Mandala.Sukta 7.14

मैत्रावरुणिर्वसिष्ठ:। अग्नि: । त्रिष्टुप् , १ बृहती । · maitrāvaruṇirvasiṣṭha: | agni: | triṣṭup , 1 bṛhatī |

स॒मिधा॑ जा॒तवे॑दसे दे॒वाय॑ दे॒वहू॑तिभिः ।ह॒विर्भि॑: शु॒क्रशो॑चिषे नम॒स्विनो॑ व॒यं दा॑शेमा॒ग्नये॑॥

samidhā jātavedase devāya devahūtibhiḥ |havirbhi: śukraśociṣe namasvino vayaṃ dāśemāgnaye ||

व॒यं ते॑ अग्ने स॒मिधा॑ विधेम व॒यं दा॑शेम सुष्टु॒ती य॑जत्र ।व॒यं घृ॒तेना॑ध्वरस्य होतर्व॒यं दे॑व ह॒विषा॑ भद्रशोचे॥

vayaṃ te agne samidhā vidhema vayaṃ dāśema suṣṭutī yajatra |vayaṃ ghṛtenādhvarasya hotarvayaṃ deva haviṣā bhadraśoce ||

आ नो॑ दे॒वेभि॒रुप॑ दे॒वहू॑ति॒मग्ने॑ या॒हि वष॑ट्कृतिं जुषा॒णः ।तुभ्यं॑ दे॒वाय॒ दाश॑तः स्याम यू॒यं पा॑त स्व॒स्तिभि॒: सदा॑ नः॥

ā no devebhirupa devahūtimagne yāhi vaṣaṭkṛtiṃ juṣāṇaḥ |tubhyaṃ devāya dāśataḥ syāma yūyaṃ pāta svastibhi: sadā naḥ ||