Mandala.Sukta 3.62

गाथिनो विश्वामित्रः १६-१८ जमदग्निर्वा।१-३ इन्द्रावरुणौ, ४-६ बृहस्पतिः, ७-९ पूषा, १०-१२ सविता, १३-१५ सोमः, १६-१८ मित्रावरुणौ। गायत्री, १-३ त्रिष्टुप्। · gāthino viśvāmitraḥ 16-18 jamadagnirvā |1-3 indrāvaruṇau, 4-6 bṛhaspatiḥ, 7-9 pūṣā, 10-12 savitā, 13-15 somaḥ, 16-18 mitrāvaruṇau | gāyatrī, 1-3 triṣṭup |

इ॒मा उ॑ वां भृ॒मयो॒ मन्य॑माना यु॒वाव॑ते॒ न तुज्या॑ अभूवन् ।क्व१ त्यदि॑न्द्रावरुणा॒ यशो॑ वां॒ येन॑ स्मा॒ सिनं॒ भर॑थ॒: सखि॑भ्यः॥

imā u vāṃ bhṛmayo manyamānā yuvāvate na tujyā abhūvan |kva1 tyadindrāvaruṇā yaśo vāṃ yena smā sinaṃ bharatha: sakhibhyaḥ ||

अ॒यमु॑ वां पुरु॒तमो॑ रयी॒यञ्छ॑श्वत्त॒ममव॑से जोहवीति ।स॒जोषा॑विन्द्रावरुणा म॒रुद्भि॑र्दि॒वा पृ॑थि॒व्या शृ॑णुतं॒ हवं॑ मे॥

ayamu vāṃ purutamo rayīyañchaśvattamamavase johavīti |sajoṣāvindrāvaruṇā marudbhirdivā pṛthivyā śṛṇutaṃ havaṃ me ||

अ॒स्मे तदि॑न्द्रावरुणा॒ वसु॑ ष्याद॒स्मे र॒यिर्म॑रुत॒: सर्व॑वीरः ।अ॒स्मान् वरू॑त्रीः शर॒णैर॑वन्त्व॒स्मान् होत्रा॒ भार॑ती॒ दक्षि॑णाभिः॥

asme tadindrāvaruṇā vasu ṣyādasme rayirmaruta: sarvavīraḥ |asmān varūtrīḥ śaraṇairavantvasmān hotrā bhāratī dakṣiṇābhiḥ ||

बृह॑स्पते जु॒षस्व॑ नो ह॒व्यानि॑ विश्वदेव्य ।रास्व॒ रत्ना॑नि दा॒शुषे॑॥

bṛhaspate juṣasva no havyāni viśvadevya |rāsva ratnāni dāśuṣe ||

शुचि॑म॒र्कैर्बृह॒स्पति॑मध्व॒रेषु॑ नमस्यत ।अना॒म्योज॒ आ च॑के॥

śucimarkairbṛhaspatimadhvareṣu namasyata |anāmyoja ā cake ||

वृ॒ष॒भं च॑र्षणी॒नां वि॒श्वरू॑प॒मदा॑भ्यम् ।बृह॒स्पतिं॒ वरे॑ण्यम्॥

vṛṣabhaṃ carṣaṇīnāṃ viśvarūpamadābhyam |bṛhaspatiṃ vareṇyam ||

इ॒यं ते॑ पूषन्नाघृणे सुष्टु॒तिर्दे॑व॒ नव्य॑सी ।अ॒स्माभि॒स्तुभ्यं॑ शस्यते॥

iyaṃ te pūṣannāghṛṇe suṣṭutirdeva navyasī |asmābhistubhyaṃ śasyate ||

तां जु॑षस्व॒ गिरं॒ मम॑ वाज॒यन्ती॑मवा॒ धिय॑म् ।व॒धू॒युरि॑व॒ योष॑णाम्॥

tāṃ juṣasva giraṃ mama vājayantīmavā dhiyam |vadhūyuriva yoṣaṇām ||

यो विश्वा॒भि वि॒पश्य॑ति॒ भुव॑ना॒ सं च॒ पश्य॑ति ।स न॑: पू॒षावि॒ता भु॑वत्॥

yo viśvābhi vipaśyati bhuvanā saṃ ca paśyati |sa na: pūṣāvitā bhuvat ||

तत् स॑वि॒तुर्वरे॑ण्यं॒ भर्गो॑ दे॒वस्य॑ धीमहि ।धियो॒ यो न॑: प्रचो॒दया॑त्॥

tat saviturvareṇyaṃ bhargo devasya dhīmahi |dhiyo yo na: pracodayāt ||

॥दे॒वस्य॑ सवि॒तुर्व॒यं वा॑ज॒यन्त॒: पुरं॑ध्या ।भग॑स्य रा॒तिमी॑महे॥

||devasya saviturvayaṃ vājayanta: puraṃdhyā |bhagasya rātimīmahe ||

॥दे॒वं नर॑: सवि॒तारं॒ विप्रा॑ य॒ज्ञैः सु॑वृ॒क्तिभि॑: ।न॒म॒स्यन्ति॑ धि॒येषि॒ताः॥

||devaṃ nara: savitāraṃ viprā yajñaiḥ suvṛktibhi: |namasyanti dhiyeṣitāḥ ||

सोमो॑ जिगाति गातु॒विद् दे॒वाना॑मेति निष्कृ॒तम् ।ऋ॒तस्य॒ योनि॑मा॒सद॑म्॥

somo jigāti gātuvid devānāmeti niṣkṛtam |ṛtasya yonimāsadam ||

सोमो॑ अ॒स्मभ्यं॑ द्वि॒पदे॒ चतु॑ष्पदे च प॒शवे॑ ।अ॒न॒मी॒वा इष॑स्करत्॥

somo asmabhyaṃ dvipade catuṣpade ca paśave |anamīvā iṣaskarat ||

अ॒स्माक॒मायु॑र्व॒र्धय॑न्न॒भिमा॑ती॒: सह॑मानः ।सोम॑: स॒धस्थ॒मास॑दत्॥

asmākamāyurvardhayannabhimātī: sahamānaḥ |soma: sadhasthamāsadat ||

आ नो॑ मित्रावरुणा घृ॒तैर्गव्यू॑तिमुक्षतम् ।मध्वा॒ रजां॑सि सुक्रतू॥

ā no mitrāvaruṇā ghṛtairgavyūtimukṣatam |madhvā rajāṃsi sukratū ||

उ॒रु॒शंसा॑ नमो॒वृधा॑ म॒ह्ना दक्ष॑स्य राजथः ।द्राघि॑ष्ठाभिः शुचिव्रता॥

uruśaṃsā namovṛdhā mahnā dakṣasya rājathaḥ |drāghiṣṭhābhiḥ śucivratā ||

गृ॒णा॒ना ज॒मद॑ग्निना॒ योना॑वृ॒तस्य॑ सीदतम् ।पा॒तं सोम॑मृतावृधा॥

gṛṇānā jamadagninā yonāvṛtasya sīdatam |pātaṃ somamṛtāvṛdhā ||