Mandala.Sukta 5.14

सुतंभर आत्रेयः। अग्निः । गायत्री। · sutaṃbhara ātreyaḥ | agniḥ | gāyatrī |

अ॒ग्निं स्तोमे॑न बोधय समिधा॒नो अम॑र्त्यम् ।ह॒व्या दे॒वेषु॑ नो दधत्॥

agniṃ stomena bodhaya samidhāno amartyam |havyā deveṣu no dadhat ||

तम॑ध्व॒रेष्वी॑ळते दे॒वं मर्ता॒ अम॑र्त्यम् ।यजि॑ष्ठं॒ मानु॑षे॒ जने॑॥

tamadhvareṣvīḷate devaṃ martā amartyam |yajiṣṭhaṃ mānuṣe jane ||

तं हि शश्व॑न्त॒ ईळ॑ते स्रु॒चा दे॒वं घृ॑त॒श्चुता॑ ।अ॒ग्निं ह॒व्याय॒ वोळह॑वे॥

taṃ hi śaśvanta īḷate srucā devaṃ ghṛtaścutā |agniṃ havyāya voḷahave ||

अ॒ग्निर्जा॒तो अ॑रोचत॒ घ्नन् दस्यू॒ञ्ज्योति॑षा॒ तम॑: ।अवि॑न्द॒द् गा अ॒पः स्व॑:॥

agnirjāto arocata ghnan dasyūñjyotiṣā tama: |avindad gā apaḥ sva: ||

अ॒ग्निमी॒ळेन्यं॑ क॒विं घृ॒तपृ॑ष्ठं सपर्यत ।वेतु॑ मे शृ॒णव॒द्धव॑म्॥

agnimīḷenyaṃ kaviṃ ghṛtapṛṣṭhaṃ saparyata |vetu me śṛṇavaddhavam ||

अ॒ग्निं घृ॒तेन॑ वावृधु॒: स्तोमे॑भिर्वि॒श्वच॑र्षणिम् ।स्वा॒धीभि॑र्वच॒स्युभि॑:॥

agniṃ ghṛtena vāvṛdhu: stomebhirviśvacarṣaṇim |svādhībhirvacasyubhi: ||