Mandala.Sukta 5.13

सुतंभर आत्रेयः। अग्निः । गायत्री। · sutaṃbhara ātreyaḥ | agniḥ | gāyatrī |

अर्च॑न्तस्त्वा हवाम॒हेऽर्च॑न्त॒: समि॑धीमहि ।अग्ने॒ अर्च॑न्त ऊ॒तये॑॥

arcantastvā havāmahe'rcanta: samidhīmahi |agne arcanta ūtaye ||

अ॒ग्नेः स्तोमं॑ मनामहे सि॒ध्रम॒द्य दि॑वि॒स्पृश॑: ।दे॒वस्य॑ द्रविण॒स्यव॑:॥

agneḥ stomaṃ manāmahe sidhramadya divispṛśa: |devasya draviṇasyava: ||

अ॒ग्निर्जु॑षत नो॒ गिरो॒ होता॒ यो मानु॑षे॒ष्वा ।स य॑क्ष॒द् दैव्यं॒ जन॑म्॥

agnirjuṣata no giro hotā yo mānuṣeṣvā |sa yakṣad daivyaṃ janam ||

त्वम॑ग्ने स॒प्रथा॑ असि॒ जुष्टो॒ होता॒ वरे॑ण्यः ।त्वया॑ य॒ज्ञं वि त॑न्वते॥

tvamagne saprathā asi juṣṭo hotā vareṇyaḥ |tvayā yajñaṃ vi tanvate ||

त्वाम॑ग्ने वाज॒सात॑मं॒ विप्रा॑ वर्धन्ति॒ सुष्टु॑तम् ।स नो॑ रास्व सु॒वीर्य॑म्॥

tvāmagne vājasātamaṃ viprā vardhanti suṣṭutam |sa no rāsva suvīryam ||

अग्ने॑ ने॒मिर॒राँ इ॑व दे॒वाँस्त्वं प॑रि॒भूर॑सि ।आ राध॑श्चि॒त्रमृ॑ञ्जसे॥

agne nemirarām̐ iva devām̐stvaṃ paribhūrasi |ā rādhaścitramṛñjase ||