Mandala.Sukta 5.66

रातहव्य आत्रेयः। मित्रावरुणौ। अनुष्टुप्। · rātahavya ātreyaḥ | mitrāvaruṇau | anuṣṭup |

आ चि॑कितान सु॒क्रतू॑ दे॒वौ म॑र्त रि॒शाद॑सा ।वरु॑णाय ऋ॒तपे॑शसे दधी॒त प्रय॑से म॒हे॥

ā cikitāna sukratū devau marta riśādasā |varuṇāya ṛtapeśase dadhīta prayase mahe ||

ता हि क्ष॒त्रमवि॑ह्रुतं स॒म्यग॑सु॒र्य१माशा॑ते ।अध॑ व्र॒तेव॒ मानु॑षं॒ स्व१र्ण धा॑यि दर्श॒तम्॥

tā hi kṣatramavihrutaṃ samyagasurya1māśāte |adha vrateva mānuṣaṃ sva1rṇa dhāyi darśatam ||

ता वा॒मेषे॒ रथा॑नामु॒र्वीं गव्यू॑तिमेषाम् ।रा॒तह॑व्यस्य सुष्टु॒तिं द॒धृक् स्तोमै॑र्मनामहे॥

tā vāmeṣe rathānāmurvīṃ gavyūtimeṣām |rātahavyasya suṣṭutiṃ dadhṛk stomairmanāmahe ||

अधा॒ हि काव्या॑ यु॒वं दक्ष॑स्य पू॒र्भिर॑द्भुता ।नि के॒तुना॒ जना॑नां चि॒केथे॑ पूतदक्षसा॥

adhā hi kāvyā yuvaṃ dakṣasya pūrbhiradbhutā |ni ketunā janānāṃ cikethe pūtadakṣasā ||

तदृ॒तं पृ॑थिवि बृ॒हच्छ्र॑वए॒ष ऋषी॑णाम् ।ज्र॒य॒सा॒नावरं॑ पृ॒थ्वति॑ क्षरन्ति॒ याम॑भिः॥

tadṛtaṃ pṛthivi bṛhacchravaeṣa ṛṣīṇām |jrayasānāvaraṃ pṛthvati kṣaranti yāmabhiḥ ||

आ यद् वा॑मीयचक्षसा॒ मित्र॑ व॒यं च॑ सू॒रय॑: ।व्यचि॑ष्ठे बहु॒पाय्ये॒ यते॑महि स्व॒राज्ये॑॥

ā yad vāmīyacakṣasā mitra vayaṃ ca sūraya: |vyaciṣṭhe bahupāyye yatemahi svarājye ||