Mandala.Sukta 7.15

मैत्रावरुणिर्वसिष्ठ:। अग्नि: ।गायत्री । · maitrāvaruṇirvasiṣṭha: | agni: |gāyatrī |

उ॒प॒सद्या॑य मी॒ळ्हुष॑ आ॒स्ये॑ जुहुता ह॒विः ।यो नो॒ नेदि॑ष्ठ॒माप्य॑म्॥

upasadyāya mīḷhuṣa āsye juhutā haviḥ |yo no nediṣṭhamāpyam ||

यः पञ्च॑ चर्ष॒णीर॒भि नि॑ष॒साद॒ दमे॑दमे ।क॒विर्गृ॒हप॑ति॒र्युवा॑॥

yaḥ pañca carṣaṇīrabhi niṣasāda damedame |kavirgṛhapatiryuvā ||

स नो॒ वेदो॑ अ॒मात्य॑म॒ग्नी र॑क्षतु वि॒श्वत॑: ।उ॒तास्मान्पा॒त्वंह॑सः॥

sa no vedo amātyamagnī rakṣatu viśvata: |utāsmānpātvaṃhasaḥ ||

नवं॒ नु स्तोम॑म॒ग्नये॑ दि॒वः श्ये॒नाय॑ जीजनम् ।वस्व॑: कु॒विद्व॒नाति॑ नः॥

navaṃ nu stomamagnaye divaḥ śyenāya jījanam |vasva: kuvidvanāti naḥ ||

स्पा॒र्हा यस्य॒ श्रियो॑ दृ॒शे र॒यिर्वी॒रव॑तो यथा ।अग्रे॑ य॒ज्ञस्य॒ शोच॑तः॥

spārhā yasya śriyo dṛśe rayirvīravato yathā |agre yajñasya śocataḥ ||

सेमां वे॑तु॒ वष॑ट्कृतिम॒ग्निर्जु॑षत नो॒ गिर॑: ।यजि॑ष्ठो हव्य॒वाह॑नः॥

semāṃ vetu vaṣaṭkṛtimagnirjuṣata no gira: |yajiṣṭho havyavāhanaḥ ||

नि त्वा॑ नक्ष्य विश्पते द्यु॒मन्तं॑ देव धीमहि ।सु॒वीर॑मग्न आहुत॥

ni tvā nakṣya viśpate dyumantaṃ deva dhīmahi |suvīramagna āhuta ||

क्षप॑ उ॒स्रश्च॑ दीदिहि स्व॒ग्नय॒स्त्वया॑ व॒यम् ।सु॒वीर॒स्त्वम॑स्म॒युः॥

kṣapa usraśca dīdihi svagnayastvayā vayam |suvīrastvamasmayuḥ ||

उप॑ त्वा सा॒तये॒ नरो॒ विप्रा॑सो यन्ति धी॒तिभि॑: ।उपाक्ष॑रा सह॒स्रिणी॑॥

upa tvā sātaye naro viprāso yanti dhītibhi: |upākṣarā sahasriṇī ||

अ॒ग्नी रक्षां॑सि सेधति शु॒क्रशो॑चि॒रम॑र्त्यः ।शुचि॑: पाव॒क ईड्य॑:॥

agnī rakṣāṃsi sedhati śukraśociramartyaḥ |śuci: pāvaka īḍya: ||

स नो॒ राधां॒स्या भ॒रेशा॑नः सहसो यहो ।भग॑श्च दातु॒ वार्य॑म्॥

sa no rādhāṃsyā bhareśānaḥ sahaso yaho |bhagaśca dātu vāryam ||

त्वम॑ग्ने वी॒रव॒द्यशो॑ दे॒वश्च॑ सवि॒ता भग॑: ।दिति॑श्च दाति॒ वार्य॑म्॥

tvamagne vīravadyaśo devaśca savitā bhaga: |ditiśca dāti vāryam ||

अग्ने॒ रक्षा॑ णो॒ अंह॑स॒: प्रति॑ ष्म देव॒ रीष॑तः ।तपि॑ष्ठैर॒जरो॑ दह॥

agne rakṣā ṇo aṃhasa: prati ṣma deva rīṣataḥ |tapiṣṭhairajaro daha ||

अधा॑ म॒ही न॒ आय॒स्यना॑धृष्टो॒ नृपी॑तये ।पूर्भ॑वा श॒तभु॑जिः॥

adhā mahī na āyasyanādhṛṣṭo nṛpītaye |pūrbhavā śatabhujiḥ ||

त्वं न॑: पा॒ह्यंह॑सो॒ दोषा॑वस्तरघाय॒तः ।दिवा॒ नक्त॑मदाभ्य॥

tvaṃ na: pāhyaṃhaso doṣāvastaraghāyataḥ |divā naktamadābhya ||