātirīśata devasya martyasya ca |parṣi tasyā uta dviṣaḥ ||

विश्वा॑ उ॒त त्वया॑ व॒यं धारा॑ उद॒न्या॑ इव ।अति॑ गाहेमहि॒ द्विष॑:॥

viśvā uta tvayā vayaṃ dhārā udanyā iva |ati gāhemahi dviṣa: ||

शुचि॑: पावक॒ वन्द्यो ऽग्ने॑ बृ॒हद् वि रो॑चसे ।त्वं घृ॒तेभि॒राहु॑तः॥

śuci: pāvaka vandyo 'gne bṛhad vi rocase |tvaṃ ghṛtebhirāhutaḥ ||

त्वं नो॑ असि भार॒ताऽग्ने॑ व॒शाभि॑रु॒क्षभि॑: ।अ॒ष्टाप॑दीभि॒राहु॑तः॥

tvaṃ no asi bhāratā'gne vaśābhirukṣabhi: |aṣṭāpadībhirāhutaḥ ||

द्र्व॑न्नः स॒र्पिरा॑सुतिः प्र॒त्नो होता॒ वरे॑ण्यः ।सह॑सस्पु॒त्रो अद्भु॑तः॥

drvannaḥ sarpirāsutiḥ pratno hotā vareṇyaḥ |sahasasputro adbhutaḥ ||