Mandala.Sukta 4.15

वामदेवो गौतमः। अग्निः, ७-८ सोमकः साहदेव्यः, ९-१० अश्विनौ। गायत्री। · vāmadevo gautamaḥ | agniḥ, 7-8 somakaḥ sāhadevyaḥ, 9-10 aśvinau | gāyatrī |

अ॒ग्निर्होता॑ नो अध्व॒रे वा॒जी सन् परि॑ णीयते ।दे॒वो दे॒वेषु॑ य॒ज्ञिय॑:॥

agnirhotā no adhvare vājī san pari ṇīyate |devo deveṣu yajñiya: ||

परि॑ त्रिवि॒ष्ट्य॑ध्व॒रं यात्य॒ग्नी र॒थीरि॑व ।आ दे॒वेषु॒ प्रयो॒ दध॑त्॥

pari triviṣṭyadhvaraṃ yātyagnī rathīriva |ā deveṣu prayo dadhat ||

परि॒ वाज॑पतिः क॒विर॒ग्निर्ह॒व्यान्य॑क्रमीत् ।दध॒द् रत्ना॑नि दा॒शुषे॑॥

pari vājapatiḥ kaviragnirhavyānyakramīt |dadhad ratnāni dāśuṣe ||

अ॒यं यः सृञ्ज॑ये पु॒रो दै॑ववा॒ते स॑मि॒ध्यते॑ ।द्यु॒माँ अ॑मित्र॒दम्भ॑नः॥

ayaṃ yaḥ sṛñjaye puro daivavāte samidhyate |dyumām̐ amitradambhanaḥ ||

अस्य॑ घा वी॒र ईव॑तो॒ऽग्नेरी॑शीत॒ मर्त्य॑: ।ति॒ग्मज॑म्भस्य मी॒ळहुष॑:॥

asya ghā vīra īvato'gnerīśīta martya: |tigmajambhasya mīḷahuṣa: ||

तमर्व॑न्तं॒ न सा॑न॒सिम॑रु॒षं न दि॒वः शिशु॑म् ।म॒र्मृ॒ज्यन्ते॑ दि॒वेदि॑वे॥

tamarvantaṃ na sānasimaruṣaṃ na divaḥ śiśum |marmṛjyante divedive ||

बोध॒द्यन्मा॒ हरि॑भ्यां कुमा॒रः सा॑हदे॒व्यः ।अच्छा॒ न हू॒त उद॑रम्॥

bodhadyanmā haribhyāṃ kumāraḥ sāhadevyaḥ |acchā na hūta udaram ||

उ॒त त्या य॑ज॒ता हरी॑ कुमा॒रात् सा॑हदे॒व्यात् ।प्रय॑ता स॒द्य आ द॑दे॥

uta tyā yajatā harī kumārāt sāhadevyāt |prayatā sadya ā dade ||

ए॒ष वां॑ देवावश्विना कुमा॒रः सा॑हदे॒व्यः ।दी॒र्घायु॑रस्तु॒ सोम॑कः॥

eṣa vāṃ devāvaśvinā kumāraḥ sāhadevyaḥ |dīrghāyurastu somakaḥ ||

तं यु॒वं दे॑वावश्विना कुमा॒रं सा॑हदे॒व्यम् ।दी॒र्घायु॑षं कृणोतन॥

taṃ yuvaṃ devāvaśvinā kumāraṃ sāhadevyam |dīrghāyuṣaṃ kṛṇotana ||