Mandala.Sukta 5.65

रातहव्य आत्रेयः। मित्रावरुणौ। अनुष्टुप्, ६ पङ्क्तिः। · rātahavya ātreyaḥ | mitrāvaruṇau | anuṣṭup, 6 paṅktiḥ |

यश्चि॒केत॒ स सु॒क्रतु॑र्देव॒त्रा स ब्र॑वीतु नः ।वरु॑णो॒ यस्य॑ दर्श॒तो मि॒त्रो वा॒ वन॑ते॒ गिर॑:॥

yaściketa sa sukraturdevatrā sa bravītu naḥ |varuṇo yasya darśato mitro vā vanate gira: ||

ता हि श्रेष्ठ॑वर्चसा॒ राजा॑ना दीर्घ॒श्रुत्त॑मा ।ता सत्प॑ती ऋता॒वृध॑ ऋ॒तावा॑ना॒ जने॑जने॥

tā hi śreṣṭhavarcasā rājānā dīrghaśruttamā |tā satpatī ṛtāvṛdha ṛtāvānā janejane ||

ता वा॑मिया॒नोऽव॑से॒ पूर्वा॒ उप॑ ब्रुवे॒ सचा॑ ।स्वश्वा॑स॒: सु चे॒तुना॒ वाजाँ॑ अ॒भि प्र दा॒वने॑॥

tā vāmiyāno'vase pūrvā upa bruve sacā |svaśvāsa: su cetunā vājām̐ abhi pra dāvane ||

मि॒त्रो अं॒होश्चि॒दादु॒रु क्षया॑य गा॒तुं व॑नते ।मि॒त्रस्य॒ हि प्र॒तूर्व॑तः सुम॒तिरस्ति॑ विध॒तः॥

mitro aṃhościdāduru kṣayāya gātuṃ vanate |mitrasya hi pratūrvataḥ sumatirasti vidhataḥ ||

व॒यं मि॒त्रस्याव॑सि॒ स्याम॑ स॒प्रथ॑स्तमे ।अ॒ने॒हस॒स्त्वोत॑यः स॒त्रा वरु॑णशेषसः॥

vayaṃ mitrasyāvasi syāma saprathastame |anehasastvotayaḥ satrā varuṇaśeṣasaḥ ||

यु॒वं मि॑त्रे॒मं जनं॒ यत॑थ॒: सं च॑ नयथः ।मा म॒घोन॒: परि॑ ख्यतं॒ मो अ॒स्माक॒मृषी॑णां गोपी॒थे न॑ उरुष्यतम्॥

yuvaṃ mitremaṃ janaṃ yatatha: saṃ ca nayathaḥ |mā maghona: pari khyataṃ mo asmākamṛṣīṇāṃ gopīthe na uruṣyatam ||