Mandala.Sukta 6.57

बार्हस्पत्यो भरद्वाज: ।इंद्रापूषणौ । गायत्री । · bārhaspatyo bharadvāja: |iṃdrāpūṣaṇau | gāyatrī |

इन्द्रा॒ नु पू॒षणा॑ व॒यं स॒ख्याय॑ स्व॒स्तये॑ ।हु॒वेम॒ वाज॑सातये॥

indrā nu pūṣaṇā vayaṃ sakhyāya svastaye |huvema vājasātaye ||

सोम॑म॒न्य उपा॑सद॒त्पात॑वे च॒म्वो॑: सु॒तम् ।क॒र॒म्भम॒न्य इ॑च्छति॥

somamanya upāsadatpātave camvo: sutam |karambhamanya icchati ||

अ॒जा अ॒न्यस्य॒ वह्न॑यो॒ हरी॑ अ॒न्यस्य॒ सम्भृ॑ता ।ताभ्यां॑ वृ॒त्राणि॑ जिघ्नते॥

ajā anyasya vahnayo harī anyasya sambhṛtā |tābhyāṃ vṛtrāṇi jighnate ||

यदिन्द्रो॒ अन॑य॒द्रितो॑ म॒हीर॒पो वृष॑न्तमः ।तत्र॑ पू॒षाभ॑व॒त्सचा॑॥

yadindro anayadrito mahīrapo vṛṣantamaḥ |tatra pūṣābhavatsacā ||

तां पू॒ष्णः सु॑म॒तिं व॒यं वृ॒क्षस्य॒ प्र व॒यामि॑व ।इन्द्र॑स्य॒ चा र॑भामहे॥

tāṃ pūṣṇaḥ sumatiṃ vayaṃ vṛkṣasya pra vayāmiva |indrasya cā rabhāmahe ||

उत्पू॒षणं॑ युवामहे॒ऽभीशूँ॑रिव॒ सार॑थिः ।म॒ह्या इन्द्रं॑ स्व॒स्तये॑॥

utpūṣaṇaṃ yuvāmahe'bhīśūm̐riva sārathiḥ |mahyā indraṃ svastaye ||