Mandala.Sukta 6.58

बार्हस्पत्यो भरद्वाज: । पूषा ।त्रिष्टुप् , २ जगती । · bārhaspatyo bharadvāja: | pūṣā |triṣṭup , 2 jagatī |

शु॒क्रं ते॑ अ॒न्यद्य॑ज॒तं ते॑ अ॒न्यद्विषु॑रूपे॒ अह॑नी॒ द्यौरि॑वासि ।विश्वा॒ हि मा॒या अव॑सि स्वधावो भ॒द्रा ते॑ पूषन्नि॒ह रा॒तिर॑स्तु॥

śukraṃ te anyadyajataṃ te anyadviṣurūpe ahanī dyaurivāsi |viśvā hi māyā avasi svadhāvo bhadrā te pūṣanniha rātirastu ||

अ॒जाश्व॑: पशु॒पा वाज॑पस्त्यो धियंजि॒न्वो भुव॑ने॒ विश्वे॒ अर्पि॑तः ।अष्ट्रां॑ पू॒षा शि॑थि॒रामु॒द्वरी॑वृजत्सं॒चक्षा॑णो॒ भुव॑ना दे॒व ई॑यते॥

ajāśva: paśupā vājapastyo dhiyaṃjinvo bhuvane viśve arpitaḥ |aṣṭrāṃ pūṣā śithirāmudvarīvṛjatsaṃcakṣāṇo bhuvanā deva īyate ||

यास्ते॑ पूष॒न्नावो॑ अ॒न्तः स॑मु॒द्रे हि॑र॒ण्ययी॑र॒न्तरि॑क्षे॒ चर॑न्ति ।ताभि॑र्यासि दू॒त्यां सूर्य॑स्य॒ कामे॑न कृत॒ श्रव॑ इ॒च्छमा॑नः॥

yāste pūṣannāvo antaḥ samudre hiraṇyayīrantarikṣe caranti |tābhiryāsi dūtyāṃ sūryasya kāmena kṛta śrava icchamānaḥ ||

पू॒षा सु॒बन्धु॑र्दि॒व आ पृ॑थि॒व्या इ॒ळस्पति॑र्म॒घवा॑ द॒स्मव॑र्चाः ।यं दे॒वासो॒ अद॑दुः सू॒र्यायै॒ कामे॑न कृ॒तं त॒वसं॒ स्वञ्च॑म्॥

pūṣā subandhurdiva ā pṛthivyā iḷaspatirmaghavā dasmavarcāḥ |yaṃ devāso adaduḥ sūryāyai kāmena kṛtaṃ tavasaṃ svañcam ||