Mandala.Sukta 5.53

श्यावाश्व आत्रेयः। मरुतः। १, ५, १०-११, १५ ककुप्, २ बृहती, ३ अनुष्टुप्, ४ पुर उष्णिक्, ६-७, ९, १३-१४, १६ सतोबृहती, ८, १२ गायत्री। · śyāvāśva ātreyaḥ | marutaḥ | 1, 5, 10-11, 15 kakup, 2 bṛhatī, 3 anuṣṭup, 4 pura uṣṇik, 6-7, 9, 13-14, 16 satobṛhatī, 8, 12 gāyatrī |

को वे॑द॒ जान॑मेषां॒ को वा॑ पु॒रा सु॒म्नेष्वा॑स म॒रुता॑म् ।यद् यु॑यु॒ज्रे कि॑ला॒स्य॑:॥

ko veda jānameṣāṃ ko vā purā sumneṣvāsa marutām |yad yuyujre kilāsya: ||

ऐतान् रथे॑षु त॒स्थुष॒: कः शु॑श्राव क॒था य॑युः ।कस्मै॑ सस्रुः सु॒दासे॒ अन्वा॒पय॒ इळा॑भिर्वृ॒ष्टय॑: स॒ह॥

aitān ratheṣu tasthuṣa: kaḥ śuśrāva kathā yayuḥ |kasmai sasruḥ sudāse anvāpaya iḷābhirvṛṣṭaya: saha ||

ते म॑ आहु॒र्य आ॑य॒युरुप॒ द्युभि॒र्विभि॒र्मदे॑ ।नरो॒ मर्या॑ अरे॒पस॑ इ॒मान् पश्य॒न्निति॑ ष्टुहि॥

te ma āhurya āyayurupa dyubhirvibhirmade |naro maryā arepasa imān paśyanniti ṣṭuhi ||

ये अ॒ञ्जिषु॒ ये वाशी॑षु॒ स्वभा॑नवः स्र॒क्षु रु॒क्मेषु॑ खा॒दिषु॑ ।श्रा॒या रथे॑षु॒ धन्व॑सु॥

ye añjiṣu ye vāśīṣu svabhānavaḥ srakṣu rukmeṣu khādiṣu |śrāyā ratheṣu dhanvasu ||

यु॒ष्माकं॑ स्मा॒ रथाँ॒ अनु॑ मु॒दे द॑धे मरुतो जीरदानवः ।वृ॒ष्टी द्यावो॑ य॒तीरि॑व॥

yuṣmākaṃ smā rathām̐ anu mude dadhe maruto jīradānavaḥ |vṛṣṭī dyāvo yatīriva ||

आ यं नर॑: सु॒दान॑वो ददा॒शुषे॑ दि॒वः कोश॒मचु॑च्यवुः ।वि प॒र्जन्यं॑ सृजन्ति॒ रोद॑सी॒ अनु॒ धन्व॑ना यन्ति वृ॒ष्टय॑:॥

ā yaṃ nara: sudānavo dadāśuṣe divaḥ kośamacucyavuḥ |vi parjanyaṃ sṛjanti rodasī anu dhanvanā yanti vṛṣṭaya: ||

त॒तृ॒दा॒नाः सिन्ध॑व॒: क्षोद॑सा॒ रज॒: प्र स॑स्रुर्धे॒नवो॑ यथा ।स्य॒न्ना अश्वा॑ इ॒वाध्व॑नो वि॒मोच॑ने॒ वि यद् वर्त॑न्त ए॒न्य॑:॥

tatṛdānāḥ sindhava: kṣodasā raja: pra sasrurdhenavo yathā |syannā aśvā ivādhvano vimocane vi yad vartanta enya: ||

आ या॑त मरुतो दि॒व आन्तरि॑क्षाद॒मादु॒त ।माव॑ स्थात परा॒वत॑:॥

ā yāta maruto diva āntarikṣādamāduta |māva sthāta parāvata: ||

मा वो॑ र॒सानि॑तभा॒ कुभा॒ क्रुमु॒र्मा व॒: सिन्धु॒र्नि री॑रमत् ।मा व॒: परि॑ ष्ठात् स॒रयु॑: पुरी॒षिण्य॒स्मे इत् सु॒म्नम॑स्तु वः॥

mā vo rasānitabhā kubhā krumurmā va: sindhurni rīramat |mā va: pari ṣṭhāt sarayu: purīṣiṇyasme it sumnamastu vaḥ ||

तं व॒: शर्धं॒ रथा॑नां त्वे॒षं ग॒णं मारु॑तं॒ नव्य॑सीनाम् ।अनु॒ प्र य॑न्ति वृ॒ष्टय॑:॥

taṃ va: śardhaṃ rathānāṃ tveṣaṃ gaṇaṃ mārutaṃ navyasīnām |anu pra yanti vṛṣṭaya: ||

॥शर्धं॑शर्धं व एषां॒ व्रातं॑व्रातं ग॒णंग॑णं सुश॒स्तिभि॑: ।अनु॑ क्रामेम धी॒तिभि॑:॥

||śardhaṃśardhaṃ va eṣāṃ vrātaṃvrātaṃ gaṇaṃgaṇaṃ suśastibhi: |anu krāmema dhītibhi: ||

॥कस्मा॑ अ॒द्य सुजा॑ताय रा॒तह॑व्याय॒ प्र य॑युः ।ए॒ना यामे॑न म॒रुत॑:॥

||kasmā adya sujātāya rātahavyāya pra yayuḥ |enā yāmena maruta: ||

येन॑ तो॒काय॒ तन॑याय धा॒न्यं१ बीजं॒ वह॑ध्वे॒ अक्षि॑तम् ।अ॒स्मभ्यं॒ तद् ध॑त्तन॒ यद् व॒ ईम॑हे॒ राधो॑ वि॒श्वायु॒ सौभ॑गम्॥

yena tokāya tanayāya dhānyaṃ1 bījaṃ vahadhve akṣitam |asmabhyaṃ tad dhattana yad va īmahe rādho viśvāyu saubhagam ||

अती॑याम नि॒दस्ति॒रः स्व॒स्तिभि॑र्हि॒त्वाव॒द्यमरा॑तीः ।वृ॒ष्ट्वी शं योराप॑ उ॒स्रि भे॑ष॒जं स्याम॑ मरुतः स॒ह॥

atīyāma nidastiraḥ svastibhirhitvāvadyamarātīḥ |vṛṣṭvī śaṃ yorāpa usri bheṣajaṃ syāma marutaḥ saha ||

सु॒दे॒वः स॑महासति सु॒वीरो॑ नरो मरुत॒: स मर्त्य॑: ।यं त्राय॑ध्वे॒ स्याम॒ ते॥

sudevaḥ samahāsati suvīro naro maruta: sa martya: |yaṃ trāyadhve syāma te ||

स्तु॒हि भो॒जान् त्स्तु॑व॒तो अ॑स्य॒ याम॑नि॒ रण॒न् गावो॒ न यव॑से ।य॒तः पूर्वाँ॑ इव॒ सखीँ॒रनु॑ ह्वय गि॒रा गृ॑णीहि का॒मिन॑:॥

stuhi bhojān tstuvato asya yāmani raṇan gāvo na yavase |yataḥ pūrvām̐ iva sakhīm̐ranu hvaya girā gṛṇīhi kāmina: ||