Mandala.Sukta 7.55

मैत्रावरुणिर्वसिष्ठ:। वास्तोष्पति:, २- ८ इन्द्र:( २-८ प्रस्वापिनी उपनिषद् ) ।१ गायत्री, २-४ उपरिष्टाद्बृहती, ५-८ अनुष्टुप् । · maitrāvaruṇirvasiṣṭha: | vāstoṣpati:, 2- 8 indra:( 2-8 prasvāpinī upaniṣad ) |1 gāyatrī, 2-4 upariṣṭādbṛhatī, 5-8 anuṣṭup |

अ॒मी॒व॒हा वा॑स्तोष्पते॒ विश्वा॑ रू॒पाण्या॑वि॒शन् ।सखा॑ सु॒शेव॑ एधि नः॥

amīvahā vāstoṣpate viśvā rūpāṇyāviśan |sakhā suśeva edhi naḥ ||

यद॑र्जुन सारमेय द॒तः पि॑शङ्ग॒ यच्छ॑से ।वी॑व भ्राजन्त ऋ॒ष्टय॒ उप॒ स्रक्वे॑षु॒ बप्स॑तो॒ नि षु स्व॑प॥

yadarjuna sārameya dataḥ piśaṅga yacchase |vīva bhrājanta ṛṣṭaya upa srakveṣu bapsato ni ṣu svapa ||

स्ते॒नं रा॑य सारमेय॒ तस्क॑रं वा पुनःसर ।स्तो॒तॄनिन्द्र॑स्य रायसि॒ किम॒स्मान्दु॑च्छुनायसे॒ नि षु स्व॑प॥

stenaṃ rāya sārameya taskaraṃ vā punaḥsara |stotṝnindrasya rāyasi kimasmānducchunāyase ni ṣu svapa ||

त्वं सू॑क॒रस्य॑ दर्दृहि॒ तव॑ दर्दर्तु सूक॒रः ।स्तो॒तॄनिन्द्र॑स्य रायसि॒ किम॒स्मान्दु॑च्छुनायसे॒ नि षु स्व॑प॥

tvaṃ sūkarasya dardṛhi tava dardartu sūkaraḥ |stotṝnindrasya rāyasi kimasmānducchunāyase ni ṣu svapa ||

सस्तु॑ मा॒ता सस्तु॑ पि॒ता सस्तु॒ श्वा सस्तु॑ वि॒श्पति॑: ।स॒सन्तु॒ सर्वे॑ ज्ञा॒तय॒: सस्त्व॒यम॒भितो॒ जन॑:॥

sastu mātā sastu pitā sastu śvā sastu viśpati: |sasantu sarve jñātaya: sastvayamabhito jana: ||

य आस्ते॒ यश्च॒ चर॑ति॒ यश्च॒ पश्य॑ति नो॒ जन॑: ।तेषां॒ सं ह॑न्मो अ॒क्षाणि॒ यथे॒दं ह॒र्म्यं तथा॑॥

ya āste yaśca carati yaśca paśyati no jana: |teṣāṃ saṃ hanmo akṣāṇi yathedaṃ harmyaṃ tathā ||

स॒हस्र॑शृङ्गो वृष॒भो यः स॑मु॒द्रादु॒दाच॑रत् ।तेना॑ सह॒स्ये॑ना व॒यं नि जना॑न्त्स्वापयामसि॥

sahasraśṛṅgo vṛṣabho yaḥ samudrādudācarat |tenā sahasyenā vayaṃ ni janāntsvāpayāmasi ||

प्रो॒ष्ठे॒श॒या व॑ह्येश॒या नारी॒र्यास्त॑ल्प॒शीव॑रीः ।स्त्रियो॒ याः पुण्य॑गन्धा॒स्ताः सर्वा॑: स्वापयामसि॥

proṣṭheśayā vahyeśayā nārīryāstalpaśīvarīḥ |striyo yāḥ puṇyagandhāstāḥ sarvā: svāpayāmasi ||